Tá béim le Séasúr Nua ar RTÉ ar Éirinn na linne seo, ar chúrsaí aeráide, ar chraoladh beo spóirt agus ar shiamsaíocht chomh maith le smaointeoireacht an náisiúin a chothú le scéalta a thiocfaidh i gcion go mór ar dhaoine
By RTÉ
D’fhógair RTÉ cláir nua inniu a thiocfaidh i gcion go mór ar an lucht féachana agus éisteachta. Tá láithreoirí nua mór le rá agus béim láidir ar chúrsaí aeráide ag baint leis an séasúr nua chomh maith. Tá cúrsaí aeráide agus timpeallachta ar na ceisteanna is anróití a chuirtear romhainn ar na saolta seo. Chun béim a leagan ar scála na deacrachta, beidh seachtain iomlán de chláir fiosrúcháin, d’imeachtaí speisialta agus de dhíospóireacht á caitheamh ag RTÉ leis an ábhar i rith mhí na Samhna. Beidh Tionól na nÓg i lár an aonaigh i rith Sheachtain Aeráide RTÉ agus 157 duine óg ag teacht le chéile i nDáil Éireann chun na mórcheisteanna a phlé. Beidh RTÉ i gcónaí ar an lárchraoltóir maidir le spórt saor ar an aer agus craolfar na foirne náisiúnta agus na lúthchleasaithe is fearr sa tír san iomaíocht i gcomórtais dhomhanda sa rugbaí agus sa sacar, san iomramh agus sa hacaí. Beidh na cluichí náisiúnta i gceartlár an ábhair a chuireann Spórt RTÉ ar fáil i gcónaí agus Craobhchomórtais AIB Uile-Éireann na gClubanna á chur leis an ábhar ionas go mbíonn cluichí Chumann Lúthchleas Gael á gcraoladh ag RTÉ ar feadh na bliana ar fad. Ar Spórt RTÉ a bheidh foireann rugbaí na hÉireann le feiceáil i rith Chorn Rugbaí an Domhain. Beidh Jamie Heaslip, Donncha O’Callaghan agus Michael Lynagh á gcur leis an bpainéal iomráiteach don Rugby World Cup agus Fiona Coughlan, Captaen na foirne a bhuaigh Corn na Sé Náisiún, á cur leis an meitheal tráchtaireachta. Leanfaidh RTÉ de scéalta a mbeadh neamhaird orthu a fhoilsiú a rachaidh i gcion go tréan láidir agus beidh Quinn Country, Redress Board agus The Teenage Ambassadors i measc na sraitheanna nua ag cur le dúthracht leanúnach RTÉ maidir le hiriseoireacht den scoth ar chláir nuachta agus cúrsaí reatha. Le Morning Ireland, an clár raidió is mó lucht éisteachta sa tír, Claire Byrne Live, Prime Time, The Late Debate agus eile, tá RTÉ ar an bhfoinse nuachta agus cúrsaí reatha is mó a bhfuil iontaoibh ag muintir na hÉireann. Agus an Breatimeacht ag teannadh linn, beidh tuairisc ag RTÉ ar gach cor nua sa scéal. Bíonn RTÉ lárnach maidir leis an bplé phoiblí ar chúrsaí na tíre mar gheall ar an iriseoireacht fiosrúcháin. Táthar ullamh chun scéala móra nua a fhoilsiú i rith an tséasúir seo ar RTÉ Investigates chomh maith le cláir faisnéise a chraoladh a bhfuil suntas mór leo. Leanann RTÉ de bhéim a leagan ar dhrámaíocht scripteáilte agus ar chláir grinn agus ar dhaoine cumasacha nua a thabhairt chun cinn i gcomhar le páirtnéirí éagsúla. Ar an ábhar nua drámaíochta, tá Dublin Murders le Sarah Greene, Killian Scott agus Tom Vaughan-Lawlor, agus beidh The Young Offenders ar ais le sraith nua chomh maith le cláir phíolótacha grinn, i gcomhar le Fís Éireann, a chraoladh. Chomh maith leis na cláracha siamsaíochta is iomráití ar an teilifís in Éirinn, tugann RTÉ teaghlaigh le chéile freisin ag faire ar na cláracha beo is mó le rá gach bliain. Beidh The Late Late Show, Dancing with the Stars, The Ray D’Arcy Show agus The Tommy Tiernan Show ar ais i rith an tséasúir nua seo. Ag cur leis an ábhar suntais sin ar fad, beidh Keith Barry, fear draíochta ag cur The Keith Barry Experience i láthair agus déanfar ceiliúradh ar phearsa mór grinn na hÉireann le Brendan Grace: Thanks for the Memories. Ag labhairt di ag an seoladh, dúirt Dee Forbes Príomh-Stiúrthóir RTÉ: “Ní raibh am ar bith riamh a rabhthas ag brath chomh mór ar na meáin chumarsáide seirbhíse poiblí. Iriseoireacht neamhspleách, scéalta áitiúla, oirfidigh, scríbhneoirí agus ealaíontóirí de chuid na tíre seo: sin a bheidh le feiceáil ar fud an sceidil lena léirítear mórchuimse an réimse ábhair a chuireann RTÉ ar fáil do mhuintir na hÉireann, ar an teilifís, ar an raidió agus ar na meáin dhigiteacha. Meabhraítear dúinn arís eile an tábhacht atá leis na meáin chumarsáide seirbhíse poiblí i ndáil le hÉire na staire, Éire na linne seo agus a bhfuil i ndán dúinn a chur in iúl.” Dúirt Adrian Lynch, Stiúrthóir RTÉ maidir leis an Lucht Féachana agus Éisteachta, Cainéil agus Margaíocht: “Nach mór an t-ábhar iontais atá sa séasúr nua spleodrach atá amach romhainn. Téann réimse leathan ábhair RTÉ i gcion ar níos mó ná 90% den lucht féachana agus éisteachta in Éirinn gach seachtain ar fud na seirbhísí ar fad. Is samplaí den ról atá le RTÉ i saol na hÉireann gur air a bhíonn foireann rugbaí na hÉireann le feiceáil, go gcruthaítear ardán ar a bhfuil cead cainte ag daoine óga na hÉireann ag Tionól na nÓg i rith Sheachtain Aeráide RTÉ, go dtarraingítear aird mhuintir na hÉireann le roinnt de na cláracha siamsaíochta beo is mó le rá. Leanann RTÉ freisin den ábhar iriseoireachta is iontaofa a chur ar fáil chomh maith le scéalta a théann i gcion ar mhuintir an náisiúin ar fad. Seo scoth RTÉ. RTÉ MAIDIR LEIS AN AERÁID Beidh ábhar nua as an bpíosa