Clúdach ar Chorn FIFA an Domhain 2022 seolta ag Spórt RTÉ

Clúdach ar Chorn FIFA an Domhain 2022 seolta ag Spórt RTÉ

Craolfar gach ceann den 64 cluiche beo ar RTÉ2, RTÉ Player agus ar RTÉ News Channel

Beagnach 200 uair an chloig de chlúdach ar an iomlán

Áirítear Shay Given, Richie Sadlier ar na painéalaithe agus Áine O’Gorman ar an bpainéal comhthráchtair

Tá sonraí maidir leis an gclúdach a bheidh RTÉ a dhéanamh ar Chorn FIFA an Domhain 2022 ar an teilifís, ar an raidió agus ar líne fógartha ag Spórt RTÉ inniu (Déardaoin an 3 Samhain). Cuirfidh RTÉ clúdach beo ar fáil ar gach ceann den 64 cluiche beo ar RTÉ2, ar an RTÉ Player agus ar an RTÉ News Channel.

Beidh an lucht féachana ábalta suas le 200 uair an chloig de chlúdach teilifíse a fháil ar RTÉ2 agus ar an RTÉ Player lena n-áirítear gach ceann den 64 cluiche beo as Catar chomh maith le buaicphointí, réamhfhéachaintí agus míreanna eile. Cuirfear tús leis an gclúdach le 17 lá as a chéile de chluichí beo ón 20 Samhain go dtí an 6 Nollaig. Maidir leis na cluichí a bheidh ar siúl ag an am céanna sa bhabhta deireanach de Chéim na nGrúpaí, déanfar an dá chluiche i ngach grúpa a chraoladh beo – ceann ar RTÉ2 agus an ceann eile ar an RTÉ News Channel, agus beidh gach ceann acu le fáil beo ar an RTÉ Player.

Coinneofar an lucht leanúna cothrom le dáta leis an nuacht agus an t-eolas is déanaí as Catar ar Saturday Sport, Sunday Sport agus Game On chomh maith le feasacháin bheo a chraolfar le linn an lae ar RTÉ Radio 1 agus RTÉ 2FM. Beidh Tony O’Donoghue, Comhfhreagraí Sacair RTÉ, ag tuairisciú beo as Catar ar na hardáin go léir ar an ullmhúchán ar fad do Chorn an Domhain agus ar na fadhbanna a bhaineann leis an gcomórtas thar a bheith conspóideach seo.

Fógraíodh sonraí maidir leis an bhfoireann chlúdaigh, na painéalaithe, na láithreoirí agus na tráchtairí do na meáin ag seoladh in House ar Shráid Líosain i mBaile Átha Cliath. Cuirfidh Joanne Cantwell, Clare MacNamara agus Peter Collins an clúdach beo i láthair i gcuideachta na bpainéalaithe Shay Given, Richie Sadlier, Liam Brady, Didi Hamann, Damien Duff, Kevin Doyle agus eile.

I dteannta fhoireann tráchtaireachta Spórt RTÉ ar a bhfuil Darragh Maloney, George Hamilton, Des Curran, Adrian Eames, John Kenny agus daoine eile beidh foireann comhthráchtairí ar a bhfuil Ray Houghton, Ronnie Whelan, Stephen Kelly, Kenny Cunningham, Áine O’Gorman agus daoine eile.

Ní bheifear ábalta clúdach digiteach Spórt RTÉ ar Chorn an Domhain a shárú a mbeidh blaganna beo ar gach cluiche ar fáil mar chuid de ar RTÉ.ie/Sport agus ar an aip RTÉ News.

Beidh buaicphointí gach cúil ar fáil ar chuntas Twitter RTÉ Soccer, anailís agus sáranailís ar Facebook agus ar YouTube Spórt RTÉ, chomh maith le podchraoltaí gach lá. Coinnigh suas leis an nuacht is déanaí lenár leathanach tiomnaithe do Chorn an Domhain ar a mbeidh liosta na gcluichí, torthaí agus táblaí cothrom le dáta chomh maith le gné-ailt, agallaimh agus anailís ar ábhair a bhaineann leis an imirt agus ábhair nach mbaineann.

