Síneadh ar Chearta do Shraith Curadh UEFA ó 2021 go 2024
Fógartha ag RTÉ Cluiche Ceannais Shraith Curadh UEFA agus buaicphointí oíche Dé Máirt anois san áireamh le cearta beo oíche Dé Máirt
Tá sé fógartha ag RTÉ inniu go bhfuil síneadh ó 2021 go 2024 curtha ag an stáisiún ar na cearta atá aige do Shraith Curadh UEFA agus craolfar 16 cluiche beo oícheanta Dé Máirt chomh maith le Cluiche Ceannais Shraith Curadh UEFA agus buaicphointí oíche Dé Máirt. Leis an síneadh seo ar na cearta, cuirfear clúdach cuimsitheach ar fáil don lucht féachana mar go ndéanfar cúil agus buaicphointí gach cluiche a chraoladh gach oíche Dé Máirt. Beidh tarraingtí comórtais do na babhtaí grúpaí agus do na babhtaí díbeartha ar fáil freisin don lucht féachana mar chuid den chomhaontú.
Maidir leis an síneadh ar na cearta, dúirt Declan McBennett, Grúpcheanasaí Spóirt RTÉ: “Is den tábhacht i gcónaí, mar chuid de mhisean Spóirt RTÉ, an t-aicsean spóirt saorchraolta is fearr a chur ar fáil don lucht féachana in Éirinn. Tá Sraith Curadh UEFA aitheanta ar fud an domhain mar an príomhchomórtas clubanna lena roinntear imeachtaí den chéad scoth leis an lucht tacaíochta agus a chuireann réaltaí móra domhanda os comhair an phobail. Tá an-áthas orainn, ní hamháin go bhfuil RTÉ ag coinneáil na gceart do Shraith Curadh UEFA, ach go bhfuil síneadh á chur ar na cearta lena gcinnteofar go leanfaidh an lucht féachana in Éirinn ag baint sult as an gcomórtas ar chóras saorchraolta.
Dúirt McBennett freisin, “Tá caidreamh seanbhunaithe a bhfuil ardmheas air ag RTÉ Sport le UEFA agus le TEAM Marketing araon agus tá RTÉ ag súil cur leis an gcaidreamh sin. Cuireann na cearta fíorthábhachtacha seo, atá faighte ag RTÉ, go mór le punann spóirt an stáisiúin agus le spórt den chéad scoth a chur i láthair lucht féachana in Éirinn”.
Is éard a dúirt Guy-Laurent Epstein, Stiúrthóir Margaíochta UEFA faoi bhronnadh na gceart do Shraith Curadh UEFA: “Tá ríméad ar UEFA go bhfuiltear ag leanúint den chomhpháirtíocht sheanbhunaithe seo le RTÉ i bPoblacht na hÉireann don tréimhse 21-24. Cinntítear leis an athnuachan go leanfaidh lucht spéise sacair na hÉireann ag baint tairbhe as clúdach RTÉ ar scoth an tsacair club san Eoraip, clúdach atá ar ardchaighdeán.”
Cuirfidh an comhaontú is déanaí seo maidir le cearta craolta le príomhchearta saorchraolta RTÉ don bhliain 2021 lena n-áirítear na cearta a sealbhaíodh le déanaí ar Chraobh na Sé Náisiún chomh maith le cearta i leith Chraobhchomórtas Sacair na hEorpa UEFA, Cluichí Oilimpeacha Thóiceo, Craobhchomórtas CLG agus Craobhchomórtais Haca na hEorpa.