le feiceáil agus le cloisteáil ar na hardáin ar fad mar chuid de shéasúr RTÉ maidir leis an aeráid. Cíorfar na ceisteanna casta maidir le cúrsaí aeráide agus cúrsaí timpeallachta atá le réiteach in Éirinn le cláir faisnéise, imeachtaí speisialta agus díospóireachtaí. Cuirfidh Gerald Fleming Will Ireland Survive 2050 i láthair, leanfaidh Nuacht RTÉ den bhéim ar chúrsaí aeráide le tuairiscí speisialta ó Paul Cunningham, agus tabharfaidh Philip Boucher-Hayes tuairisc i gclár speisialta ar bheartaíocht an rialtais, agus ar chásanna easpa gníomhaíochta, i ndáil le cúrsaí aeráide. SCÉALTA A THÉANN I bhFEIDHM Leanfaidh RTÉ de scéalta a thabhairt chun suntais a théann i gcion go mór ar mhuintir na hÉireann le sraitheanna nua de leithéid Quinn Country, Redress Board agus The Teenage Ambassadors, chomh maith le dúthracht leanúnach RTÉ i ndáil le hiriseoireacht den scoth ar chláir nuachta agus cúrsaí reatha. Le Morning Ireland, an clár raidió is mó lucht éisteachta sa tír, Claire Byrne Live, Prime Time, The Late Debate agus eile, tá RTÉ ar an bhfoinse nuachta agus cúrsaí reatha is mó a bhfuil iontaoibh ag muintir na hÉireann as. ÁBHAR DRÁMAÍOCHTA AGUS GRINN Ar an ábhar nua drámaíochta agus sraitheanna grinn i mbliana, tá Dublin Murders, le Sarah Greene, Tom Vaughan-Lawlor agus Killan Scott, Dead Still, dráma mistéire suite in Éirinn i rith ré Victoria agus sraith nua de The Young Offenders a mbíonn oiread tóir ag an lucht féachana air. Tá séasúr nua de chláir phíolótacha de chuid RTÉ/Fís Éireann ar fáil mar gheall ar dhúthracht RTÉ maidir le daoine nua cumasacha a thabhairt chun cinn. Beidh ceiliúradh á dhéanamh ar 30 bliain de Fair City, an sobaldráma is mó lucht féachana in Éirinn, le clár speisialta uair a chloig agus is mór an t-ionadh a ghabhann le daoine nach bhfacthas le fada a fheiceáil ar ais arís gan aon choinne leo. NA CLÁRACHA AGUS NA PEARSAÍ IS MÓ LE RÁ Leanfaidh RTÉ de na cláracha beo is suntasaí a chur ar fáil agus den tír a tharraingt le chéile leis an ábhar siamsaíochta nach féidir le haon duine den teaghlach a chailleadh. Cuirfear The Keith Barry Experience leis na sraitheanna iomráiteacha The Late Late Show, Room To Improve, The Ray D’arcy Show, Ireland’s Fittest Family agus The Tommy Tiernan Show. Déantar ceiliúradh ar fhear na scéalta grinn, Brendan Grace, in Brendan Grace: Thanks for the Memories, agus beidh Dancing with the Stars go spleodrach ar an scáileán le damhsóirí gairmiúla nua sa chomplacht. SPÓRT Tá RTÉ i gcónaí ar an bpríomhchraoltóir maidir le spórt saor ar an aer agus tarraingítear an tír ar fad le chéile ag seasamh le foirne na hÉireann sa tír seo agus thar lear. Idir Corn an Domhain sa Rugbaí sa tSeapáin, foirne peile agus iománaíochta an pharóiste le Craobhchomórtais AIB na gClubanna, Corn na Sé Náisiún i Rugbaí na mBan, agus Craobh an Domhain san Iomramh, tabharfaidh RTÉ an lucht féachana isteach i lár an aicsin. SCÉALTA AGUS FÍRINNE NA hÉIREANN Is ardán iontaofa RTÉ ag muintir na hÉireann chun a gcuid scéalta a chur in iúl. Is léir sin ar chláracha sa séasúr nua seo le leithéid The Rotunda, The Yellow Brick Road, Changing Ireland, Raised by the Village, Harvest Week agusMy Big Day Home or Away. NÓTAÍ DON EAGARTHÓIR : Eolas breise DRÁMAÍOCHT AGUS CLÁIR GHRINN NUA: Dublin Murders Sraith drámaíochta do BBC One, Starz agus RTÉ le cabhair airgid ó Scáileán Thuaisceart Éireann le Killian Scott, Sarah Greene, Moe Dunford agus Tom Vaughan-Lawlor sna príomhpháirteanna. Is í Sarah Phelps a bhfuil cáil uirthi maidir le drámaí teilifís de scéalta Agatha Christie agus as an gcóiriú teilifíse ar The Casual Vacancy le JK Rowling a chóirigh na scéalta atá bunaithe ar shraith úrscéalta Dublin Murder Squad le Tana French a rinne an obair chóiriúcháin don scáileán. Beidh an tsraith, atá suite sa ré a raibh an Tíogar Ceilteach i mbarr réime, dírithe ar dhá chás dúnmharaithe atá á bhfiosrú ag na bleachtairí scóipiúla carasmatacha Rob Reilly agus Cassie Maddox. NUA: Dead Still RTÉ i gcomhar le Acorn Media Enterprises (AME) a choimisiúnaigh an dráma mistéire seo atá á chomhléiriú ag Deadpan Pictures i mBaile Átha Cliath agus Shaftesbury i Toronto in éineacht le ZDF Enterprises. Suite in Éirinn i rith na 1880idí, tráth ar tháinig grianghrafadóireacht iarbháis chun cinn go tréan, feictear grianghrafadóir cuimhneacháin cáiliúil sa tsraith sé chlár drámaíochta seo agus é i mbun fiosrúcháin maidir le feallmharú dhaoine ar thóg sé grianghraif díobh le gairid. John Morton a scríobh Dead Still agus is í Imogen Murphy (Can’t Cope, Won’t Cope, Red Rock) agus Craig David Wallace (Slasher, Todd and the Book of Pure Evil, Murdoch Mysteries) na stiúrthóirí. Tá Michael Smiley agus Eileen O’Higgins i measc na n-aisteoirí. NUA: South Westerlies Dráma suite i mbaile le cósta na hÉireann a bhfuil sé i gceist feirm ghaoithe faoi úinéireacht chomhlacht de chuid na hIorua a chur ar bun ann. NUA: The Keith Barry Experience Tá Laura Whitmore, Rosie Connolly agus Ken Doherty ar na haíonna atá i láthair agus an fear draíochta