Cuir aithne ar na gaidhríní géimiúla is geanúla in Éirinn i Madraí, sraith nua ar RTÉ!
Dé hAoine an 3 Feabhra ag 8pm ar RTÉ One agus ar an RTÉ Player
Céard a dhéanfá le Bulladóir nach mbogfadh? Le hAimseadóir nach n-aimseodh? An bhfuil cás ar bith ina mbeadh sé inghlactha go mbeadh coileán ag cogaint do bhróg? Nó céard faoin madra a thaitníonn siúlóidí leis…ar an gcoinníoll gur i mbugaí a bheadh sé?!
Leis an bpaindéim tháinig borradh faoi líon na gcoileán atá againn agus is saibhride go mór ár saol de bharr ghleoiteacht na ngaidhríní seo – ach áit ar bith a mbíonn coileán ann, is ann a bheidh fadhbanna freisin. Agus anois, tá sraith 6 clár dar teideal Madraí anseo chun lámh chúnta a thabhairt!
Fad a bhí Peataí, clár RTÉ a raibh an-éileamh air, á thaifeadadh acu sa bhliain 2020, chuala an tréidlia Ellen Hegarty agus an t-iompraí Paula Doohan uallfairt mhadraí na tíre (agus uallfairt a n-úinéirí!) agus iad ag glaoch ar chabhair, agus shocraigh siad beart éigin a dhéanamh.
Rinneadh gairm náisiúnta ar rannpháirtíocht an samhradh seo caite, inar tugadh cuireadh do theaghlaigh a bhí i ndeireadh na preibe mar gheall ar a madraí dána faisnéis agus comhairle a fháil ónár saineolaithe ar ainmhithe. Tháinig na físeáin agus na hachainí ar chúnamh isteach ina rabharta ó cheann ceann na tíre, agus gach cineál crá croí a bhaineann le madraí luaite iontu – leithéidí imní scartha agus madraí ag tarraingt ar an iall; tafann gan stad agus troscán á mhungailt; ailléirgí do bhia agus aimhrialtachtaí leighis.
Roghnaigh siad roinnt cásanna éagsúla a bhfuil raon leathan fadhbanna coitianta i madraí ag baint leo… agus cuid acu nach bhfuil chomh coitianta céanna. Ar bhonn cás ar chás, breathnóidh na saineolaithe ar iompar na madraí, aimseoidh siad an rud is cúis leis an bhfadhb agus tabharfaidh siad comhairle agus moltaí i leith na madraí – agus i leith a n-úinéirí freisin in amanna!
Le linn na seachtainí agus na míonna tar éis do Paula agus Ellen a bheith ag obair le gach teaghlach, rachaidh siad ar cuairt orthu arís le fáil amach mar atá ag éirí leo lena madraí – agus le fáil amach an bhfuil athrú tagtha ar chúrsa… bíodh sin ina athrú chun feabhais nó ina athrú chun donais! I gcaitheamh na sraithe, casfaidh Paula le Broony i mBéal Feirste, madra a tarrtháladh a bhfuil dúil i bpluideanna agus i dtuáillí aige. Is gearr go mbeidh air dul i dtaithí ar shaol athraithe nuair a bheidh an cúpla a bhfuil a úinéir ag súil leo tagtha ar an saol.
Buailfidh Ellen le Cabríní agus na trí cinn de Shí-abhabhaí atá aici a bheidh ag dul san iomaíocht chun an teideal ‘An Madra is Galánta’ agus iad ag fáil an ceann is fearr ar na fadhbanna itheacháin atá acu. Ag an am céanna, cuideoidh Paula le Siobhán dul i ngreim le Fred, madra a thaitníonn a chuid siúlóidí chomh mór sin leis go dtarraingíonn sé a úinéir amach roimh thrácht. Le scata gaidhríní geanúla géimiúla agus leideanna agus straitéisí atá furasta a leanúint chun dul i ngleic le réimse fadhbanna a bhaineann le madraí, is cinnte go léireofar sa tsraith Madraí an tEarrach seo nach deacair cleas a mhúineadh do sheanmhadra tar éis an tsaoil!
Bí ag féachaint ar an tsraith nua de Madraí Dé hAoine an 3 Feabhra ag 8.00pm ar RTÉ One agus ar an RTÉ Player.