RTÉ chun deireadh a chur le tarchur DAB, beidh teacht fós ar sheirbhísí raidió digiteacha
Cuirfidh RTÉ deireadh le tarchur seirbhísí raidió ar an ngréasán Craolacháin Dhigitigh Fuaime (DAB) an 31 Márta i mbliana. Beidh teacht fós ar na seirbhísí raidió digiteacha a leanas – RTÉ Gold, RTÉ 2XM, RTÉ Radio 1 Extra, RTÉ Pulse, agus RTÉjr Radio.
Tá trí phríomhchúinse leis an gcinneadh deireadh a chur le tarchur DAB:
1) Úsáid an lucht éisteachta: De bharr an éilimh leanúnaigh atá ar raidió FM, chomh maith leis an mborradh atá tagtha ar éisteacht soghluaiste, ar éisteacht ar ghairis agus ar ghníomhachtúchán gutha is é DAB an t-ardán is lú a úsáidtear anois de na hardáin atá ar fáil do lucht éisteachta in Éirinn (féach thíos).
2) Rannpháirtíocht tionscail: Cé go raibh RTÉ ar thús cadhnaíochta maidir le DAB a thabhairt go hÉirinn in 2006 agus go bhfuil iarrachtaí leanúnacha déanta chun an táirge a fhorbairt ag leibhéal tionscail agus tomhaltóra araon, is é RTÉ fós an t-aon chraoltóir in Éirinn ar an gcóras DAB.
3) Bainistiú airgeadais: Bhí deireadh a chur leis an ngréasán DAB ar cheann de na bearta chun costais a sheachaint a áiríodh i Straitéis Leasaithe RTÉ 2020-2024 agus a foilsíodh i mí na Samhna 2019.
Tuairiscíodh sa tuarascáil JNLR is déanaí, Radio in a Digital World, a chuir Ipsos/ MRBI i dtoll a chéile, cé go bhfuil teacht ag 8% den daonra (330,000 duine) ar stáisiúin raidió trí bhealaí digiteacha, roghnaíonn an líon is lú de na daoine sin DAB.
De réir na tuarascála, éisteann díreach faoi bhun 5% de dhaoine fásta in Éirinn leis an raidió ar ghairis shoghluaiste, 2% ar ríomhaire pearsanta, tuairim is 1.5% ar challaire cliste, 0.6% ar an teilifís agus 0.5% ar DAB (Craolachán Digiteach Fuaime). Éisteann 77% de dhaoine fásta in Éirinn leis an raidió ar FM.
Mar gheall ar an luach a bhaineann an lucht éisteachta in Éirinn fós as seirbhísí raidió digiteacha RTÉ – RTÉ Gold, RTÉ Pulse, RTÉ 2XM, RTÉ Radio 1 Extra agus RTÉjr Radio – beidh teacht fós ar na stáisiúin sin.
Déanfaidh RTÉ i gcomhar le 2rn – a dhéanann gréasán tarchurtha craolacháin na hÉireann a chothabháil, a bhainistiú agus a fhorbairt do lucht craolta uile na tíre – deireadh eagraithe a chur leis an tSeirbhís DAB faoin 31 Márta 2021.
Ó Dé Máirt an 2 Márta, déanfaidh RTÉ feachtas faisnéise leathan don phobal a chomhordú ar fud seirbhísí teilifíse, raidió, ar líne agus ar na meáin shóisialta chun béim a chur ar dhúnadh an ghréasáin DAB agus chun eolas a thabhairt don lucht éisteachta faoi mar a bheidh siad ábalta leanúint de shásamh a bhaint as seirbhísí raidió digiteacha RTÉ. Reáchtálfar an feachtas go dtí go gcuirfear deireadh leis an tseirbhís DAB Dé Céadaoin an 31 Márta.
Is féidir sonraí maidir le mar a bheifear ábalta leanúint d’éisteacht le seirbhísí raidió digiteacha RTÉ a fháil ar www.rte.ie/keeplistening