ag tabhairt faoi chleasa éagsúla, iarracht ina measc éalú as seaicéad ceangail agus é i mbaol a bháis crochta bunoscionn ó chrann tógála. The Young Offenders Leanfar i Sraith 2 le heachtraí na rógairí Conor & Jock agus iad ag teacht in inmhe agus le cás a máthar, Mairéad, agus í ag iarraidh iad a choinneáil slán ar thrioblóid (Alex Murphy, Chris Walley agus Hilary Rose, ar ais sna príomhpháirteanna); an cairdeas, an dílseacht, gáire agus áibhirseoireacht. The Doireann Project: Tar éis cruthú go hiontach leis an gcéad sraith ar an RTÉ Player, cuireann Doireann Garrihy beocht i roinnt daoine cáiliúla eile in Éirinn sa tsraith sceitseanna seo. Ar an ábhar grinn a chraolfar i mbliana, beidh ceithre cinn de chláir phíolótacha de chuid RTÉ / Fís Éireann. Headcases, le Seana Kerslake sa phríomhpháirt, ina bhfeictear ceathrar ban atá ag obair i siopa gruaigeadóireachta i dTuaisceart Bhaile Átha Cliath agus iad ag déileáil le fir chéile, cúrsaí cumainn agus dronga caimiléireachta. Bump, le Charlene McKenna sa phríomhpháirt, ina bpléitear le cora crua casta an tsaoil tar éis aontú a bheith i do mháthair ionaid do do dheirfiúr. Dad Scéal faoi athair meánaosta a théann ina chónaí lena mhac aerach caomhach in árasán aon tseomra codlata amháin tar éis dá bhean bóthar a thabhairt dó. Handy Scéal faoi bheirt leasdeirfiúracha a dhéanann na jabanna is aistí cé nach ndéanann siad ach seo agus siúd. Storyland Tugann RTÉ agus Scáileán Thuaisceart Éireann deis do dhaoine cumasacha atá ag teacht chun cinn in Éirinn drámaí nua de chuid na tíre a léiriú faoin mana Storyland. NUA: Wastewater Tá gean ag Vinny agus Lauryn ar a chéile ach ní féidir a bheith cinnte gurb é an rath atá i ndán dóibh nuair atá na gnéithe is rúnda de shaol gach aon duine acu fite ina chéile. Arna scríobh agus arna stiúradh ag Dave Tynan (Dublin Oldschool) NUA: Skip to the EndTá fear ag fulaingt tráma mar gheall ar a iníon a chur in ospidéal tar éis tionóisc cairr agus tugtar deis dhiamhrach dó léim ar aghaidh go mbíonn an phian glanta. Arna scríobh agus arna stiúradh ag Jason Butler. NUA: Eat the RichBaineann teachtaire óg rothair, nach furasta dó maireachtáil agus cúrsaí eacnamaíochta mar atá, díoltas den cheannasaí a chuir as a phost é. Arna scríobh ag PJ Hart. NUA: A Deal Is A Deal Ní maith a sheasann déagóir cantalach míthreorach a bhfuil an-tóir aige ar cholúir an buille atá i mbás éan óg dá chuid dó. Arna scríobh ag Francis agus Geraldine Scullion. NUA: Mushrooms Déanann bean tí atá i mbarr a céille bearta baothdhána chun éalú ón gcruachás. Arna scríobh ag Marion McDowell agus arna stiúradh ag Meghan McArdle. NUA: Yellow Bird Tá seanbhean i mbaol a cur amach ar an tsráid ag a hiníon féin agus tugann sí isteach dídeanaí as an tSiria. Ní mar a chéile baileach tuiscint na beirte ar an tsaoirse. Arna scríobh agus arna stiúradh ag Gráinne Dwyer. BUNÁBHAR FAOI LEITH AR RTÉ PLAYER: Rugby World Cup Extras Beidh ábhar spleodrach siamsúil atá ceangailte le RWC na bliana seo ar RTÉ Player, rte.ie agus ar na meáin shóisialta. Áirítear ar chuid den ábhar gairid seo Trying Japanese, formáid siamsaíochta ina dtugtar dúshlán dhaoine cáiliúla i saol siamsa agus spóirt na hÉireann blas a fháil ar ghnéithe éagsúla de shaol na Seapáine! Climate Action: Sustainable Living Series Tugtar dúshlán dhaoine cáiliúla saol níos inmharthana a chaitheamh trí athrú a chur, ar feadh seachtaine, ar ghné amháin den saol, agus sin chun tairbhe don phláinéad. Your One Nikita Season 2 Sraith gearrscannán géar grinn anamúlachta le do Nikita bhreá agus a cuid cairde ó thuaisceart chathair Bhaile Átha Cliath! Aoife Dooley, Emmet Kirwan agus Jen Hatton atá sna príomhpháirteanna. NUACHT & CÚRSAÍ REATHA Le stiúideo nua a seoladh níos luaithe i mbliana, cuireann Nuacht RTÉ na cláir nuachta is mó le rá in Éirinn ar fáil le scéalta nua agus agallaimh ar na cláir nuachta is suntasaí, Six One News agus Nine O’Clock News, chomh maith le tuairiscí a chur ar fáil 24/7 ar na seirbhísí nuachta digiteacha. Leantar ar RTÉ Nationwide de thuairiscí ar scéalta na tíre i gceantair tuaithe agus i gceantair uirbeacha. Beidh Claire Byrne Live agus Prime Time ar ais i rith an fhómhair le díospóireacht beo sa stiúideo agus beidh an tsraith dhigiteach de ghearrthuairiscí, Explained by Prime Time, ina dtugtar eolas soiléir maidir leis na príomhcheisteanna cúrsaí reatha ar ais agus deis iad a bhreathnú an tráth is mian leat san áit is mian leat. Tá scéalta móra nua le cur i láthair ag an dream céanna a chuir muintir na hÉireann ar an eolas faoi ábhar scannail maidir le tionscal na rásaí con, creiseanna agus ola BSL á sceitheadh ar RTÉ Investigates i rith an tséasúir. Beidh ábhar léargais á chur ar fáil i rith an tséasúir freisin ar chláir podchraolta de chuid Nuacht RTÉ Brexit Republic, Your Politics le Áine Lawlor. FÍORASACH NUA: Quinn Country Scéal an bhilliúnaí ar déanadh príosúnach dócmhainneach de nuair a chuaigh sé sa seans ag ceannach luach na mbilliún euro de scaireanna in Anglo Irish Bank. Ní raibh an seans