News2day RTÉ ag ceiliúradh 20 bliain ar an aer le hagallamh le hUachtarán na hÉireann Tuairimí an Uachtaráin Uí Uigínn ar obair bhaile curtha in iúl aige!
Tá news2day, seirbhís nuachta RTÉ atá dírithe go sonrach ar dhaoine óga, ag ceiliúradh 20 bliain ar an aer inniu (Dé hAoine an 20 Eanáir 2023) le hagallamh eisiach le hUachtarán na hÉireann, Mícheál D. Ó hUigínn.
Chun ceiliúradh a dhéanamh ar fhiche bliain den sheó a bheith ar an teilifís, chuir daltaí ó Scoil Náisiúnta Naomh Caoimhín, An Baile Beag, Co. Thiobraid Árann, ceisteanna ó lucht féachana news2day RTÉ ar an Uachtarán Ó hUigínn inniu in Áras an Uachtaráin, agus chuir an tUachtarán a chuid tuairimí ar obair bhaile in iúl!
In agallamh fairsing a chraolfar ar news2day RTÉ inniu, d’fhiafraigh na leanaí den Uachtarán “Cén spórt ab fhearr leat nuair a bhí tú ar scoil?”, “Cén post a bhí uait nuair a bhí tú naoi mbliana d’aois?” agus “Cén uair a shocraigh tú go raibh tú ag iarraidh a bheith i d’Uachtarán?”
Nuair a fiafraíodh de céard a cheapann sé faoi obair bhaile, is éard a dúirt an tUachtarán Ó hUigínn: “Ceapaim féin, i ndáiríre, gur taithí oideachasúil é an t-am sa bhaile agus an t-am ar scoil agus gur cheart an obair scoile a chríochnú ar scoil le go mbeadh seans ag daoine a gcuid ama a úsáid le haghaidh gníomhaíochtaí cruthaitheacha eile.”
Chomh maith leis sin, chuir na daltaí ceisteanna ar an Uachtarán faoina mhadraí, faoi na turais oifigiúla a dhéanann sé thar lear, faoin ábhar is mó a thaitin leis ar scoil, faoi na difríochtaí a aithníonn sé idir an lá atá inniu ann agus an t-am a raibh seisean ina leaid óg, agus faoin leabhar is fearr leis. Labhair an tUachtarán leis na daltaí faoin ngrá atá aige don liathróid láimhe agus faoin tábhacht a bhaineann le cairdeas sa saol freisin. Craolfar cuid d’agallamh an Uachtaráin ar news2day RTÉ mar chuid den cheiliúradh breithlae tráthnóna inniu ag 4.20pm ar RTÉ2 agus ar chainéal nuachta RTÉ, agus beidh fáil ar an agallamh iomlán ar an RTÉ Player níos déanaí inniu.
Seo an chomhairle a thug an tUachtarán Mícheál D. Ó hUigínn i dteachtaireacht do leanaí na hÉireann agus do lucht féachana news2day RTÉ: “Bígí caidéiseach faoi gach rud i gcónaí, agus ceapaim go bhfuil sé tábhachtach a chinntiú freisin nach gcailleann tú amach ar an bpléisiúr a bhaineann le heolas a roinnt. Sílim gur rud tábhachtach é an cairdeas freisin agus gur tábhachtach a chinntiú nach bhfágtar duine ar bith gan cara aige nó aici, agus a chinntiú go mbíonn áit ann don uile dhuine. Déanaimid ar fad ár rud féin… ach sílim go ndéanfaidh tú cuimhní den scoth tríd an gcairdeas a dhéanann tú le daoine, agus is rud iontach tábhachtach é sin. Bíodh an misneach agaibh freisin an fód a sheasamh agus ligigí do dhaoine eile an fód a sheasamh dóibh féin freisin, mar ní hionann aon bheirt againn. Is duine ar leith gach duine againn, ach ag an am céanna, is iomaí dea-thréith atá againn ar fad.”
Spreag an tUachtarán Ó hUigínn leanaí na hÉireann chun an Ghaeilge a labhairt freisin. Mhol sé dóibh an Ghaeilge a labhairt ar bhealach spraíúil agus gan drogall a bheith orthu cibé focail atá acu a úsáid.
Mar chuid den cheiliúradh breithlae a bheidh ar siúl tráthnóna, beidh alumni news2day RTÉ istigh sa stiúideo in éineacht leis na láithreoirí reatha Reem El-Hassany agus Molly O’Connor. Beidh cuid de na láithreoirí a bhí ann le 20 bliain anuas ag filleadh ar an gclár nuachta, a bhfuil cion ag go leor air, chun breithlá an chláir a cheiliúradh. Bí ag féachaint ar an gclár speisialta don 20ú breithlá ag 4.20pm ar RTÉ2 agus ar an RTÉ Player.
Is é news2day seirbhís nuachta RTÉ atá dírithe go sonrach ar dhaoine óga, ar a gclúdaítear scéalta nuachta de chuid na hÉireann agus áiteanna eile ar domhan a bheadh ina ábhar spéise ag daoine óga. Craoltar é ón Luan go dtí an Aoine ag 4.20pm ar RTÉ2, ar chainéal nuachta RTÉ agus is féidir é a shruthú ar an RTÉ Player. Chomh maith leis an lucht féachana óg a bhíonn ag féachaint ar an gclár sa bhaile, is iomaí seomra ranga sa tír ina bhféachtar ar an gclár ar líne agus ina n-úsáidtear é mar uirlis teagaisc.