Beirt dheartháir agus beirt dheirfiúr sa chraobh do Bhonn Óir Seán Ó Riada i mbliana

Beidh spórt agus spraoi ann i mbliana agus beirt dheartháir, Pax agus Macdara Ó Faoláin, agus beirt dheirfiúr, Annie agus Méabh Smyth, i measc na gceoltóirí a bheas san iomaíocht i mbliana sa chraobh do Bhonn Óir Seán Ó Riada ar 3 Feabhra.  Cuirfidh Peadar Ó Riada an ócáid i láthair beo ar RTÉ Raidió na Gaeltachta ó Óstán Pháirc Bhaile an Róistigh i gCorcaigh. 

Is as An Rinn do Pax agus Macdara Ó Faoláin, agus aithne mhaith orthu mar cheoltóirí.  Is fidléir traidisiúnta, amhránaí agus léiritheoir é Pax.  Bíonn sé ag cumadh ceoil freisin, agus tá scéimeanna idir lámha aige a bhaineann le hathbheochan agus caomhnú saothair cheoltóirí traidisiúnta ar leith.  Seinneann sé leis an ngrúpa Nuadán, agus tá sé ag obair mar léiritheoir in earnáil na teilifíse.  Is ceoltóir iluirlise é Macdara a chasann an fhidil, an maindilín agus an basúcaí.   Is déantóir uirlise é, agus tá sé ina bhall den ghrúpa Nuadán freisin.  Bhain sé an chraobh do Bhonn Óir Seán Ó Riada amach cheana, sa bhliain 2019, agus bronnadh céim onórach air le déanaí ó Cheol-Scoil Chorcaí.   

Is as Baile Mhic an Aba i gCo. Ard Mhacha do na deirfiúracha Annie agus Méabh Smyth, ó theaghlach ceolmhar atá ar maos i dtraidisiún fidléireachta dheisceart Uladh agus Thír Chonaill.  Thosaigh siad beirt ag casadh ar an bhfidil i gClub na bPíobairí in Ard Mhacha nuair a bhí siad thart ar seacht mbliana d’aois.   Bronnadh an gradam Fiddler of London ar Mhéabh i 2021.  Shroich sí an chraobh don Bhonn Óir cheana, sa bhliain 2019, agus tá sí ag obair mar abhcóide.  Tá Annie i mbun staidéir ar chúrsaí margaíochta agus nuálaíochta i DCU faoi láthair.  Casann sí an fheadóg stáin agus an bainseó chomh maith.  Bhí sí san iomaíocht sa chraobh do Fiddler of London 2022, agus bhí sí páirteach le déanaí i bhféile Birmingham TradFest agus Féile Ed Reavy.

Is comórtas mór le rá sa cheol traidisiúnta é Bonn Óir Seán Ó Riada.  Bíonn sé dírithe ar uirlis éagsúil gach bliain thar tréimhse ceithre bliana, agus i mbliana tá sé dírithe ar an bhfidil.  Chuir an líon is mó daoine riamh isteach ar an gcomórtas i mbliana ó cuireadh ar bun é i 2010.  Beidh 14 ceoltóir sa chraobh ar 3 Feabhra, ina measc cúigear ceoltóir ó Stáit Aontaithe Mheiriceá, an líon is airde iomaitheoirí riamh ó thar lear, chomh maith le fidléirí eile ó ar fud oileán na hÉireann.   

Is iad na ceoltóirí iomráiteacha Connie O’Connell, Éamon McGivney agus Ciarán Ó Maonaigh a bheas i mbun moltóireachta i mbliana.  Gheobhaidh an buaiteoir an Bonn Óir, deartha ag Niamh Utsch, agus €2500.   Beidh costas €10 ar an doras dóibh siúd ar mhaith leo freastal ar an ócáid i gCorcaigh, agus beidh sé le feiceáil beo ar leathanach Facebook RTÉ RnaG freisin.   

Dúirt Peadar Ó Riada: “Tá muid ana shásta le forbairt an chomórtais ó cuireadh ar bun é 13 bliain ó shin, agus an meas atá tuillte aige i measc phobal an cheoil.  Tá iomaitheoirí tagtha chugainn ó thíortha ar fud an domhain, a bhuíochas leis an raidió a scaipeann an soiscéal i bhfad is i gcéin.  Tá caighdeán na n-iarrthóirí i mbliana chomh hard is a bhí riamh, agus creidim go bhfuil an comórtas ag leagan síos caighdeán de bharr feabhas na moltóirí thar na blianta.  Tá súil againn go mbeidh muintir an cheoil ag éisteacht linn ar an 3ú lá, agus beidh an comórtas le feiceáil beo ar líne freisin gan dabht mar a bhíonn gach bliain.” 

Is iad na hiomaitheoirí i mbliana: Adam Cole-Mullen as Boston, Alice Bradley as Maryland, Andrew Caden as Maryland, Joe de Georgeo as Minnesota, Ty Kelliher as Connecticut, Caoimhe Flannery as Séipéal na Carraige, Co. Chorcaí, Megan Nic Fhionnghaile as Gaoth Dobhair i dTír Chonaill, Annie Smyth as Baile Mhic an Aba in Ard Mhacha, Jason Mac Aonghusa as An Droim Mór Thiar i Sligeach, Macdara Ó Faoláin as An Rinn i gCo. Phort Láirge, Méabh Smyth as Baile Mhic an Aba in Ard Mhacha, Pax Ó Faoláin as An Rinn i gCo Phort Láirge, Sinéad Nic Cionnaith as Eochair i gCo Thír Eoghain, agus Úna McGlinchey as an Ómaigh i gCo Thír Eoghain.   

Craolfar an chraobh do Bhonn Óir Seán Ó Riada Dé hAoine 3 Feabhra ag 7 pm beo ar RTÉ Raidió na Gaeltachta.

Is iad RTÉ Raidió na Gaeltachta, Iontaobhas Fódhla, Gael Linn, Comhaltas Ceoltóirí Éireann, IMRO agus Óstán Pháirc Bhaile an Róistigh i gCorcaigh na hiomaitheoirí ar an gcomórtas.