Cluichí Parailimpeacha Thóiceo 2020 ar RTÉ: An clúdach is cuimsithí go dtí seo
Beidh Spórt RTÉ ag filleadh ar Thóiceo do Chluichí Parailimpeacha 2020 agus beidh clúdach níos mó agus níos cuimsithí againn ná mar a bhí riamh roimhe seo ar an teilifís, ar raidió, ar RTÉ Player agus ar líne
De bharr chomh maith is a d’éirigh le Cluichí Oilimpeacha 2020 i dTóiceo beidh rogha anois ag lucht féachana agus éisteachta na hÉireann idir ceithre chainéal ar an RTÉ Player a bheidh ag craoladh beo i rith na hoíche ag an am céanna. Ina dhiaidh sin craolfar an t-aicsean, na tuairimí agus an anailís ar fad ar chlár beo RTÉ2 ar maidin, agus craolfar cláracha na mbuaicphointí le linn na mbuaicthráthanna gach oíche, ag tosú Dé Máirt an 24 Lúnasa.
Beidh Daráine Mulvihill ag cur aicsean beo i láthair ó Thóiceo gach maidin agus is í Evanne Ní Chuilinn a bheidh i gcathaoir an láithreora do na buaicphointí gach oíche. Le breis agus 70 uair an chloig de chlúdach beo agus de bhuaicphointí ar Theilifís RTÉ agus breis agus 400 uair an chloig de bheoshruthú ar an RTÉ Player, méadú faoi ocht a bheidh sa chlúdach a chuirfidh Spórt RTÉ ar fáil dá lucht féachana ar chlúdach na bliana 2016 i Rio.
Beidh foireann painéalaithe den scoth i dteannta Daráine and Evanne ar bhonn sealaíochta, lena n-áirítear an t-iriseoir spóirt Joanne O’Riordan; na lúthchleasaithe parailimpeacha Mark Rohan, Catherine Walsh, John Fulham, Darragh McDonald, Orla Barry, James Scully agus Paul Keogan; céad ‘Blade Runner’ na hÉireann, Alex Lee; chomh maith leis na lúthchleasaithe Oilimpeacha Natalya Coyle agus David Gillick.
Beidh Eamon Horan, Siobhan Madigan agus Darren Frehill ag tuairisciú ó Thóiceo do RTÉ2 agus don RTÉ Player, agus beidh siad ag tabhairt an eolais is deireanaí ar RTÉ Radio 1 chomh maith, lena n-áirítear ar Morning Ireland, Today with Claire Byrne; agus ar News At One.
Cuirfear clabhsúr le nuacht, tuairiscí agus aicsean an lae ó Thóiceo ar Game On ar RTÉ 2FM, agus beidh tuilleadh clúdaigh agus anailíse ar fáil ar Radio 1 ag an deireadh seachtaine, ar na cláracha Saturday Sport agus Sunday Sport. Cuirfear láithreán gréasáin tiomanta ar fáil ar RTÉ.ie/Sport le linn thréimhse na gCluichí Parailimpeacha, ar a mbeidh fáil ar nuacht, anailís, réamhfhéachaintí agus tuairiscí laethúla ó na Cluichí Parailimpeacha.
Caith súil ar an réamhfhógrán atá againn do na Cluichí Parailimpeacha chun blaiseadh a fháil ar a bhfuil i ndán.