Sraith nua podchraoltaí RTÉ Ramble á hóstáil ag an bhfear grinn Joe McGucken
Tá podchraoladh nua RTÉ, Ramble with Joe McGucken, á sheoladh inniu (Déardaoin an 25 Meitheamh), sraith comhráite fiosracha ina rachaidh an t-aisteoir, scríbhneoir agus fear grinn, Joe McGucken, ar thuras leis na héisteoirí chun bualadh le daoine iontacha ó gach cearn d’Éirinn.
Sa tsraith podchraoltaí agallaimh seo, rachaidh Joe McGucken, gan cáilíocht de chineál ar bith aige, ar fud na hÉireann, ag bualadh le haíonna spéisiúla ina n-áit féin. Is cuma an réalta mór le rá nó cultas gan leictreachas ná fóntais phoiblí atá iontu, is é an t-aon rud atá ar aire Joe ná scéal maith a chloisteáil, mar sin d’fhéadfaí aon rud beo a phlé.
Dúirt óstach an phodchraolta, Joe McGucken: “Tá sceitimíní orm Ramble a eisiúint, ach táim cineál neirbhíseach freisin. Bhí mé ag iarraidh atmaisféar an phodchraolta a leagan anuas sa gcéad eipeasóid. Is é bun agus barr an phodchraolta seo scéalta ó imeall na sochaí a insint. Scéalta nach gcloistear in aon áit eile. Níl mórán níos imeallaí ná dornálaíocht gan na hailt a chlúdach, rud atá in aghaidh an dlí in Éirinn mar a tharlaíonn sé. Toisc gur ábhar chomh míchuibheasach sin atá ann, is cinnte go mbeidh conspóid i gceist, roinnt de na daoine a bhfuil baint acu leis ina measc. Ach nílim ag iarraidh a bheith gríosaitheach díreach ar mhaithe lena bheith gríosaitheach. Níl uaim ach labhairt le daoine spéisiúla agus deis a thabhairt d’éisteoirí léargas a fháil ar réimsí éagsúla den tsochaí. Táimid ar fad beagán fiosrach, tá an claonadh sin ó nádúr ionainn. Agus ní iriseoir mé… Is duine thar a bheith fiosrach mé!”
Beidh an chéad dá eipeasóid de Ramble with Joe McGucken ar fáil ón lá inniu ar aghaidh. Sa gcéad eipeasóid, rachaidh Joe go Club Dornálaíochta Chromghlinne chun píosa cainte a bheith aige leis an dornálaí Johnny Jawbreaker. Bhíodh John Redmond ina throdaí ealaíon comhraic measctha tráth le Bellator agus na Cage Warriors, agus anois téann sé san iomaíocht san Bare Knuckle Fighting Championship (BKFC). Déantar neamhaird den ghnáthchaint spóirt sa gcéad eipeasóid chun léargas neamhbhalbh a fháil ar fhírinne an tsaoil a bhaineann le bheith ag troid mar shlí beatha.
Sa dara eipeasóid, tabharfaidh Joe cuairt ar Barcelona chun bualadh le leaid Éireannach atá ag triail an ceann is fearr a fháil ar ICE sna Stáit Aontaithe trí dhocsáil. Chruthaigh ‘Dominick Skinner’ bunachar sonraí ina nochtar os cionn 4,000 gníomhaire ICE. Labhróidh sé san agallamh chomh maith faoin uair a bhí sé gan dídean in Éirinn agus é ina dhéagóir, nuair a fuair sé sólás ó chineáltas strainséirí agus nuair a d’fhág sé Éire ar deireadh d’fhonn saol níos fearr a dhéanamh dó féin.
Dúirt Ceannasaí Podchraoltóireachta RTÉ, Hugh Ormond: “Ba mhór an tarraingt dúinn go raibh Joe an-mhaith ag aimsiú scéalta agus go raibh meon ar leith aige faoin saol, agus b’in na cúiseanna ar shocraigh rannóg podchraoltóireachta nua RTÉ a chéad sraith coimisiúnaithe de phodchraoltaí a dhéanamh leis. Tabharfaidh Ramble an lucht éisteachta ar thuras iontach de réir mar a bheidh an tsraith ag forbairt agus tá ríméad orm gur féidir linn í a dhéanamh le Joe.”
Beidh eipeasóidí nua de Ramble with Joe McGucken ar fáil gach Déardaoin agus beidh eipeasóid bhreise ann gach Máirt. Éist le Ramble anois ar rte.ie/podcasts nó cibé áit a bhfaigheann tú do chuid podchraoltaí: https://www.rte.ie/radio/podcasts/series/45216-ramble-with-joe-mcgucken/
CRÍOCH
Sarah Neville, Ceannasaí Cumarsáide, RTÉ