In Time an chéad bheathaisnéis scannánaíochta maidir le Dónal Lunny, duine de na ceoltóirí is mó a chuaigh i gcion ar cheol na hÉireann lena linn. Léirítear sa scannán an lorg atá fágtha aige ar cheol agus ar chultúr na hÉireann, cion tairbhe chomh mór go ndeir Bono faoi gurb é “Ireland’s answer to Quincy Jones” atá ann. Bhain Lunny ó thús le trí cinn de na bannaí comhaimseartha is mó a chuaigh i gcionn maidir le ceol traidiúnta agus ceol tíre na hÉireann le 60 bliain anuas: Planxty, The Bothy Band, agus Moving Hearts. Leis na bannaí sin, agus lena chuid oibre ina léiritheoir agus ina chomhcheoltóir le hamhránaithe agus bannaí éagsúla, ina measc Elvis Costello, U2, Van Morrison, Sinéad O’Connor, Paul Brady, Baaba Maal agus Kate Bush, chuir sé ceol traidisiúnta agus ceol tíre na hÉireann os comhair lucht éisteachta ar fud an domhain agus spreag beocht nua i dtraidisiún a bhí ag dul i léig go mór.
Léirítear sa scannán a shaol pearsanta agus a shaol cruthaitheachta i gcomhthéacs athruithe cultúir, polaitíochta agus sóisialta na linne. Feictear agallaimh le Dónal féin, agus le Christy Moore, Paddy Glackin, Andy Irvine, Zoë Conway, Méabh Ní Bheaglaoich agus eile, chomh maith le hábhar seanma neamhchoitianta nó nua-léirithe, an t-am ar tháinig sé le chéile arís le duine eile a chuir Planxty ar bun, a sheanchara dílis Christy Moore, san áireamh. Ag labhairt di faoin gclár, deir Nuala O’Connor, stiúrthóir: “Tarlaíonn ó am go chéile go ndéantar fírinne den aisling agus b’amhlaidh domsa sa bhliain 2024 nuair a d’éirigh liom scannán a dhéanamh faoi Dhónal Lunny agus faoin éirim atá ann, rud ba mhian liom a dhéanamh leis na blianta fada. Féachtar sa scannán le cuntas a thabhairt ar shaol agus ar shaothar faoi leith an ealaíontóra seo agus tá súil agam go dtugtar sin i gcrích.” Beidh In Time le feiceáil Dé Luain, an 10 Lúnasa, ag 9.35 i.n. ar RTÉ One agus ar RTÉ Player.
-CRÍOCH-
Dáta: Déardaoin an 06 Lúnasa 2026
Tuilleadh eolais: Kate Smyth, Ceannasaí Cumarsáide RTÉ:
