D’fhógair RTÉ agus Fís Éireann go rabhthas chun infheistíocht níos mó a dhéanamh sa tsraith gearrchláracha drámaíochta, Storyland, a bhfuil gradaim buaite aici.
Tá Storyland leagtha amach chun deiseanna a chruthú le go mbeidh daoine cumasacha nua in ann cláracha drámaíochta a chur chun cinn, a fhorbairt agus a léiriú ar an scáileán. Is tús maith thar a bheith luachmhar é Storyland do scríbhneoirí, stiúrthóirí, léiritheoirí agus aisteoirí cumasacha Éireannacha ar fud oileán na hÉireann lena gcuid gairmeacha a fhorbairt.
Tá RTÉ agus Fís Éireann tagtha le chéile chun infheistíocht níos mó a dhéanamh in Storyland. Den chéad uair riamh sa bhliain 2022, craoladh gearrchláracha drámaíochta Storyland ar RTÉ2 agus ar an RTÉ Player agus cuireadh ardán níos leithne ar fáil do dhaoine cumasacha nua drámaíochta agus cuireadh infheistíocht níos mó ar fáil do na coimisiúin drámaíochta bhunaidh Éireannacha.
Táimid ag iarraidh ocht script a choimisiúnú faoina mbeifear ag obair go dlúth le scríbhneoirí agus léiritheoirí chun na scripteanna sin a fhorbairt. Táthar ag lorg scríbhneoirí ó réimsí na teilifíse, scannánaíochta, amharclannaíochta, fógraíochta, litríochta, na gcláracha faisnéise agus iriseoireachta cibé má scríobh siad don teilifís nó do scannáin roimhe seo nó nár scríobh.
As na hocht gclár drámaíochta a forbraíodh, déanfar trí chlár drámaíochta aonair 25 nóiméad an ceann a choimisiúnú lena léiriú.
Tá Storyland tiomanta d’éagsúlacht agus do chothromaíocht inscne chothrom a chinntiú ar fud gach príomhphoist cruthaitheachta agus le bheith ionchuimsitheach nuair atá comhdhéanamh gach foirne á mheas.
Is éard a dúirt David Crean, Ceannasaí Drámaíochta Gníomhach, RTÉ: “Deis iontach a bhí in Storyland chun guthanna nua ar leith a aimsiú agus a chothú trí scéalta nár insíodh. Mar chuid de ghealltanas leanúnach RTÉ chun réimse iléagsúil guthanna agus daoine cumasacha a aithint agus a chur chun cinn, bhí sé iontach a fheiceáil go raibh Storyland ar an teilifís agus go raibh lucht féachana níos leithne ag breathnú air. Is céim in airde riachtanach í chun go mbeidh daoine cumasacha ábalta a gcuid saothar a chur os comhair lucht spéise sa cheantar agus ar fud an domhain agus tá an-áthas orainn a bheith ag obair le Fís Éireann inár dtiomantas cur le próifíl dhrámaíochta na hÉireann.”
Is éard a dúirt Andrew Byrne, Bainisteoir Tionscadail Teilifíse Fhís Éireann, “Tá ríméad orainn a bheith ag obair le RTÉ ar an infheistíocht leanúnach i ndaoine cumasacha nua tríd an scéim Storyland, rud a thugann an chéad deis do ghuthanna atá ag teacht chun cinn laistigh de leagan amach gearr teilifíse. Tá mé ag súil go mór le scripteanna na bliana seo agus na scéalta nua éagsúla a fheiceáil.”
Grianghraf ón tsraith dhrámaíochta Storyland 2022, Mustard.