leis agus tharla cúlú tubaisteach eacnamaíochta in Éirinn. Tá trí chlár 60 nóiméad sa tsraith agus bhí Seán Quinn, den chéad uair, sásta labhairt le lucht a ndéanta. NUA: The Redress Board: Fiche bliain tar éis an tsraith faisnéise States of Fear a chraoladh, filleann RTÉ ar na scéalta a bhaineann le scoileanna saothair in Éirinn go bhfeictear an bhfuil aon ní foghlamtha. I mí Bealtaine 1999 ghabh an Taoiseach Parthalán Ó hEachthairn leithscéal le daoine a bhí i bhforais cónaithe agus cuireadh fiosrúchán Stáit ar bun maidir lenar tharla chun a fháil amach cé a bhí freagrach as an drochíde a tugadh do leanaí a bhí faoi chúram an stáit. Chuir an rialtas scéim sásaimh ar bun chun cúiteamh a thabhairt do dhaoine as an drochíde a d’fhulaing siad. Fiche bliain dár gcionn, scrúdaítear sa chlár faisnéise seo ar tharla do na daoine sin agus an Stát ag féachaint le sásamh agus cúiteamh a thabhairt dóibh mar gheall ar ar imríodh orthu agus iad ina leanaí. NUA: The Teenage Ambassadors: Casadh Natasha Maimba agus Minahil Sarfraz ar a chéile agus iad ag éirí aníos ina n-iarrthóirí tearmainn faoi Chóras an tSoláthair Dhírigh, a n-óige á caitheamh acu i gcarbháin chúnga ar imeall Bhaile Átha Luain. Chaith an bheirt na blianta i gcás liombó, gan a fhios acu an mbeadh cead acu fanacht sa tír ina raibh cónaí orthu. Ní raibh cead oibre ag máithreacha na gcailíní agus séanadh bunchearta saoránachta orthu. Agus cead tugtha dóibh fanacht anseo ar deireadh thiar, feicfear na mná óga solabhartha, éirimiúla, greannmhara seo agus iad ag ullmhú do scrúduithe na hArdteistiméireachta. NUA: The Yellow Brick Road Más maidir le huaigneas, dífhostaíocht nó caidreamh pearsanta an cheist, nó más fóibe, imní nó andúil an trioblóid, beidh aird, comhairle agus cúnamh ar fáil acu siúd atá ina chall ó cheathrar atá roghnaithe go cúramach mar Shíogaí Coimhdeachta (Claire Fullam, Noel Sutton, Greg Xavier agus Jordan Dunbar). Ar aon mheon le The Wizard of Oz, tapóidh siad an draíocht chun muinín agus misneach dhaoine a spreagadh agus a chothú agus cuideoidh siad leo tosú amach ar an Yellow Brick Road sin acu féin. NUA: Brendan Grace- Thanks for the Memories Sraith 3 chlár arb é a bhí i gceist leis ar dtús Brendan Grace a thaispeáint ag coimhlint chun seó a chur ar bun in amharclann an Olympia leis an gcór Forget-Me-Nots agus roinnt dá chuid cairde i saol an tsiamsa. Bhuail tinneas Brendan. Niúmóine a bhí le sárú aige ar dtús agus ailse ina dhiaidh sin. Tháinig athrú béime maidir leis an tsraith ionas gur sraith faisnéise faoi fhear atá ag coimhlint le fanacht beo atá ann seachas scéal faoi fhear atá ag iarraidh seó a chur ar an stáitse. The Rotunda Beidh ocht gclár nua sa tsraith seo a bhfuil gradaim buaite aici i rith an Fhómhair ina bhfeicfear an ríméad agus an crá a bhaineann le toircheas agus le breith linbh san ospidéal máithreachais is faide ar bun ar fud an domhain ar fad. Beidh 32 scéal maidir le daoine atá ag súil le páiste le feiceáil sa tsraith seo. I roinnt cásanna, ní bheidh i gceist ach cuairt shimplí ar an Seomra Breithe agus i gcásanna eile beidh cúnamh breise de dhíth ar na tuismitheoirí ó fhoireann dhíograiseach dochtúirí agus mná glúine an Rotunda. NUA: Pulling with my Parents Sa tsraith nua seo do RTÉ 2, ligeann glúin daoine, nach eol dóibh modhanna eile seachas aipeanna digiteacha chun bualadh le daoine, a gcuid tuismitheoirí i mbun cúrsaí grá dóibh, i mbun a gcuid aipeanna agus eile! An gcuideoidh súile an tuismitheora le fadhbanna caidrimh na linne seo a scaoileadh? Nó an mbeidh ‘Grindr’ iomarcach ag Mamaí? NUA: My Big Day Home or Away: I ngach clár de na ceithre cinn sa tsraith, cuirtear seirbhísí bheirt phleanálaithe bainise ardchaighdeáin, Tara Fay agus Bruce Russell, ar fáil do lánúin a bhfuil lámh agus focal eatarthu. Leagann pleanálaí amháin amach socruithe do bhainis in Éirinn agus an dara pleanálaí socruithe do bhainis i bhfad ó bhaile, in áit iontach thar lear. First Dates Ireland Beidh ríméad ar an lucht féachana go bhfuil sraith eile ar fáil de na beirteanna nach bhfuil aithne dá laghad acu ar a chéile ag caitheamh béile i lár chathair Bhaile Átha Cliath agus súil acu go dtitfidh siad i ngrá trasna an bhoird. Chuir níos mó ná 4,000 duine iarratas isteach a bheith ar an tsraith is deireanaí seo a chraolfar ar RTÉ Two i dtús na bliana 2020. NUA: Niall Tóibín Bhí fáil ar ábhar cartlainne de chuid an teaghlaigh féin chomh maith le sleachta éagsúla as cláir teilifíse, scannáin agus seónna stáitse don chlár faisnéise seo ina dtugtar léargas géar ar éirim dhuine de na hÉireannaigh is grinne greannmhaire intinn. Feictear agallaimh le gach duine de chlann Néill agus le Pierce Brosnan, Gabriel Byrne agus Jim Sheridan. Ar Son na Poblachta Tá an tsraith ar ais ar RTÉ One i mí Deireadh Fómhair 2019 agus deich mbliana chomóradh an chéid ag leanúint ar aghaidh. Sa chéad chlár, The story of the life and death of Private George Duff Chalmers, ríomhtar scéal an fhir a rugadh i nDún Éideann sa bhliain 1902, a chuir an IRA chun báis