Bronntanas iontach na mbláthanna le fiosrú i sraith nua a thosóidh ar Lá Fhéile Vailintín ar RTÉ One
Déanfar ceiliúradh ar bhithéagsúlacht shaibhir na hÉireann sa tsraith Faoi Bhláth
Nochtfaidh an láithreoir Aedín Ní Thiarnaigh réimse saibhir de bhláthanna fiáine agus gheobhaidh amach faoin úsáid is féidir a bhaint astu sa chócaireacht, i gcúrsaí leighis agus i gceardaíocht.
Sa tsraith iontach nua seo a thosóidh anocht ar RTÉ One, tabharfaidh an láithreoir Aedín Ní Thiarnaigh camchuairt ar pháirceanna, lochanna, portaigh agus sléibhte na hÉireann chun an réimse saibhir de bhláthanna fiáine atá againn a nochtadh agus chun an seanchas a bhaineann leo mar aon leis an úsáid is féidir a bhaint astu sa chócaireacht, i gcúrsaí leighis agus sa cheardaíocht a fháil amach.
I ngach aon cheann de na heipeasóid sa tsraith nua 13 clár seo, a bheidh le craoladh gach tráthnóna Dé Luain ag 7.30pm ar RTÉ One, breathnóidh Aedín ar ghnáthóg éagsúil, lena n-áirítear fálta sceach, sléibhte, bruacha lochanna, portaigh agus móinéir agus tráchtfaidh ar chuid de na bláthanna atá faoi bhláth le linn a cuairte. Roinnfidh sí an seanchas agus na piseoga a bhaineann le gach bláth ón am atá caite agus rachaidh sí sa tóir freisin ar eolas faoi na húsáidí a mbaintí as na bláthanna sin fadó agus taispeánfaidh go bhfuil roinnt de na húsáidí agus an t-eolas sin fós ann sa lá atá inniu ann.
Tabharfaidh a turas ó lochanna Loch Coirib í chomh fada le fiántas Dhúiche Sheoigheach ar theorainn na Gaillimhe agus Mhaigh Eo agus síos ó dheas go dtí Leithinis an Daingin agus níos faide i gcéin.
Is saoririseoir agus craoltóir í Aedín Ní Thiarnaigh as Inis Córthaidh i gContae Loch Garman a bhfuil scaitheamh caite aici ag obair le TG4, RTÉ, BBC Gaeilge agus Nós.ie agus le gairid ag cur Faoi Bhláth i láthair ar léiriúchán é de chuid Abú Media. Is í a bhunaigh agus a dhéanann coimeád ar an gcuntas @BláthannaFiáine ar Instagram a bhfuil an-tóir air ina roinneann sí grianghraif agus an seanchas a bhaineann le bláthanna fiáine na hÉireann, ag díriú go háirithe ar an tsanasaíocht a bhaineann leo i dtaobh na Gaeilge. Tá breis is 5,500 lucht leanúna meallta aici lena físeáin ghearra ina roinneann sí fíricí spraíúla faoi bhláthanna dúchasacha.
Is éard a dúirt Aedín: ‘Níl aon phost eile ar domhan ab fhearr liom ná a bheith ag cur Faoi Bhláth i láthair. Thug sé deis dom cuairt a thabhairt ar roinnt de na háiteanna is áille in Éirinn agus aithne a chur ar roinnt de na daoine is spéisiúla dár casadh riamh orm le dul ag caint faoin ábhar is ansa liom; na bláthanna dúchais atá againn agus an seanchas a bhaineann leo.’
Craolfar Faoi Bhláth gach oíche Dé Luain ag 7.30pm ag tosú anocht an 14 Feabhra ar RTÉ One agus ar an RTÉ Player.
Is féidir breis eolais agus íomhánna a fháil ar presspack.rte.ie (RTÉ One, Seachtain 7)