Cearta eisiacha saorchraoltóireachta ar Chorn an Domhain FIFA 2030 deimhnithe ag RTÉ

Cearta eisiacha saorchraoltóireachta ar Chorn an Domhain FIFA 2030 deimhnithe ag RTÉ

Bhí buaiclíon nua sruthanna ar an RTÉ Player ar Chluiche Ceannais Chorn an Domhain FIFA atá le háireamh anois ar an gclár lenar ceanglaíodh an líon sruthanna is mó riamh ar an ardán sin.

Bhí níos mó ná 1 mhilliún duine ag faire beo ar RTÉ2 nuair a bhí an Spáinn buacach i gCorn an Domhain FIFA 2026

Tar éis a fheabhas a d’éirigh le craoladh RTÉ ar sheirbhísí teilifíse, srutha, raidió agus ar ardáin dhigiteacha, d’fhógair RTÉ gur deimhníodh cearta eisiacha saorchraoltóireachta ar an aer in Éirinn ar Chorn an Domhain FIFA 2030, a bheidh á eagrú ar fud na Spáinne, na Portaingéile agus Mharacó chomh maithe le trí cinn de chluichí a imirt i Meiriceá Theas mar cheiliúradh ar chomóradh céad bliain de Chorn an Domhain.

Bhí súile agus cluasa le RTÉ ag lucht leanúna an tsacair ar fud na hÉireann nuair a fuair an Spáinn an ceann is fearr ar an Airgintín ionas gurb iadsan curaidh Chorn an Domhain FIFA 2026.

Tharraing an cluiche ceannais níos mó ná 1.4 milliún sruth ar an RTÉ Player agus é sin le háireamh anois ar an gclár lenar ceanglaíodh an líon is mó riamh sruthanna ar an ardán sin. Ar feadh an chomórtais ar fad, rinne an lucht féachana 23.4 milliún sruth. Is ionann sin agus ardú beagnach 15 milliún ar líon na sruthanna agus méadú beagnach faoi thrí ar an líon lucht féachana a tarraingíodh le linn Chorn an Domhain FIFA 2022 nuair a taifeadadh 8.5 milliún sruth.

Ba iad na cluichí is mó a tharraing aird i rith an chomórtais an Spáinn agus an Airgintín (meánlíon lucht féachana 1 mhilliún, sciar 65% ar RTÉ2, agus 1.4 milliún sruth ar an RTÉ Player), Sasana agus an Airgintín (meánlíon lucht féachana 949k, sciar 60% ar RTÉ2 agus 1 mhilliún sruth ar an RTÉ Player) an Fhrainc agus an Spáinn (meánlíon lucht féachana 873k, sciar 61% ar RTÉ2, agus 1 mhilliún sruth ar an RTÉ Player) agus Sasana agus an Iorua (meánlíon lucht féachana 787k, sciar 72% ar RTÉ2, agus 1 mhilliún sruth ar an RTÉ Player).

Dúirt Kevin Bakhurst, Príomh-Stiúrthóir RTÉ:

“Is cúis ríméid againn gur éirigh le RTÉ cearta do Chorn an Domhain FIFA 2030 a dheimhniú don lucht féachana in Éirinn tar éis éirí chomh maith le Corn an Domhain 2026 agus buaiclíon nua daoine ag baint taitneamh as seirbhísí RTÉ.

Ón gcluiche tosaigh go dtí an cluiche ceannais, bhí na sluaite ag tapú an ábhair craoltóireachta agus anailíse a chuir RTÉ ar fáil maidir le gach uile chluiche agus ag tarraingt chucu freisin buaicphointí chluichí Chorn an Domhain a cuireadh ar fáil ar an

RTÉ Player agus YouTube, ábhar podchraolta RTÉ, Up All Night ar an RTÉ Player agus go leor eile.

Tá an líon ollmhór sruthanna ar an RTÉ Player i rith an chomórtais le háireamh ar dhea-scéalta móra na bliana againn agus is maith an teist sin ar an bhfiúntas a bhaineann leis an infheistíocht sa tseirbhís sin le tamall de bhlianta anuas. Tá RTÉ ag tnúth leis an gcéad chomórtas Corn an Domhain FIFA a chur ar fáil don lucht féachana in Éirinn, ag tosú le feachtas cáiliúcháin fhoireann Phoblacht na hÉireann ar bhreá linn uilig dea-thoradh a bheith air.