i mí Meitheamh 1921 agus a raibh a chorp beagnach 100 bliain curtha i bportach i gContae an Chláir ar feadh. Baineann Clár 2 le Thomas Hodgett a fuadaíodh óna theach cónaithe agus nach bhfacthas ina bheatha arís ina dhiaidh sin. NUA: All Hands on Deck Gheobhaidh Francis Brennan léargas i ngach clár uair a chloig ar an saol atá ag 1,600 ball foirne na loinge trí dhul i mbun an chúraim a bhíonn ar thriúr de na daoine is sinsearaí: An Maître d′, an Stiúrthóir Siamsaíochta agus Ardbhainisteoir an Óstáin. Raised by the Village: Tar éis sraith phíolótach ar éirigh thar cionn leis, tá Raised by the Village ar ais le sraith ceithre chlár maidir le ochtar déagóirí as Darndál, Baile Néill, Sord, Port Láirge agus Dún Dealgan. Glacann teaghlaigh i Ros Comáin, i Liatroim, i Laois agus i nDún na nGall isteach leis na déagóirí. NUA: Sirloin Steaks & Semtex Clár faisnéise ina ríomhann Brian Kerr agus imreoirí sacair Shraith na hÉireann a thug turas go dtí an Libia sa bhliain 1989 chun imirt in aghaidh fhoireann náisiúnta na tíre sin tráth a raibh oiread míchlú ar réimeas Gadaffi. Baintear leas sa scannán as lón ábhair as Cartlann RTÉ chun comhthéacs a thabhairt maidir leis an gceangal follasach agus ceilte idir an Libia agus Stát na hÉireann i rith na 1980idí – Mairteoil ag dul anonn mar gheall ar mhargaí luachmhara d’aontaigh lucht easportála mairteola na hÉireann le Stát Gadaffi agus Gunnaí á gcur anall de réir mar a chuidigh Gadaffi le Sealadaí an IRA mar chuid dá iarracht féin cogadh a fhearadh in aghaidh thíortha an Iarthair. NUA: Children of the Troubles Scrúdaíonn Joe Duffy saol agus bás tragóideach na leanaí a maraíodh i rith ré na dTrioblóidí i dTuaisceart Éireann. Le himeacht na mblianta fada, cailleadh na mílte duine de gach aois mar gheall ar an bhforéigean i dTuaisceart Éireann, páistí ina measc chomh maith le himreoirí óga spóirt agus déagóirí a bhí ag tosú amach ar an saol oibre. Beidh béim sa tsraith ar chuimhne an teaghlaigh ar na daoine óga sin agus ar an saol gairid a bhí caite acu. NUA: Building Ireland Beidh saineolaithe i réimsí na hAiltireachta, na hInnealtóireachta agus na Tíreolaíochta i mbun roinnt de na samplaí is breátha d’oidhreacht foirgníochta agus innealtóireachta na hÉireann a scrúdú agus a cheiliúradh. NUA: DIY SOS Ireland – Is formáid spreagúil ‘The Big Build’ ar RTÉ One ar a bhfeicfear teaghlach a bhfuil cúinsí cráiteacha pearsanta le sárú acu agus cúnamh atá tuilte go maith acu á thabhairt dóibh maidir le caoi cheart a chur ar an áras cónaithe ionas go dtagann feabhas ar chaighdeán an tsaoil acu. Téann an láithreoir, Baz Ashmawy, agus an fhoireann saineolaithe i mbun oibre chun athchóiriú a thabhairt ar thithe theaghlaigh agus athrú chun feabhais a chur ar a gcás. NUA: Beyond The Menu Cuireann cócaire na ngradam, Mark Moriarty, an tsraith rí-spéisiúil seo i láthair ina bhfeictear a bhfuil ar siúl taobh thiar de dhoras na cistine i mbialanna atá á rith ag roinnt de na príomhchócairí is mó iomrá in Éirinn. NUA: Goodbye House Feictear sa tsraith seo daoine as gach réimse den saol agus as gach cuid d’Éirinn agus iad ag díol an tí ag súil le tús a chur le ré nua. NUA: The Test As Corcaigh go Dún na nGall agus as Luimneach trasna lár tíre go Baile Átha Cliath agus go Cill Mhantáin, feicfear gach cor agus casadh a bhíonn le cur díobh ag foghlaimeoirí tiomána agus iad ag ullmhú don scrúdú tiomána. NUA: Cat Hospital Suite i measc an duilliúir i nGleann Maghair, gar do Chathair Chorcaí, tá an t-aon ospidéal tréidliachta speisialta amháin in Éirinn atá dírithe ar aire don chat. Bíonn na ceamaraí dírithe ar Claire Meade agus ar an meitheal tréidlianna agus iad ag cur chóir leighis ar chait. Home Rescue, tá Róisín Murphy, ailtire, agus Peter Finn, tógálaí, ar ais leis an bhfoireann oibre chun sé cinn eile de thithe plúchta in Éirinn a thabhairt slán ón tranglam. NUA: Mary Black: Only a Woman Clár faisnéise ina ndéantar ceiliúradh ar bhean na n-amhrán. Donal’s Superfood in Minutes ina bhfeictear béilí folláine á réiteach ag an gcócaire Donal Skeehan. Big Week On The Farm: Harvest Beidh saol gnóthach an fheirmeora agus cúrsaí dúlra tráth an fhómhair le feiceáil. Ear to the Ground Beidh Ear to the Ground, clár mór-ráchairte RTÉ faoi ghnóthaí feirmeoireachta agus faoi chúrsaí tuaithe ar ais don 27ú séasúr i mí na Samhna. Cuirfidh na láithreoirí Helen Carroll, Darragh McCullough agus Ella McSweeney meascán siamsúil de scéalta spéisiúla as gach cuid den tír os ár gcomhair. NUA: Changing Ireland Spléachadh ar an tionchar a bhíonn ag Fiontraithe Sóisialta ar na daoine a gcuireann siad tionscadail ar bun chun cuidiú leo. SPÓRT Leanann craoladh beo ar chluichí CLG ar Spórt RTÉ i rith an fhómhair agus cuideofar le daoine dul i gcleachtadh ar ghiorrú an tráthnóna le Cluichí Ceannais Uile-Éireann sa pheil agus sa chamógaíocht agus le craoladh beo – den chéad uair – ar Chraobhchomórtas Uile-Éireann AIB na gClubanna níos faide amach i mí Meán Fómhair. Beidh spleodar i gceist le hócáid dheiridh Chraobhchomórtais na