Clár Éire Ildánach agus RTÉ ag seoladh an Chomórtais, This is Art!
Glaoimid ar na hEalaíontóirí Óga ar fad de gach Cumas!
Catagóirí aoise cuimsitheacha, duaiseanna iontacha
www.rte.ie/thisisart | www.thisisart.ie
Tá RTÉ agus Clár Éire Ildánach tagtha le chéile i gcomhpháirtíocht arís chun This is Art! a chruthú, mar a d’fhógair Ryan Tubridy ar an Late Late Toy Show. This is Art! – ceiliúradh ar na hamharcealaíona trí chomórtas nua ealaíne ar líne a chruthú atá dírithe ar dhaoine óga ar oileán na hÉireann.
Tugann This is Art! cuireadh d’ealaíontóirí óga, 18 mbliana d’aois agus níos óige, ina n-aonar nó i ngrúpaí, píosa ealaíne a chruthú a thaispeánfar i ndánlann ealaíne ar líne do na glúnta atá le teacht. Agus é sin á dhéanamh, cuirfidh an comórtas cleachtadh ealaíne i measc daoine óga chun cinn agus tabharfaidh sé tacaíocht dóibh a gcruthaitheacht, úrnuacht agus féinléiriú a spreagadh.
Conas a oibríonn sé.
Tá an comórtas oscailte do dhaoine óga de gach cumas, a bhfuil cónaí orthu ar oileán na hÉireann agus cuimsítear gach disciplín amharcealaíon ann.
Tá 5 chatagóir ann:
· Aoisghrúpa 7 agus níos óige
· Aoisghrúpa 8 – 11
· Aoisghrúpa 12 – 15
· Aoisghrúpa 16 – 18
· Catagóir do ghrúpaí
Chun páirt a ghlacadh mar dhuine aonair nó mar ghrúpa, bí cruthaitheach trí phíosa úrnua amharcealaíon a dhéanamh agus grianghraf de a uaslódáil ar líne. Ansin cuirfear an saothar ealaíne isteach sa chomórtas agus déanfaidh painéal neamhspleách moltóirí athbhreithniú air
Taispeánfar an saothar ealaíne ansin i ndánlann ealaíne ildaite ar www.rte.ie/thisisart.
Dúirt an tAire Turasóireachta, Cultúir, Ealaíon, Gaeltachta, Spóirt agus Meán, Catherine Martin T.D.: “Ceann de na príomhchuspóirí atá ag an gClár Éire Ildánach a chinntiú go mbeidh an deis ag leanaí agus daoine óga a lánacmhainneacht chruthaitheach a bhaint amach. Bíonn muid ag lorg agus ag tacú le cláir chruthaitheacha a spreagann agus a athraíonn na daoine óga ar nós This Is Art!, clár a cheiliúrann tallann na ndaoine óga go léir atá ag iarraidh iad féin a chur in iúl trí amharcealaíona. Ba mhaith liom buíochas a ghabháil leis an bhfoireann sa gClár do Dhaoine Óga de chuid RTÉ as ardán samhlaíochta mar sin a chruthú dár leanaí. Nuair a cuireadh an cheist Cad is Ealaín ann? thug siad saoirse dár ndaoine óga ealaín a chruthú ar a dtéarmaí féin agus ligean dá gcuid samhlaíochta méadú. “
Na duaiseanna
· Gradam Grand Prix: Roghnófar cúigear ealaíontóirí óga, ceann as gach catagóir, chun an chéad Ghradam Grand Prix This is Art! a fháil; dealbh coimisiúnaithe go speisialta ón amharcealaíontóir Vera Klute RHA;
· Moltaí: Gheobhaidh 30 saothar thar gach catagóir Teastais Mholta chomh maith le dearbháin duaise d’ábhair ealaíne agus déanfar athbhreithniú gairmiúil ar a gcuid oibre;
· Sparánachtaí do Ghrúpaí: Bronnfar trí Sparánacht do Ghrúpaí, ar luach €2,000 an ceann iad, trína n-éascóidh ealaíontóirí gairmiúla eispéireas ealaíne do scoil nó do ghrúpa;
· Eile: Bronnfar duaiseanna sparánachta le haghaidh gearrchúrsaí san NCAD agus i gColáiste Ealaíne & Deartha Crawford, dearbháin d’ábhair ealaíne agus dearbháin do threalamh digiteach.