Bíodh teacht agat ar an aicsean ar fad, is cuma cá bhfuil tú agus sruthaigh nó teilg gach ceann den 64 cluiche beo ar an RTÉ Player. Lasmuigh den imirt féin, beidh Darren agus Joe ar ais lena n-ábhar grinn ar leith féin le cnuasach speisialta de sceitsí peile a bheidh le feiceáil ar an RTÉ Player ar feadh an chomórtais.

Céard a tharlódh dá mbeadh cailín beag ag guí go mbainfeadh Éire áit amach i gCorn an Domhain? Céard faoi dá gcuideodh an cailín sin, iníon fhear feistis na hÉireann, Romy Kelly, leis na foirne is fearr ar domhan a chur faoi bhrú…Is dráma raidió 5 chuid é Romy’s World Cup Wish’ agus craolfar an chéad chlár ar Raidió RTÉjr Dé Luain an 21 Samhain. Craolfar clár nua gach Luan ina dhiaidh sin ar feadh 4 seachtainí agus craolfar an clár deiridh Dé Domhain an 18 Nollaig. Is é Karl Harpur a scríobh an tsraith agus is í Sadhbh Marshall Coghlan atá i bpáirt Romy. Tá Tony O’Donoghue, George Hamilton agus Mario Rosenstock chomh maith le daoine eile páirteach sa dráma seo freisin. Bí ag éisteacht le Raidió RTÉjr, nó cibé áit a bhfaigheann tú do chuid podchraoltaí, ó Dé Luain an 21 Samhain go bhfaighidh tú amach céard a tharlóidh. Beidh muintir na tíre seo ar bior…

Is éard a dúirt Dee Forbes, Príomh-Stiúrthóir RTÉ: “Tá féasta de spórt beo curtha ar fáil ag RTÉ don lucht féachana ar fud na hÉireann le roinnt míonna anuas agus táthar chun leanúint leis sin sna seachtainí amach romhainn agus muid ag díriú go príomha anois ar Chorn FIFA an Domhain 2022 a bheidh ar siúl sa Chatar. De bharr go mbeidh gach ceann den 64 cluiche ar fáil beo go heisiach ar RTÉ2 agus ar an RTÉ Player agus a gcuirfidh Cluiche Ceannais Chorn FIFA an Domhain 2022 bailchríoch air ar an 18 Nollaig, beidh beagnach 200 uair an chloig den chlúdach beo is fearr ar Chorn an Domhain ar fáil do lucht leanúna spóirt ar fud na tíre ar RTÉ, chomh maith le neart plé agus anailíse. Lasmuigh de na cluichí iad féin, is é Corn an Domhain an t-imeacht spóirt is mó ar domhan, agus cuireann sé sochaí, cultúr agus daoine na tíre óstaigh i lár an aonaigh. Beidh sin tábhachtach go háirithe i mbliana.”

Dúirt Declan McBennett, Grúpcheannasaí Spórt RTÉ: “Tá Corn an Domhain fós ar cheann de na himeachtaí spóirt is sainiúla ar domhan. Déanfar mionscrúdú ar an gcomórtas seo ar bhealach nach ndearnadh riamh cheana, agus beidh an clúdach a dhéanfaimid ar an imirt agus ar imeachtaí lasmuigh den pháirc imeartha ina léiriú air sin. Cuirfidh cumas agus éachtaí na n-imreoirí lonradh faoin gcomórtas a bheidh ar siúl i dtír agus i sochaí a mbeidh aird an domhain uirthi chun go bhfeicfidh siad mar a chaithfidh an tír óstach sin lena cuid saoránach agus le cuairteoirí chuici.”

Tá mórtas ar Hyundai agus ar KFC urraíocht a dhéanamh ar chlúdach RTÉ ar Chorn FIFA an Domhain 2022.

Chuidigh daltaí i Scoil Stáitsíochta Miss Ali i nDún Droma (Saoirse O’Connor, Evie Rose, AJ Keating agus Denis Zamfiroiu) linn an t-imeacht seo a sheoladh in House inniu.