Láithreoirí Nua don Deireadh Seachtaine Fógartha ag RTÉ 2FM
Sceideal úrnua á sheoladh Dé hAoine an 24 Feabhra
Beidh go leor daoine cumasacha nua ag teacht chun cinn lena n-áirítear
Roz Purcell, Emma Power, Laura Fox, Beta Da Silva, agus Aifric O’Connell
Tá a sceideal nua deiridh seachtaine fógartha ag RTÉ 2FM inniu. Tabharfaidh na daoine nua seo go léir a bheidh le cloisteáil beocht nua don deireadh seachtaine ag tosú tráthnóna inniu (Dé hAoine an 24 Feabhra).
Nuair a bheidh na cláir Game On agus The National Chart Show le Bláthnaid Treacy (7pm-9pm) thart is ceol rap agus hip hap a bheidh le cloisteáil oícheanta Dé hAoine ar 2FM le DJ Mo-K (9pm-11pm), agus DJ Wax (11pm – 1am).
Cuirfear tús le maidineacha Dé Sathairn leis an gclár 2FM Breakfast le Bláthnaid Treacy ina gcuirfidh Bláthnaid clár maidine i láthair a bheidh lán le fuinneamh agus ar a mbeidh duaiseanna den scoth le buachan ag na héisteoirí, chomh maith le ceol iontach ar ndóigh.
Is cuma más lá mór oibre atá romhat nó lá scíthe, beidh Laura Fox i do theannta gach Satharn ó 9am go dtí meán lae do chlár trí uair an chloig de cheol iontach, comhráite spraíúla agus agallaimh le daoine mór le rá.
Ní mór duit cluas éisteachta a thabhairt do Roz agus Emma ar 2FM ag an deireadh seachtaine! Cuirfidh Roz Purcell agus Emma Power siamsaíocht ar fáil do na héisteoirí ó 12-3pm chomh maith le ceol, comhráite agus féiríní. Beidh éisteoirí ábalta bróinse do cheathrar a bhuachan ach ní mór duit a bheith i do rógaire ceart chun é a bhuachan! Is féidir leis na héisteoirí buille faoi thuairim a thabhairt má tá an t-aoi mór le rá ag bualadh bob nó ag insint na fírinne agus ardófar do chroí nuair a inseoidh Roz agus Emma duit faoi na scéalta a chuaigh i bhfeidhm orthu an tseachtain sin.
Is í an láithreoir Aifric O’Connell a bheidh ar an stiúir ó 3pm – 6pm ar an Satharn agus ar an Domhnach araon le 3 uair an chloig de shúil siar, ábhar cartlainne agus craic. Oíche Dhamhsa a bheidh ann oícheanta Dé Sathairn ar 2FM nuair a bheidh Jenny Greene i gceannas ar an gceol ar an gclár The Electric Disco ag am níos luaithe 6pm. Casfaidh sí ceol a chuideoidh le héisteoirí iad féin a réiteach d’oíche amach sa bhaile mór nó d’oíche mhór sa teach.
Cuirfidh Dave Treacy clár úrnua ceoil damhsa i láthair ar a mbeidh meascán den cheol damhsa club tráchtála nua is fearr chomh maith le comhráite le DJanna agus léiritheoirí mór le rá as gach cearn den domhan agus The Club Culture Guest Mix. I ndiaidh chlár Dave Treacy craolfar The Spring Sessions ón 10pm go meán oíche agus an Late Night Sessions ina dhiaidh sin ón 1am.
Ar The Request Show le Conor Behan ag 6pm ar an Domhnach tabharfar cead do na héisteoirí a bheith i gceannas. Beidh togha agus rogha an cheoil ag an lucht éisteachta agus deis acu teagmháil a dhéanamh leis an gclár chun na hamhráin is fearr leo a iarraidh.
Beidh Beta Da Silva i gceannas ansin ó 8-10pm ó Dé Domhnaigh go dtí Déardaoin leis an gclár The New Music Show. Beidh deis ag na héisteoirí a bheith ag éisteacht, a suaimhneas a dhéanamh agus spéis a chur sna nithe is déanaí ó dhomhan an cheoil le ceol nua, tionscadail nua, nuacht ar ghigeanna, miondealú ar albaim agus rogha cheoil ar fud gach seánra.
Beidh seisiúin réchúiseacha ar an gclár The Greene Room (10pm – 12) le Jenny Greene i ndiaidh chlár Beta. Díreach i ndiaidh Jenny ag meán oíche, cuirfidh Cormac Battle – glór cairdiúil ar chlár laethúil Jennifer Zamparelli – deireadh leis an deireadh seachtaine le fíorcheol idir rac-cheol, cheol indie agus cheol damhsa.
Is éard a bhí le rá ag Dan Healy, Ceann Fhuaim Dhigiteach RTÉ agus RTÉ 2FM: “Meascán de ghlórtha nua atá ag teacht chun cinn i Raidió na hÉireann atá i sceideal an deiridh seachtaine. Ceann de na rudaí is iontaí faoi ghlórtha atá ag teacht chun cinn ar an stáisiún seo ná gur forbraíodh sa stáisiún seo iad. Tá Laura Fox, Emma Power agus Aifric O Connell ar 2FM le cúpla bliain anois agus bíonn siad ag craoladh freisin ar RTÉ Pulse agus RTÉ 2XM. Tá ríméad orainn go mbeidh Roz Purcell le foireann an deiridh seachtaine agus ar an aer in éineacht le Emma Power. Beidh sceideal iontach oíche againn a bhfuil athchóiriú mór déanta air chomh maith ag 2FM freisin le Jenny Greene, Dave Treacy, Conor Behan, Mo K , DJ Wax agus Beta Da Silva. Ó tharla go bhfuil an sceideal i rith na seachtaine leabaithe againn anois, sceideal ar léir ó na torthaí is déanaí faoi lucht éisteachta go bhfuil ag éirí go maith leis, tá muid ag díriú ar an deireadh seachtaine anois.”