Tá an cultúr agus an teaghlach i gcroílár chlár taistil nua RTÉ

BackStory ina leantar ceathrar Éireannach óga agus iad ag taisteal ar ais go tíortha dúchais a dtuismitheoirí

Tá féiniúlacht chomhaimseartha na hÉireann á saibhriú ag cultúir agus tionchair éagsúla ar fud an domhain. I gclár nua RTÉ, BackStory, a chraolfar Dé Luain an 8 Meitheamh ag 8.30pm ar RTÉ One agus RTÉ Player, leanfar ceathrar Éireannach óga, ar tháinig a dtuismitheoirí ar imirce chun na hÉireann, agus iad ag taisteal chuig tíortha dúchais a dtuismitheoirí. Thar ceithre chlár, rachaidh na daoine óga agus a dtuismitheoirí chuig an tSiombáib, an Mholdóiv, Peiriú agus Srí Lanca, agus fiosróidh siad cultúr agus traidisiúin a dteaghlaigh, á dtabhairt níos gaire dá dtuismitheoirí agus ag foghlaim tuilleadh fúthu féin ar an mbealach.

I gclár 1 rachaidh an t-amhránaí-scríbhneoir atá 30 bliain d’aois, Siobhan McClean – a thugann Shiv uirthi féin – ag taisteal lena máthair, Tambu, chuig an tSiombáib, áit a raibh Shiv ina cónaí go dtí go raibh sí cúig bliana d’aois, nuair a bhog an teaghlach go Baile Átha Í, Co. Chill Dara. Tá aithne uirthi as tús a chur le seó mór Lana Del Rey i mBaile Átha Cliath in 2023, agus beidh ceangal aici lena teaghlach arís sa tSiombáib. Trí bhia, ceol, teanga agus cultúr, aimseoidh sí arís na ceangail mhothúchánacha atá aici leis an tír inar rugadh í.

Sa dara clár, fillfidh an dornálaí gairmiúil Victor Rabei, atá 32 bhliain d’aois as Baile Átha Cliath, ar an Mholdóiv lena mháthair Rodica chun ceangal a dhéanamh lena dteaghlach arís agus stair chasta na tíre agus a n-oidhreacht a fhiosrú. Bhog siad ón Mholdóiv go hÉirinn sna 2000idí nuair a bhí Victor naoi mbliana d’aois. Agus é ag filleadh ar an Mholdóiv, foghlaimeoidh Victor faoin tionchar buan a bhí ag an ré Shóivéadach ar an tír, an ailtireacht agus na daoine. Agus lorg a mháthar á leanúint aige, gheobhaidh sé níos mó amach faoin áit arb as dó agus déanfaidh sé machnamh ar an mbaint atá aige sin le saol an lae inniu.

I gclár 3, rachaidh an dearthóir grafaicí Patrick Kelleher atá 30 bliain d’aois as Maigh Nuad, Co. Chill Dara agus a mháthair Patty go Lima i bPeiriú chun a oidhreacht a fhiosrú, ó shráideanna gnóthacha go tírdhreacha áille na nAindéas. Foghlaimeoidh Patrick níos mó faoina athair Éireannach, a fuair bás ach a raibh tionchar buan dearfach aige ar an bpobal áitiúil ina raibh sé ag fanacht i bPeiriú. Tá an-tionchar aige sin ar Patrick, agus é féin agus a mháthair ag dul i ngleic le brón cé go bhfuil siad ag féachaint chun cinn go dearfach chomh maith.

Sa gceathrú clár, an clár deiridh, fillfidh mac léinn leighis, Mindulee Seneviratne, atá 23 bliana d’aois, ar Shrí Lanca lena hathair Ramesh chun margaí sráide bríomhara Colombo, Cathair Naofa Kandy, agus tírdhreacha flúirseacha an oileáin theochriosaigh seo a fhiosrú. Bhog Ramesh go hÉirinn os cionn 20 bliain ó shin agus thóg sé a chlann i Loch Garman. Bhí Mindulee ina Miss Wexford tráth, agus bhí sí san iomaíocht le haghaidh Miss Ireland, áit ar chaith sí sáirí chun a cultúr a thaispeáint. Tá sí i mbun scrúduithe leighis faoi láthair in Ollscoil Luimnigh. Agus í ag filleadh ar Shrí Lanca, tá fonn uirthi tuilleadh a fháil amach faoi theaghlach a hathar, chomh maith leis an damhsa agus cócaireacht thraidisiúnta a thriail. Éiríonn an ceangal atá aici lena lena hathair Ramesh níos láidre fiú ar an turas seo.

Don cheathrar óg, is turas é seo nach ndéantar ach uair sa saol agus iad ag filleadh ar na háiteanna ar thosaigh a gcuid scéalta.

Craolfar an chéad chláir de BackStory Dé Luain an 8 Bealtaine ar RTÉ One agus RTÉ Player ag 8.30pm.

-CRÍOCH-

Kate Smyth, Ceannasaí Cumarsáide RTÉ