Lucht féachana líonmhar ag Corn an Domhain FIFA ar fud ardáin uile RTÉ

Lucht féachana líonmhar ag Corn an Domhain FIFA ar fud ardáin uile RTÉ

9.2 milliún sruth ar RTÉ Player idir an 11 agus an 28 Meitheamh

Aird 2.9 milliún de lucht féachana i rith chéim na nGrúpaí de Chorn an Domhain FIFA ar RTÉ2

Breathnaíodh ar fhíseáin 23 milliún uair ar ardáin meán sóisialta RTÉ

Is mór an tóir a bhí ag lucht leanúna an tsacair ar fud na hÉireann ar chluichí Chorn an Domhain FIFA agus lucht féachana líonmhar á mhealladh ag craoladh beo RTÉ ar RTÉ2, ar RTÉ Player agus ar líne. Tá RTÉ, an craoltóir oifigiúil in Éirinn, ar cheann de líon beag craoltóirí seirbhíse poiblí atá á chur i láthair saor ó tháille ar ardáin teilifíse, raidió agus dhigiteacha, ionas go gcinntítear gur féidir leis an lucht féachana agus éisteachta in Éirinn coinneáil suas leis an aicsean de réir mar a oireann dóibh féin.

Idir 11–28 Meitheamh, tapaíodh 9.2 milliún sruth maidir le cluichí i gCorn an Domhain FIFA arna gcraoladh ar RTÉ Player, líon níos airde cheana féin ná iomlán na sruthanna a tapaíodh le linn Chorn an Domhain FIFA 2022. I rith na tréimhse céanna, bhí aird 1-nóiméad 2.9 milliún duine faoi leith ar chluichí Chorn an Domhain FIFA ar RTÉ2 agus RTÉ2+1.

Ba é an cluiche ba shuntasaí go dtí seo an ceann idir Sasana agus an Chróit ar an 17 Meitheamh, le meánlíon lucht féachana 615,000 duine ar an teilifís, figiúr a chiallaíonn aird 51% dá raibh ag faire teilifíse ag an am ag breathnú ar RTÉ2. Tharraing an cluiche céanna lucht féachana den suntas ar RTÉ Player, le 404,000 sruth, an cluiche is mó ar tapaíodh sruthanna lena aghaidh sa chomórtas seo go fóill.

Ar na cluichí eile a tharraing líon mór, áirítear Sasana v Gána le líon measta 500,000 de lucht féachana agus aird 43% den lucht féachana teilifíse ar RTÉ2, chomh maith le 334,000 sruth ar RTÉ Player, agus Meicsiceo v an Afraic Theas a tharraing 484,000 de lucht féachana agus aird 41% den lucht féachana teilifíse ar RTÉ2 chomh maith le 364,000 sruth ar RTÉ Player. Bhí lucht féachana mór ag faire ar na cluichí uilig i rith chéim na nGrúpaí ina raibh tíortha móra an spóirt páirteach, ina measc an Fhrainc, an Ísiltír, an Bheilg, an Ghearmáin agus Sasana.

Ar Spórt RTÉ Ar Líne agus ar chainéil Spórt RTÉ ar na meáin shóisialta, breathnaíodh ar 23 milliún físeán go dtí seo ar na hardáin sin go léir. Tugtar san áireamh leis sin níos mó ná 4 mhilliún uair ar breathnaíodh ar bhuaicphointí imeartha agus ábhar anailíse ar leathanach YouTube Spórt RTÉ.

Ar RTÉ Radio 1, tá Marie Crowe agus Jacqui Hurley ag cur gach cuid den aicsean as Meiriceá Thuaidh i láthair ar Inside Sport agus bíonn ábhar anailíse agus scéalta nuachta ón gcomórtas á bplé ar Saturday Sport agus Sunday Sport.

Fanann beirt aisteoirí ó The Young Offenders, Dominic MacHale agus Shane Casey ina suí ar feadh na hoíche leis an aicsean uilig a tharlaíonn i rith na gcluichí móra a chur i láthair do lucht féachana Up All Night. Bíonn an vodchraoladh sin beo ar RTÉ Radio Player ar RTÉ Player ar maidin agus daoine aitheanta go leor in éineacht leis an mbeirt láithreoirí sa stiúideo i gCorcaigh. Craoltar an seó gach lá ar RTÉ2 freisin sula dtosaíonn an craoladh beo ar Chorn an Domhain FIFA. Leanann Raf Diallo freisin d’ábhar nuachta agus léargais is deireanaí ón dream tuairimíochta agus tráchtaireachta, in Éirinn agus ar an láthair thall i Meiriceá Thuaidh, a chur ar fáil don lucht éisteachta ar an RTÉ Soccer Podcast.

Tá tús anois leis na babhtaí díbeartha agus lucht féachana ollmhór á mhealladh i gcónaí ag Corn an Domhain FIFA de réir mar atá súil agus cluas á coinneáil ag lucht leanúna an spóirt in Éirinn ar ghéire na hiomaíochta agus ar spleodar an chomórtais.

Is é Heineken 0.0 urraitheoir nua craolacháin Chorn an Domhain FIFA 2026 ar RTÉ.

CRÍOCH

Tá breis eolais le fáil ó: Caoilinn Putti