bliana 2018 le bronnadh Ghradaim All-Stars a chraolfar beo as an Ionad Comhdhála i mBaile Átha Cliath. Is cinnte go mbeidh neart suime á chur i gCraobh an Domhain san Iomramh le dhá lá de chraoladh beo as an Ostair i ndeireadh mhí Lúnasa agus beidh an-aird ar Sanita Puspure agus í ag féachaint le cur le héacht na bliana seo caite nuair a thug sí bonn óir léi. Mar chluiche ullmhúcháin roimh Chorn an Domhain sa Rugbaí, beidh Éire agus an Bhreatain Bheag ag imirt a chéile i Staid Aviva mar chuid de Shraith Samhraidh Guinness agus craolfar sin beo ar RTÉ mar a dhéanfar cluichí na hÉireann i gCorn na Sé Náisiún 2020 i Rugbaí na mBan i rith an earraigh. Beidh cluichí cáilithe na bhfear agus na mban do chraobhchomórtas na hEorpa go mór chun tosaigh maidir le cluichí sacair i rith an fhómhair. Den chéad uair riamh, tá craoladh beo á dhéanamh ar RTÉ ar fheachtas cluichí cáilíochta fhoireann sacair mhná Phoblacht na hÉireann agus iad ag féachaint le himirt den chéad uair riamh i gcraobhchomórtas mór sa bhliain 2021. Sna cluichí cáilithe maidir le Corn UEFA na hEorpa 2021, beidh foireann Phoblacht na hÉireann ag imirt Mhontainéagró i Staid Thamhlachta Dé Máirt, an 3 Meán Fómhair agus ag imirt na hÚcráine Dé Máirt, an 8 Deireadh Fómhair. Beidh Cluichí Cáilithe UEFA maidir le Euro 2020 a imreoidh foireann Phoblacht na hÉireann in aghaidh na hEilvéise (Déardaoin, an 5 Meán Fómhair), na Seoirsia (Dé Sathairn, an 12 Deireadh Fómhair), na hEilvéise (Dé Máirt, an 15 Deireadh Fómhair) agus na Danmhairge (Dé Luain, an 18 Samhain) á gcraoladh beo chomh maith. Beidh cluichí na ngrúpaí i Sraith Curadh UEFA ar ais i mí Meán Fómhair chomh maith le buaic-chluichí dheireadh an tséasúir i bPríomhroinn Shraith SSE Airtricity agus na Cluichí Ceannais i gCorn FAI na bhFear agus na mBan as Staid Aviva. Craolfaidh RTÉ cluichí cáilithe fhoireann na hÉireann i haca na mban do na Cluichí Oilimpeacha as Baile Átha Cliath i mí na Samhna, Craobh na hEorpa sa reathaíocht trastíre agus, den chéad uair, craobh na hEorpa sa snámh gearrchúrsa as Glaschú. Leantar leis an Rásaíocht Chapall beo le Deireadh Seachtaine na gCuradh i mí Meán Fómhair, Féile an Gheimhridh as Tigh na Sióg i mí na Nollag agus Féile na Nollag as Baile na Lobhar. Tréaslófar a gcuid éachtaí le mná agus fir spóirt na hÉireann le Gradaim Spóirt RTÉ agus craolfar ócáid a mbronnta beo ar RTÉ One ar an 14 Nollaig. Beidh The Geansaí ar ais le sraith trí chlár ag díriú ar phobal an spóirt in Éirinn agus a gcuid scéalta – ár gCluichí, ár bPaisean, ár Scéalta. RTÉ MAIDIR LEIS AN AERÁID Tá athrú aeráide ar cheann de na cora dúshlánacha is mó a chuirtear roimh an nglúin atá ag teacht chun cinn in Éirinn. Caithfidh RTÉ seachtain iomlán le cláir fiosrúcháin, imeachtaí speisialta agus díospóireacht ar an gceist chinniúnach seo nach mór a réiteach. An dara seachtain de mhí na Samhna, déanfar scrúdú soiléir práinneach le RTÉ maidir leis an Aeráid ar an athrú aeráide mar atá ag tarlú faoi láthair, seachas a cheapadh leis an am atá ag teacht amháin, agus féachfar le réiteach na ndeacrachtaí a scrúdú. Beidh an tseachtain speisialta ar siúl ar fud ardáin teilifíse agus raidió RTÉ, an RTÉ Player, RTÉ.ie agus na meáin shóisialta. Beidh Tionól na nÓg á eagrú freisin mar chuid de RTÉ maidir leis an Aeráid – ócáid do dhaoine óga, á heagrú i gcomhar idir RTÉ agus Tithe an Oireachtais, de chineál nár tharla riamh cheana le daoine óga i mbun díospóireachta i seomra na Dála. Nuacht RTÉ Agus é deimhnithe ag na Náisiúin Aontaithe go raibh mí Iúil 2019 ar an mí ba theo riamh de réir na dtaifead, téann Paul Cunningham go dtí an Ciorcal Artach go dtugann cuairt ar bhaile Ilulissat le cósta Bhá Disko in iarthar na Graonlainne. Déanfaidh an Cuinneagánach an tionchar atá ag an athrú aeráide ar an Láithreán Oidhreachta Domhanda seo de chuid UNESCO ón gcuairt dheireanach a thug sé ann ina Chomhfhreagraí Timpeallachta dó sa bhliain 2006. Tá de rún ag 2fm, stáisiún ceoil raidió RTÉ do dhaoine óga fuaimrian a chur ar fáil mar ábhar tionlacain le Tionól na nÓg maidir le cúrsaí Aeráide, le meascán d’agallaimh agus de cheol ar FM agus ar na meáin dhigiteacha trí shruth dhigiteach raidió dar teideal Generation 2 a chruthú ar feadh na seachtaine. Agus nuair atá cead cainte á thabhairt do dhaoine óga i nDáil Éireann ar an 15 Samhain, bí cinnte go gcloisfear go leor daoine óga ag teacht i láthair go láidir lena gcuid tuairimí ar 2fm roimh an lá mór. Baineann Gerald Fleming úsáid as grafaicí 3D in Will Ireland Survive 2050? chun an tionchar tromchúiseach a bheadh ag pátrúin antoisceacha drochaimsire ar fud an domhain ar an tír seo a léiriú. News2day Díreofar ar aon scoil amháin in aghaidh na seachtaine ar an aon chlár nuachta teilifíse do leanaí bunscoile a chraoltar gach lá. Beifear ag díriú ar Thionól na nÓg chomh maith. Déanfaidh RnaG agus Nuacht comhléiriú ar shraith de mhíreanna gearra ina dtugann daoine a rinne athrú/rud amháin nó a bhfuil rún acu aon athrú amháin a dhéanamh mar gheall ar a dtuiscint ar chúrsaí aeráide