Spórt á shaorchraoladh beo ar an aer – bíonn ábhar spreagtha agus cainte i gcónaí ann ag an tír ar fad, ábhar suilt agus siamsa ag an lucht féachana agus éisteachta in Éirinn – agus é ar fáil a bhuíochas den Táille Ceadúnais, den chistíocht phoiblí agus den ioncam tráchtála.”

Is éard a dúirt Declan McBennett, Grúpcheannasaí Spóirt, RTÉ:

“Lá faoi leith a bhí sa lá inné ag Spórt RTÉ, Cluiche Ceannais Chraobh na hÉireann san Iománaíocht agus Cluiche Ceannais Chorn an Domhain FIFA 2026 ar an lá céanna, lá iontach de chluichí á gcur ar fáil beo don lucht féachana agus éisteachta. Ní raibh ansin ach lá amháin de mhí faoi leith maidir le craoltóireacht spóirt arbh gné amháin é den chraoladh ba leitheadaí fós ag RTÉ ar Chorn an Domhain FIFA agus gach cluiche den 104 cluiche a imríodh á gcur i láthair le dearcadh leithleasach na hÉireann.

Is léir ón gcaoi ar tapaíodh gach deis ar an teilifís, ar an RTÉ Player, ar ardáin dhigiteacha agus ar na meáin shóisialta go bhfuil an dúil chéanna sa spórt beo i gcónaí ag muintir na hÉireann. Tá RTÉ ag tnúth le himeachtaí móra spóirt a chur i láthair an lucht féachana agus éisteachta i rith na mblianta atá romhainn mar chuid de shainchúram seirbhíse poiblí RTÉ, Corn an Domhain FIFA 2030 san áireamh.”

Breathnaíodh ar na físeáin 91 milliún uair ar na hardáin meán sóisialta ar fad i rith Chorn an Domhain, ar Spórt RTÉ Ar Líne agus cainéil meán sóisialta Spórt RTÉ le chéile. Tugtar san áireamh leis sin 6.8 milliún uair ar breathnaíodh ar ábhar buaicphointí agus anailíse ar chainéal YouTube Spórt RTÉ.

Mar gheall gur mall san oíche nó amach san anmhaidin a bhí cuid mhór cluichí á n-imirt, ceanglaíodh 1.6m sruth maidir le buaicphointí ar an RTÉ Player, agus bhí ábhar eile maidir le Corn an Domhain FIFA, eachtraí suntasacha a chuaigh gan iomrá ar dtús agus Up All Night ina measc, ba chúis le 345k sruth sa bhreis ar an méid sin ar an ardán céanna.

Chomh maith leis an gcraoladh teilifíse agus an t-ábhar a cuireadh ar fáil ar na meáin dhigiteacha, bhí na scéalta ba nua agus ábhar tuairimíochta agus anailíse mar gheall ar an gcomórtas ar fáil ag lucht leanúna an tsacair ar Inside Sport, Saturday Sport agus

Sunday Sport ar RTÉ Radio 1, chomh maith le trácht go leitheadach ar a raibh ag tarlú ar fud chláracha RTÉ Radio 1 agus RTÉ 2FM i rith an chomórtais.

Bhí RTÉ, craoltóir oifigiúil Chorn an Domhain FIFA in Éirinn, ar cheann de líon beag comhlachtaí meán cumarsáide seirbhíse poiblí, a rinne saorchraoltóireacht chuimsitheach ar an aer ar an gcomórtas ar an teilifís, ar an raidió agus ar ardáin dhigiteacha ionas gur cinntíodh gurbh fhéidir le gach duine den lucht féachana agus éisteachta súil a choinneáil ar a raibh ag tarlú, agus cluas a thabhairt dá raibh dá rá faoi, tráth ar mhian leo sin agus san áit a bhí oiriúnach dóibh.

Heineken 0.0 atá ag déanamh urraíochta ar Chorn Domhanda FIFA.

CRÍOCH

Tá breis eolais le fáil ó: Caoilinn Putti | Caoilinn.putti@rte.ie

Nótaí d’Eagarthóirí

Figiúirí teilifíse – TAM Ireland/Nielsen Figiúirí RTÉ Player – Piano Analytics

Meánlíon Lucht Féachana Déantar an meánlíon lucht féachana a ríomh bunaithe ar mheánlíon an lucht féachana a bhíonn ag faire ar feadh thráth an chláir. Sciar Céatadán d’iomlán na ndaoine sa lucht féachana i rith tréimhse áirithe ama.