Gradam Saoil le bronnadh ar Christy Moore le linn Ghradaim Ceoil Tíre RTÉ Radio 1
Gradam Saoil le bronnadh ar Christy Moore le linn Ghradaim Ceoil Tíre RTÉ Radio 1
Beidh imeacht na ngradam BEO in Vicar Street agus ar RTÉ Radio 1 Dé Máirt an 16 Samhain
Ticéid ar díol anois ar ticketmaster.ie | #rtefolkawards
Tá sé fógartha ag RTÉ inniu go mbronnfar Gradam Saoil ar Christy Moore le linn Ghradaim Ceoil Tíre RTÉ Radio 1 in Vicar Street, Baile Átha Cliath, Dé Máirt an 16 Samhain (8pm) agus craolfar na gradaim beo ar RTÉ Radio 1.
Is éard a dúirt Christy Moore agus é ag tagairt faoin nGradam Saoil: “Tá mo shaol caite agam agus mé sáite sa tóraíocht ar amhráin tíre agus bailéid. Is cuid thábhachtach de mo shaol é go bhfuilim fite fuaite i bpobal an cheoil tíre. Is mór an onóir dom é an gradam seo a fháil ó mo chuid piaraí, gradam a fhanfaidh i mo chuimhne agus a mbainfidh mé sásamh as go brách. Teastaíonn amhráin uainn, teastaíonn amhránaithe ó amhráin agus teastaíonn lucht éisteachta ó amhránaithe. Teastaíonn muid ar fad óna chéile.”
Ó tharla gurb é Christy buaiteoir Ghradam Saoil na bliana seo tabharfaidh sé faoin stáitse ag imeacht gradam na bliana seo in Vicar Street, i dteannta iarbhuaiteoirí an Ghradaim Steve Cooney (2020), Moya Brennan (2019) agus Andy Irvine (2018).
Níl aon dabht faoi ach go bhfuil Christy ar dhuine de na ceoltóirí agus amhránaithe is ansa agus is mó rath sa tír. Tá gairm dochreidte bainte amach aige ina thaibheoir le deich mbliana agus trí fichid anuas agus lucht leanúna ó ghlúnta éagsúla bainte amach aige, ní hamháin in Éirinn ach ar fud an domhain.
Is mór agus is dearfach an tionchar a bhí ag Christy Moore agus ag a chuid ceoil ar cheol agus ar chultúr na hÉireann agus tá teist na mblianta ar a cuid ceoil ó thús a ghairme ina chomhbhunaitheoir dó ar phéire de na bannaí is iomráití in Éirinn, Planxty agus Moving Hearts, go dtí a shárghairm ina ealaíontóir aonair le breis is dhá scór bliain. Is cinnte go mbíonn ticéid do chamchuairteanna Christy Moore díolta amach, fiú sa lá atá inniu ann, a bhuíochas sin dá chlú ina thaibheoir beo tarraingteach agus siamsúil.
Bhí Christy Moore i gcónaí dírithe ar amhráin i gcaitheamh a ghairme, a chuid amhrán féin agus na hamhráin sin ar fhág sé a lorg féin orthu, bheadh liosta na n-amhrán sin ró-fhada le lua ach chan sé iad ar fad le hionracas, macántacht, lena chroí agus lena anam, le héirim agus ina ghuth so-aitheanta.
Is ealaíontóir é Christy freisin a bhfuil an-ghean aige ar dhaoine nach bhfuil chomh maith as leis féin agus tá an-spéis aige i gcúrsaí éagóra a chur ina gceart. Trí go leor dá chuid amhrán féachann Christy guth a thabhairt dóibhsean nach bhfuil guth dá gcuid féin acu agus béim a leagan ar shaincheisteanna agus ar chúiseanna a bhfuil sé diongbháilte ina leith, anseo sa bhaile agus thar sáile, ag léiriú an chumhacht atá ag an ealaíontóir agus ag amhrán ina n-údar iontach maitheasa. Cruthaíonn sé scéalta iontacha ar leith, lán de thuiscint chomh maith le greann, a thugann léargas ar aistear na tíre agus a thugann cuireadh dúinn ar fad ár gcultúr a chomóradh chomh maith le gáire a dhéanamh fúinn féin.
Cé go bhfuil blianta fada caite aige i mbun an cheoil, níl cosúlacht ar bith ar an scéal go bhfuil Christy chun éirí as agus é ag leanúint d’amhráin a léiriú leis an gcionn agus leis an gceird chéanna ar mhaithe leis na mílte agus mílte lucht leanúna dílis atá aige ar mór acu gach nóta agus gach focal dá chuid.
Nach orainn atá an t-ádh é a bheith againn. Mar sin, i mbliana déanfaimid Christy Moore a cheiliúradh trí aitheantas oifigiúil a thabhairt dá chuid amhrán agus ceoil agus gach a bhfuil bronnta aige féin orainn, agus a bhfuil fós á bhronnadh aige orainn. Déanfar sin trí Ghradam Saoil Ghradaim Ceoil Tíre RTÉ Radio 1 a bhronnadh air.
Déanann Gradaim Ceoil Tíre RTÉ Radio 1 scoth an cheoil tíre in Éirinn le bliain anuas a cheiliúradh. Le linn an tsearmanais gradam, beidh taibhléirithe beo ó Christy Moore agus ó roinnt d’ainmnithe na bliana seo, agus dealraíonn sé gur oíche fíorspeisialta a bheidh ann, ar a ndéanfar ceiliúradh ar cheol agus ceoltóirí tíre na hÉireann, idir cheoltóirí cruthaithe agus cheoltóirí atá ag teacht chun chinn.
Tá ticéid ar díol anois do Ghradaim Ceoil Tíre RTÉ Radio 1 ar ticketmaster.ie | #rtefolkawards €28 atá na ticéid, lena n-áirítear táille áirithinte agus costais eile.
Beidh láithreoirí RTÉ John Creedon agus Ruth Smith ag filleadh ar Vicar Street i mBaile Átha Cliath chun an searmanas gradam a chur i láthair os comhair lucht féachana beo, tráth a mbeidh RTÉ ag déanamh ceiliúradh ar scoth cheol tíre na hÉireann le bliain anuas agus ag tabhairt aitheantais do mhórcheoltóirí tíre as Éirinn. Craolfar clár teilifíse ar RTÉ One Dé Sathairn an 20 Samhain chomh maith chun buaicphointí na hoíche a léiriú.
Bíodh an nuacht is déanaí agat maidir le Gradaim Ceoil Tíre RTÉ Radio 1 trí RTÉ agus RTÉ Radio 1 a leanúint ar Twitter, Facebook agus Instagram agus an haischlib #rtefolkawards a úsáid agus trí bheith ag éisteacht le RTÉ Radio 1.
Mura mbeidh tú in ann a bheith linn in Vicar Street Dé Máirt an 16 Samhain, éist leis an gclár beo ar RTÉ Radio 1 ag 8pm an tráthnóna sin, agus ná déan dearmad ar chlár teilifíse na mbuaicphointí ar RTÉ One Dé Sathairn an 20 Samhain.