Ainmnithe do Phearsa Spóirt na Bliana Ghradaim Spóirt RTÉ 2021 Fógartha
Cuirfidh Joanne Cantwell agus Darragh Maloney Gradaim Spóirt RTÉ 2021 i láthair Dé Sathairn an 18 Nollaig ar RTÉ One, lena dtabharfar ómós do ghaiscí réaltaí spóirt na hÉireann sa bhaile agus thar lear le linn bliain dhochreidte. Tugtar liosta de na daoine atá ainmnithe i mbliana do Phearsa Spóirt na Bliana RTÉ thíos, seisear as ochtar díobh ar mná iad, éacht nach bhfacthas riamh cheana.
AINMNITHE DO PHEARSA SPÓIRT NA BLIANA DON BHLIAIN 2021
CIAN LYNCH
Léirigh iománaí Luimnigh Cian Lynch a chuid scileanna den scoth agus a chumas scórála as cuimse arís le linn Chraobhchomórtas na bliana seo. D’éirigh leis an imreoir lár páirce as Tobar Phádraig sé phointe a chur thar an trasnán nuair a fuair Luimneach an ceann is fearr ar Chorcaigh i gcluiche cinntitheach a imríodh ar Pháirc an Chrócaigh. Bronnadh laoch na himeartha air i ndiaidh an chluiche sin de bharr a chuid imirt láidir cheannasach.
ELLEN KEANE
Bhain an Parashnámhaí Ellen Keane a céad bonn óir amach sna ceathrú Cluichí Parailimpeacha a ghlac sí páirt iontu. Ba é sin an chéad bhonn a bronnadh ar Éire le linn na gCluichí in Tóiceo. Bhain an snámhaí 26 bliain d’aois an bonn óir amach sa snámh brollaigh 100m SB8, an t-éacht snámha is fearr dá saol go dtí seo.
JASON SMYTH
Chuir Jason Smyth na hÉireann lena churiarracht dhochreidte ag na Cluichí Parailimpeacha ó tharla gur bhuaigh sé an bonn óir den séú uair i rás deiridh T13 100m drámatúil. Ba iad sin an ceathrú Cluichí Parailimpeacha aige, d’éirigh thar cionn roimhe seo leis sna Cluichí in Beijing, Londain agus in Rio, fótaichríoch amach is amach a bhí ann nuair a d’éirigh leis an rás a bhuachan agus gan ach 0.01 soicind idir é agus an té a tháinig sa dara háit. Rás é sin a chinntigh áit i measc réaltaí móra na gCluichí Parailimpeacha do Jason.
KATIE TAYLOR
Níor cloíodh an dornálaí éadrom-mheáchan Katie Taylor fós ó tharla gur éirigh léi greim a choinneáil ar a criosanna faoi dhó i mbliana. I dtús báire, chloígh sí a seanchéile comhraic Natasha Jonas ar phointí i Manchain ansin d’éirigh go héasca léi an ceann is fearr a fháil ar an Meiriceánach Jennifer
Han in Leeds. Tá troid amháin eile roimh an dornálaí as Bré in 2021, sin sula dtabharfaidh sí aghaidh ar Amanda Serrano in earrach na bliana seo chugainn, troid é sin a d’fhéadfadh a bheith ina shárthroid amach is amach.
KELLIE HARRINGTON
Tá ainm Kellie Harrington, an dornálaí as Rae Portland, greanta anois i stair na tíre a bhuíochas sin don éacht thar na bearta a bhain sí amach sa bhabhta ceannais éadrom-mheáchan i Tóiceo nuair a thug sí léi an bonn óir. Léirigh sí gur trodaí éirimiúil í ar an lá chun an bua a bhaint amach le cinneadh d’aon ghuth in aghaidh an churaidh dhomhanda Beatriz Ferreira ar lá deiridh na gCluichí.
LEONA MAGUIRE
Bhí an-chomórtas ag Leona Maguire nuair a ghlac sí páirt i gCorn Solheim den chéad uair. Bhain an Eoraip bua éachtach amach in aghaidh na Stát Aontaithe in Toledo chun an Corn a thabhairt leo. Fuair bean an Chabháin ceithre phointe go leith i gcúig chluiche nuair a fuair sí an ceann is fearr i gcluiche singil ar Jennifer Kupcho, curiarracht ó imreoir céad bhliana ar cheachtar den dá thaobh, rud a d’fhág go raibh go bua ag an Eoraip 15-13.
RACHAEL BLACKMORE
Bhain an marcach Seilge Náisiúnta, Rachael Blackmore, dhá churiarracht amach i mbliana. Bhí fíorsheachtain amach is amach aici le linn Fhéile Cheltenham nuair a bronnadh an ‘Marcach is Fearr’ uirthi, an chéad uair riamh ar bronnadh an duais ar bhean. Bhuaigh sí sé rás le linn an Fhéile, Corn Chliathrás Seaimpíní Cheltenham ar an gcapall Honeysuckle ina measc. Thug sí aghaidh ansin ar Aintree, áit arbh í an chéad marcach mná riamh í a bhua an Randox Grand National ar an gcapall Minella Times.
VIKKI WALL
Ainmníodh Vikki Wall na Mí ina hImreoir na Bliana Imreoirí 2021 i ndiaidh fíorimirt ar an ionsaí curtha di aici don Chontae Ríoga. Scóráil bean Dhún Búinne cúl agus sé phointe le linn an Chraobhchomórtais a chuidigh lena foireann Craobh Sinsir na hÉireann a bhaint amach den chéad uair riamh. Bronnadh ‘Laoch an Imeartha’ uirthi sa chluiche ceannais iontach in aghaidh Bhaile Átha Cliath.
Fógrófar na hainmnithe do Phearsa Spóirt Óg na Bliana RTÉ, Bainisteoir Spóirt na Bliana RTÉ agus Foireann Spóirt na Bliana RTÉ sna laethanta amach romhainn.