fianaise go pearsanta maidir leis an athrú sin. Beidh cúig cinn de chláir podchraolta 20 nóiméad an ceann á gcur ar fáil ag an Green Team ar RTÉjr agusbeidh an fear feachtais 16 bliana d’aois, James Dunne, ina threoraí acu agus iad ag tabhairt faoi cheisteanna éagsúla maidir le truailliú na farraige, fuinneamh ó fhoinsí inathnuaite, modhanna ina mbeadh scoileanna níos éadroime ar an timpeallacht agus réimsí eile. Beidh Tara Stewart ina láithreoir ar chlár podchraolta faoi chúrsaí faisin a chuirfear ar fáil mar chuid de shraith nua cláracha podchraolta arna léiriú os comhair lucht féachana beo sa stiúideo i rith Sheachtain Aeráide RTÉ. Clár faisnéise faoi Flossie Donnelly, duine óg 12 bliana d’aois as Baile Átha Cliath atá tugtha don ábhar dramhaíola agus don ábhar plaistigh ar na tránna i nDún Laoghaire, gar dá háit cónaithe, a ghlanadh atá in My Story: The Beach Cleaner. NA hEALAÍONA NUA: We Need to Talk About Ross Clár faisnéise spórtúil lán léargais faoi Paul Howard, an té a cheap carachtar Ross O’Carroll-Kelly. Tá sé, de réir an Irish Times, chun tosaigh ar dhaoine eile de lucht an aoir in Éirinn agus de réir an Irish Independent ar dhuine de na scríbhneoirí is greannmhaire sa tír. Féachtar sa chlár faisnéise le léargas a thabhairt ar intinn chasta bhisiúil an scríbhneora. NUA: Wonder Walls: An Irish Street Art Story Clár faisnéise ina bhféachtar ar an athrú atá faoin réimse seo de shaol na healaíne in Éirinn agus ar an athrú dá réir ar a bhfuil i gceist leis an ealaín do mhuintir na tíre. NUA: Garech Browne Last Days at Luggala Marbhna atá sa scannán seo maidir le duine de na daoine is mó a rinne pátrúnacht ar chúrsaí ealaíne le tamall fada anuas; fear aislinge agus féile, fear diabhlaíochta agus galántachta nach raibh saor ón uile locht. D’fhág bás tobann Garech de Brún sa bhliain 2018 mant i saol an chultúir in Éirinn. The Works Presents Sraith de chúig chlár nua ina mbuaileann John Kelly le pearsaí mór le rá i saol na healaíne in Éirinn. Tugann na daoine seo den aos dána léargas i rith a gcuid cainte le John ar an gcúis atá acu lena gcuid saothair a dhéanamh agus ar a gcuid modhanna oibre. Cíorann John leo na nithe a spreagann ábhar an tsaothair agus an díocas chun oibre iontu. NUA: David Brophy’s Unsung Heroes. Tar éis chomh maith agus a d’éirigh lena chuid bearta athchruthaitheachta le The Choir of Ages agus The High Hopes Choir, tá an stiúrthóir ceoil David Brophy ar ais ag cur cúramaithe na tíre ar ardán. CREIDEAMH NUA: All Walks of Life Tugann an t-iar-Uachtarán, Máire Mhic Giolla Íosa, daoine iomráiteacha ar thurais spioradálta le roinnt de na bealaí oilithreachta is seanda scéimhiúla in Éirinn. Siúlann Máire Slí Chaoimhín i gCill Mhantáin le Amy Huberman, aisteoir agus údar; go Mám Éan i gConamara le Joe Canning, iománaí agus Slí Fheichín i gContae na hIarmhí leis an Aire Helen McEntee. NUA: Feictear sraith d’agallaimh a rinne an Dr Paul D’Alton, Síceolaí Cliniciúil, le daoine a tháinig trí thráma de chineálacha éagsúla ar Survivors. RAIDIÓ NUA: Documentary on One: Reprisals Ríomhtar scéal drámatúil in Reprisals faoi shaol gairid agus bás tragóideach Eileen Quinn i nDeisceart na Gaillimhe, in aois a 24 bliana di, i rith cheann de na míonna ab fhuiltí de Chogadh na Saoirse. NUA: Documentary on One: Benjy the Little Gay Bull I rith na bliana 2014, craoladh tuairisc faoi tharbh beag i gContae Mhaigh Eo ar an Nine O’Clock News. Cúig bhliana dár gcionn, is beag a chloistear faoi Benjy níos mó. Fiosraíonn Documentary on One an maireann Benjy, an tarbh aerach, agus cén saol a bhí ag an Charolais cáiliúil ó shin i leith. (TX an 31 Lúnasa) NUA: Documentary on One: Brendan Behan in Paris Foilsítear ábhar cartlainne agus agallaimh sa chlár faisnéise seo faoin tréimhse a chaith Breandán Ó Beacháin i bPáras i ndeireadh na 1940idí agus i dtús na 1950idí. Tá neamhaird déanta de na blianta sin i saol an Bheachánaigh go dtí seo. Thug an saol i bPáras misneach don Bheachánach tabhairt faoi shaothar níos dána nach mbíodh an fonn céanna air go dtí sin é a chur i láthair in Éirinn. The RTÉ Radio 1 Folk Awards: Beidh The RTÉ Radio 1 Folk Awards ar ais i Vicar St. i mBaile Átha Cliath an 25 Deireadh Fómhair agus ceiliúradh á dhéanamh ag RTÉ ar an gceangal tréan atá idir ceol na ndaoine agus an tír seo. John Creedon agus Ruth Smith na láithreoirí. The RTÉ Radio 1 Short Story Competition in honour of Francis MacManus: Modh tábhachtach ag scríbhneoirí nua atá ag teacht chun cinn a gcuid saothar a chur os comhair an phobail ó cuireadh an comórtas ar bun sa bhliain 1986, bíonn aird go fada fairsing ar an ábhar a chuireann scríbhneoirí óga na hÉireann i láthair. Drama on One Séasúr an Fhómhair 2019 Beidh saothar nua téagartha, i nGaeilge agus i mBéarla, le cloisteáil i rith Shéasúr an Fhómhair de Drama on One. Craolfar drámaí nua don raidió le Darach Mac Con Iomaire, Philip Davison, Caitríona Ní Mhurchú, Janet Moran, Peter Sirr agus Roger Gregg. Dráma grinn dátheangach, bunaithe ar scéal fírinne faoi thráth ar beag nár tarraingíodh go Hollywood agus ar scáileáin na bpictiúrlann í, atá in I’m Scarlettle Caitríona Ní Mhurchú, scríbhneoir/aisteoir. Tamall de bhlianta ó shin, roghnaíodh Caitríona i bpáirt Scarlett O’Hara nuair a bhí athleagan den scannán Gone With The Wind le léiriú. Ríomhtar an scéal méaldráma faoinar tharla in I’m Scarlett. A Holy Show le Janet Moran: Is athchóiriú A Holy Show ar an dráma grinn le Janet Moran a raibh oiread tóir ag an lucht féachana air ar stáitse na hamharclainne. Pléitear go greannmhar corraitheach le scéal fírinne atá bunaithe ar eachtra a tharla sa bhliain 1981 nuair a ghabh iar-mhanach d’Ord na dTrapach eitleán de chuid Aer Lingus gan d’arm aige ach buidéal uisce. Bhí sé ag iarraidh ar an bPápa fios Tríú Rún Fatima a scaoileadh leis. Beidh saothar nua le Darach Mac Con Iomaire, scríbhneoir/stiúrthóir an tsraith drámaíochta clúiteach ‘Corp Agus Anam’ ar TG4 le cloisteáil mar chuid d’ábhar an tséasúir. Craolfar an dráma nua dá chuidsean, ‘Go Scara an Bás Sinn’, chomh maith le Tubesle Gary Mitchell, Eureka Dunesle Philip Davison, Krakowle Peter Sirr agus leagan raidió de From the River of Ghosts leis an scríbhneoir/aisteoir/ceoltóir ildánach, Roger Gregg. 2FM Xmas Ball Is breá le 2FM agus MCD a fhógairt go mbeidh The 2FM Xmas Ball ar ais arís, le Picture This ar na príomhoirfidigh, sa 3Arena, Dé Sathairn, an 21 Nollaig 2019. Ar mhaithe le Cumann na hÉireann um Chosaint Leanaí an ócáid agus bailíodh beagnach €500,000 anuraidh. Studio 8 gig with Dermot Kennedy Coirm cheoil speisialta de chuid 2fm Studio 8 mar cheiliúradh ar an stiúideo cáiliúil sin, le buaiteoir 2fm Rising 2018 a bhfuil cáil dhomhanda i ndán dó. SEAT 2FM Rising Tour: Tá 12 oirfideach iontach ceoil de chuid na hÉireann a tharraing aird mhór orthu féin i rith na bliana ar liosta ‘2FM Rising’ 2019 a eagraítear i gcomhar le SEAT. Sula bhfógraítear liosta na bliana 2020, tugtar camchuairt chuig 3 ionad le roinnt de cheoltóirí liosta na bliana 2019. Oíche an Chultúir: Tá RTÉ ag obair i gcomhar le hOíche an Chultúir arís chun coirmeacha ceoil agus ócáidí eile a chur ar fáil i rith na hoíche. Beidh an cheolchoirm chlúiteach saor in aisce amuigh faoin aer á craoladh beo arís ar RTÉ Radio 1 as Cearnóg an Chléirigh in Ard-Mhúsaem na hÉireann – Na hEalaíona Maisiúla & an Stair, Dún Uí Choileáin le hoíche siamsaíochta don teaghlach lena mbainfidh meascán breá den cheol, den bhéal beo agus den damhsa in éineacht le Ceolfhoireann Coirme RTÉ. Orthu sin a bheidh páirteach, tá an banna Aslan, an t-amhránaí hip hop Jafaris, agus Banna Céilí Chill Fhionnúrach, an t-amhránaí opera Celine Byrne, agus cuid mhór eile. DAOINE ÓGA Cuirfear siamsaíocht ar fáil do lucht féachana daoine óga RTÉ2 leis an dara sraith de Donncha’s Two Talented, clár, á chur i láthair ag Donncha O’Callaghan, a mbíonn an-tóir air. Is clár nua ar RTÉJr é Body Brothers ina míníonn beirt deartháireacha fiosracha atá an-tógtha leis an damhsa – Lords of Strut – an chaoi a n-oibríonn colainn an duine. Ar an gclár Ace My Space téann Seán Treacy agus MC, a bhfuil an-cháil orthu ar YouTube, ar fud na hÉireann ag bualadh le leanaí atá an-tugtha do ghné éigin den saol agus tugtar seans dóibh cuma nua a chur ar a seomra codlata bunaithe ar an ábhar dúspéise sin. Tir na nÓg: Tar ar thuras draíochtúil tríd an ngeata ceilte sa ghairdín go Tír na nÓg. Taistil tríd an gcoill álainn le Clíona Ní Chiosáin agus í do do threorú ar aistear an iontais le hamhráin, cluichí agus scéalta i nGaeilge. Living With a Fairy Series 2 An dara sraith de na heachtraí spraíúla leis an tsíog. Tá Niamh, col ceathrar Jay, i gcruachás nuair a phléascann an cócaireán atá aici agus caithfidh sí teacht ina cónaí le Jay ina theach beag. Critters.tv Sceitseanna grinn ina bhfuil ábhar beochana 2D i gcumasc le scannánaíocht bhreá den dúlra ionas go dtugtar dearcadh an ainmhí ar chláir faisnéise faoin dúlra. I’m Starting Secondary School: Feictear Doria atá aon bhliain déag d’aois agus í ag fágáil na bunscoile ina diaidh agus ag tosú amach ar an meánscolaíocht. Sherriff Street Salmon Téann Jake, 12, as Sráid an tSirriam i lár chathair Bhaile Átha Cliath chuig an ionad pobail áitiúil beagnach gach uile lá. An samhraidh seo beidh deis ag Jake agus roinnt leanaí eile ón ionad pobail sin dul ar thuras an iontais – ag iascach bradán i Delphi, Co. Mhaigh Eo. Ar na cláir a bheidh ar ais arís, tá: Today With Maura and Daithí,: Dancing With The Stars: The Late Late Show; The Late Late Toy Show; The Ray D’Arcy Show; Home of the Year; Winning Streak; Eurovision Song Contest; Rose of Tralee; Up for the Match; Operation Transformation; Home of the Year; Ireland’s Rich List; The An Post Irish Book Awards; 10 Things to Know, Eco Eye; How to be Good With Money; Mrs Brown’s Boys, cláir speisialta don Nollaig agus don Bhliain Nua; Line of Duty; The Works Presents; Winning Streak; Pat Shortt’s Music on D’Telly; Eastenders; The Tommy Tiernan Show; RTÉ Investigates; Claire Byrne Live; The Week in Politics; Line of Duty; Mr Mercedes; Homeland |