Sceideal leasaithe RTÉ Radio 1 ó Luan go hAoine seolta go hoifigiúil Beidh sceideal nua na gclár beo ar an aer ó Dé Luain an 10 Samhain

Clár nua Today with David McCullagh ón 9 r.n. Oliver Callan le clár nua níos faide ón 11 r.n. go dtí an 1 i.n. Kieran Cuddihy a chuirfidh Liveline i láthair Louise Duffy le clár ceoil agus siamsaíochta ón 3 i.n. Clár leasaithe Drivetime le Katie Hannon agus Colm Ó Mongáin ón 4 i.n. Clár nua spóirt Inside Sport ag a 6 i.n. gach lá Nasc le híomhánna nua Is é Dé Luain, an 10 Samhain lá na preibe maidir le sceideal nua RTÉ Radio 1 ar laethanta na seachtaine.Le haird ar an saol a chaitheann lucht éisteachta agus réimsí spéise mhuintir na hÉireann, leagtar amach an sceideal nua chun freastal don bhreis agus milliún duine de lucht éisteachta atá ag RTÉ Radio 1. Ag trácht di ar an athrú, dúirt Tara Campbell, Ceannasaí RTÉ Radio 1: “Beidh glórtha nua agus comhrá géarchúiseach le cloisteáil ar fud an sceidil nua clár. Tá láithreoirí nua, cláir nua agus athrú ar thráthanna craolta i gceist gan aon athrú ón mbéim a bhíonn ag RTÉ Radio 1 ar iriseoireacht iontaofa agus ar shiamsaíocht den scoth.” Tosóidh an clár nua Today with David McCullagh ag a 9 r.n. gach maidin ó Luan go

hAoine. Oibreoidh David ar a bhealach cumasach, grinn, oilte ag dul go croí na ceiste maidir le scéalta móra an lae agus cora nua i gcúrsaí de réir mar a thiteann siad amach, chomh maith le gnémhíreanna speisialta faoi réimsí éagsúla, comhairle ar thomhaltóirí, sláinte agus folláine, ceol, cultúr, eolaíocht agus teicneolaíocht ina measc. Le hathrú go tráth craolta nua ag 11 r.n., beidh a dhá oiread spraoi ó Oliver Callan le dhá uair a chloig siamsaíochta, measctha ar ndóigh lena chuid tráchtaireachta lán léargais agus an greann a bhfuil cáil i bhfad is i gcóngar ar Oliver mar gheall. Pléifidh Oliver an t-ábhar cainte is deireanaí maidir le cúrsaí spóirt, cultúir agus ceoil – agus gach gné de chúrsaí an tsaoil is cás leis an lucht éisteachta ar fud na tíre, agus ar ndóigh bainfidh sé craic dá chuid féin as an bplé. Beidh News at One, ceann de na cláir nuachta is mó a mbíonn iontaoibh as agus is mó a mbíonn aird air, á chur i láthair i gcónaí ag Rachael English am lóin gach lá, le meascán de scéalta móra náisiúnta, réigiúnacha agus idirnáisiúnta an lae le tuairiscí beo, agallaimh, anailís ar chúrsaí polaitíochta agus tráchtaireacht ó shaineolaithe. Beidh cluas ag Kieran Cuddihy le glaonna ón bpobal ar Liveline ón 1.45 i.n. gach lá ag dul go cnámh sa phlé ar na ceisteanna atá ag cur isteach ar mhuintir na hÉireann dáiríre. Le 40 bliain anuas, tá Liveline i lár an aonaigh ag lucht cur agus cúitimh in Éirinn agus é ar an gclár is tábhachtaí i gcónaí maidir le haird ar dhaoine agus deis cainte ag an bpobal. Déanfaidh Kieran áis do na héisteoirí maidir le tuairimí, ábhar buartha agus scéalta a chur in iúl de réir mar a leanann RTÉ Radio 1 den chlár seanbhunaithe seo a chur i gcóir d’Éireannaigh an lae inniu. Le ceol beo, ábhar siamsaíochta agus comhrá nach gcloistear in aon áit eile, beidh Louise Duffy ar an aer ón 3 i.n. gach lá ag cur an lucht éisteachta ar a suaimhneas agus ar a gcompord ag tosú amach ar an tráthnóna. Beidh meascán bríomhar ar chlár nua aon uair a chloig Louise den cheol beo, d’aíonna sa stiúideo agus d’ábhar breá siamsaíochta, agus tarlóidh neart rudaí gan choinne leo freisin. Beidh Drivetime ag athrú go tráth craolta níos luaithe ag 4 i.n. leis na láithreoirí nua, Katie Hannon agus Colm Ó Mongáin ag coinneáil comhluadair leis na héisteoirí le scéalta móra an lae, anailís saineolais agus plé domhain ar chúrsaí nuachta, polaitíochta, siamsaíochta agus cultúir. Clár nua ar fad ón 6 i.n. é Inside Sport á chur i láthair ag Jacqui Hurley agus Marie Crowe, clár spóirt luath sa tráthnóna ar a gcloisfear an nuacht is deireanaí, tuairimí roimh agus tar éis cluichí, tuairiscí beo agus tuiscint ón taobh istigh ó aíonna agus ó thráchtairí. Leanann Arena agus The John Creedon Show i gceartlár sceideal RTÉ Radio 1 i rith na seachtaine, comhartha ar sheasamh RTÉ le cúrsaí ealaíne. Beidh láithreoir nua á fhógairt maidir le Arena tar éis an drochscéal faoi bhás ár gcomhghleacaí Seán Rocks. Leanfar freisin d’agallaimh agus d’anailís dhomhain ar scéalta nua polaitíochta a chur ar fáil ar Late Debate arna chur i láthair ag Cormac Ó hEadhra. Tiocfaidh deireadh le cláir an lae le Late Date, ceol agus comhluadar dóibh siúd atá fós ina ndúiseacht. Leanfar d’ábhar plé agus machnaimh an lae a leagan amach ar Morning Ireland leis na scéalta nuachta is deireanaí ón 7 r.n., agallaimh faoi cheisteanna doimhne agus plé

lán léargais ar na scéalta atá ag dul i bhfeidhm in Éirinn agus ar fud an domhain.Beidh láithreoirí nua do chláracha nuachta ar an raidió á bhfógairt ag Nuacht & Cúrsaí Reatha RTÉ i rith na seachtainí seo amach romhainn. RTÉ Radio 1 an rogha stáisiúin ag daoine fásta 35–54 ar fud na tíre agus an t-aon stáisiún raidió náisiúnta a tharraingíonn níos mó ná 1 mhilliún duine de lucht éisteachta. Beidh glórtha nua le cloisteáil ar an sceideal nua ag an stáisiún raidió is mó a bhfuil muinín as leis na deich gcinn de chláir is mó lucht éisteachta in Éirinn. Is é dúthracht RTÉ maidir le hiriseoireacht iontaofa agus fónamh don phobal bun agus barr sceideal nua na gclár ó Luan go hAoine ionas go gcinntítear go bhfuil nuacht chruinn bheacht ar fáil don lucht éisteachta de réir mar a thiteann sí amach, chomh maith le hanailís saineolais, siamsaíocht agus scéalaíocht ó phríomhstáisiún raidió na hÉireann atá ag teacht go cóir agus go cuí leis an saol a chaitheann na daoine.