Na dátaí
· Fáilteofar roimh iontrálacha ar líne ó Dé hAoine an 27 Samhain 2020.
· Is é an dáta deiridh d’iarratais Dé hAoine an 15 Eanáir 2021.
· Fógrófar buaiteoirí agus bronnfar duaiseanna ag deireadh Eanáir 2021.
Cárbh as ar tháinig an smaoineamh?
I mbliana bhí sé thar a bheith deacair dóibh siúd atá ag obair i dtionscail na healaíne agus na cruthaitheachta, agus in ainneoin srianta leanúnacha agus dianghlasáil ar fud an oileáin, bhí Roinn Daoine Óga de chuid RTÉ agus Clár Éire Ildánach ag iarraidh tionscnamh cruthaitheach a chur ar fáil a dhéanfadh ceiliúradh sofheicthe ar ealaín de gach sórt agus a nascfadh páistí agus daoine fásta ar leibhéal uile-oileáin, díreach mar a bhí déanta cheana acu i gcomhar le Cruinniú na nÓg. Is é This is Art! an tionscnamh sin.
Dar le Suzanne Kelly, Ceannasaí ar Ábhar do Leanaí agus Daoine Óga, RTÉ: “Tá an-áthas ar RTÉ, trínár Roinn Daoine Óga, dul i gcomhpháirtíocht le Clár Éire Ildánach maidir le This Is Art!, an tionscadal nua spreagúil ealaíne digiteach atá ar bun againn. Tá sé de chumas ag ealaín daoine a aontú agus ag an am céanna an domhan a líonadh le háilleacht. Faoi láthair, tá an dá rud seo níos tábhachtaí ná bhí riamh. Is éard atá thar a bheith speisialta faoin tionscadal seo go ndéanfar an rannpháirtíocht agus an gailearaí den saothar deiridh go léir a óstáil ar líne ag rte.ie/thisisart, ionas go mbeidh an ealaín infheicthe agus ar fáil do gach duine. Tá an-áthas ar RTÉ agus ar Éire Ildánach a bheith in ann an t-ardán seo a chur ar fáil do na healaíontóirí go léir amuigh ansin ar oileán na hÉireann agus táimid ar bís bhur saothar ealaíne a fháil! ”
Sular seoladh This is Art! bhí an Roinn Daoine Óga de chuid RTÉ gnóthach ag cruthú sraith gearrscannán ‘ealaíne’ a bhí ag lorg freagraí ar an gceist ‘Cad is Ealaín ann?” Sna scannáin seo, insíonn ealaíontóirí óga as gach cearn d’Éirinn dúinn faoin gcineál oibre a dhéanann siad, cad a spreagann iad dul i mbun cruthaitheachta agus an méid a chiallaíonn ealaín dóibhsean.
An méid a dúirt cuid de na páistí.
· Abu Baker (8): Is maith liom pictiúir a tharraingt mar airím bródúil. Cuireann sé áthas orm go dtaitníonn mo chuid oibre le daoine. Mura gceapann tú go mbeidh do phictiúr go maith, ar a laghad déanann tú iarracht agus má leanann tú ort ag déanamh iarracht ansin beidh sé an-mhaith. Tá go leor spraoi san ealaín!
· Hannah (11): Péinteálann muid go léir ar bhealaí éagsúla; Péinteálaim le mo bhéal ach is féidir leat péinteáil le do lámh nó fiú le do chos, ná bíodh imní ort faoi na rudaí a deir daoine eile, bí tú féin agus tú ag péinteáil agus bain sult as.
· Noah (9): Is maith liom ealaín mhínéata a dhéanamh. Taispeánann sé go bhfuilim spraíúil agus is féidir le mo chuid ealaíne gliondar a chur ar dhaoine eile.
· Adam (7): Níl aon rialacha leis an ealaín mar is féidir leat do rogha rud dhéanamh.
