Feachtas stairiúil Phoblacht na hÉireann ag Corn Domhanda FIFA na mBan 2023 le craoladh beo ar RTÉ
Na cearta don chomórtas ar fad san Astráil agus sa Nua-Shéalainn faighte ag RTÉ
Éire le haghaidh a thabhairt ar na hóstaigh, an Astráil, ar Cheanada agus ar an Nígir
Tar éis an bhua stairiúil a fuair siad sa chluiche cáilithe in aghaidh na hAlban, rachaidh foireann Phoblacht na hÉireann san iomaíocht den chéad uair riamh i gCorn Domhanda FIFA na mBan sa bhliain 2023 san Astráil agus sa Nua-Shéalainn, agus tá sé fógartha ag RTÉ inniu (Dé Luain an 24 Deireadh Fómhair 2022) go gcraolfaidh sé an comórtas ar fad an samhradh seo chugainn.
Rinneadh an tarraingt do na cluichí ceannais in Auckland Dé Sathairn, agus tarraingíodh Poblacht na hÉireann i nGrúpa B. Rachaidh foireann na hÉireann chun páirce leis an bhfoireann óstach, an Astráil, in Sydney (an 20 Iúil), imreoidh siad i gcoinne bhuaiteoirí an bhoinn óir sna Cluichí Oilimpeacha, Ceanada, in Perth (an 26 Iúil) agus tabharfaidh siad aghaidh ar an Nígir in Brisbane (an 31 Iúil).
D’éirigh le RTÉ na cearta craolta a fháil do Chorn Domhanda FIFA na mBan 2023 trí chomhaontú Aontas Craoltóireachta na hEorpa le FIFA a chlúdaíonn 28 críoch thar ceann 32 ball de EBU ar craoltóirí seirbhíse poiblí iad.
Tar éis fhoireann Phoblacht na hÉireann a leanúint fad a bhí siad i mbun feachtas cáilithe an-chorraitheach, feachtas ar éirigh leis ar deireadh, leanfaidh RTÉ go bródúil leis an tacaíocht atá á tabhairt aige d’fhoireann Vera Pauw tríd an aicsean ar fad ón Astráil a chur ar fáil do lucht leanúna spóirt in Éirinn saor go haer an samhradh seo chugainn.
Tá an tiomantas breise seo do pheil na mban ag leanúint chlúdach cuimsitheach RTÉ ar chluichí cáilithe Phoblacht na hÉireann, ach chomh maith leis sin, clúdach ar Chraobhchomórtas UEFA na hEorpa 2022 i Sasana an samhradh seo agus Corn Domhanda FIFA na mBan 2019 sa Fhrainc.
Is éard a dúirt Declan McBennet, Grúpcheannasaí Spóirt RTÉ: “Ó tharla go raibh muid i dteannta na foirne i rith an ama trí na babhtaí cáilithe, tá an-áthas orainn go mbeimid fós leo ag an gceann scríbe deiridh ag Corn Domhanda na mBan. Tá samhlaíocht na nglúnta sa bhaile spreagtha ag an bhfoireann seo agus níl amhras ar bith ach go bhfaighidh siad tacaíocht den scoth ó mhuintir na hÉireann san Astráil, rud a chuirfidh go mór leis an taithí a bheidh acu ag an gCorn Domhanda. Beidh Spórt RTÉ i láthair, ar raidió, ar teilifís agus ar líne, chun iarrachtaí an ghrúpa fíorspeisialta Éireannach seo, a bhfuil an-chumas sa spórt acu, a chur os comhair an phobail, le cinntiú go mbeimid uile in ann tacú le foireann náisiúnta na hÉireann.”
Fuair cluiche cáilithe na hÉireann don Chorn Domhanda in aghaidh na hAlban níos luaithe an mhí seo an lucht féachana teilifíse ba mhó riamh do shacar na mban, is é sin 382,000* breathnóir, agus bhí os cionn 126,000 sruth ar RTÉ Player le linn an fheachtais cáilithe.