· Zahra (13): Mothaím go bhfuil an ealaín suaimhneach; cuidíonn sí liom dearmad a dhéanamh ar gach rud eile timpeall orm. Ní mar a chéile aon bheirt ealaíontóirí; tá a gcuid bealaí beaga ar leith ag gach duine.
An méid a dúirt cuid de na moltóirí faoi This is Art!
· Joe Caslin – “Tá an ealaín tábhachtach do gach duine, is teanga í ina bhfuil tú in ann do chuid mothúchán nó an chaoi a bhfuil d’intinn a chur in iúl. Sílim go bhfuil sé thar a bheith tábhachtach go nglacann gach duine páirt san amharcealaíon. Is féidir leis an ealaín na rudaí tábhachtacha i do shaol agus na rudaí tábhachtacha atá thart ort a thaispeáint.”
· Fatti Burke – “Is léiriú í an ealaín, is cumarsáid í an ealaín, tá mothúcháin inti, tá tú ábalta tú féin a shaoradh leis an ealaín, tá sí spraíúil, tá an ealaín spóirtiúil, is bealach í chun tú féin a thaispeáint i ndáiríre.”
· Leanne McDonagh – “Is féidir leis an ealaín cabhrú le constaicí a bhriseadh síos agus deighiltí cultúir a shárú. Cé go bhfuil difríochtaí eadrainn ar fad, tá cosúlachtaí eadrainn freisin a nascann le chéile muid agus tá sé tábhachtach é sin a admháil. Is féidir leis an ealaín cabhrú linn tuiscint níos truachroíche a fháil ar a chéile. “
Tá tuilleadh eolais, sonraí agus téarmaí agus coinníollacha uile an chomórtais ar fáil ag www.rte.ie/thisisart agus www.thisisart.ie.
Chun tuilleadh eolais a fháil faoi Éire Ildánach, téigh chuig https://www.creativeireland.gov.ie/en/about/.
Tuilleadh Sleachta ó na moltóirí.
Tadhg Crowley – “Tugann an ealaín bealach tábhachtach dúinn chun smaoineamh agus cumarsáid a dhéanamh. Léiríonn sí áilleacht nó crá an tsaoil agus eispéiris agus smaointe an ealaíontóra ag tráth ar leith. Aimsigh bealach le bheith cruthaitheach a chuireann áthas ort! Agus anois agus arís cuir dúshlán romhat féin rud éigin nua a thriail, ábhair nua a úsáid, cuir chuige nua a thriail agus spraoi a bheith agat! “
Sarah McAuliffe – “Tá an ealaín suibiachtúil agus beidh sí suibiachtúil i gcónaí mar sin ní gá duit cloí le stíl ar leith; nó brath ar aon mheán ar leith; nó freagairt do leasanna agus do mhothúcháin lucht féachana áirithe. Lig duit féin a bheith spreagtha in áiteanna neamhghnácha – is minic a chruthaítear an ealaín is fearr as eispéiris neamhghnácha. Déan iarracht an rud neamhghnách a fheiceáil sa ghnáthrud. “
Clár Éire Ildánach
Is tionscnamh uile-bhunaithe de chuid an Rialtais é Clár Éire Ildánach a chuireann cruthaitheacht i gcroílár an bheartais phoiblí, agus atá deartha chun folláine aonair, pobail agus náisiúnta a chur chun cinn. Is é an bunsmaoineamh go gcuireann rannpháirtíocht i ngníomhaíochtaí cultúir an chruthaitheacht phearsanta agus comhchoiteann chun cinn agus go mbíonn torthaí suntasacha dá bharr sin maidir le folláine agus éacht an duine agus an phobail. Tá sé bunaithe ar chúig philéar: Acmhainneacht Chruthaitheach Gach Páiste a Chumasú; Cruthaitheacht a Chumasú i ngach Pobal; Infheistiú inár mBonneagar Cruthaitheach agus Cultúir; Éire mar Ionad Bairr Feabhais i Léiriú Meán; Ár gCáil Dhomhanda a aontú.
Is féidir tuilleadh eolais a fháil ag www.creativeireland.gov.ie/en/about/.