Cruinniú na nÓg 2023 ar ais – Le tacaíocht ó RTÉ
Féach ar ár promo anseo.
Beidh Cruinniú na nÓg ar siúl Dé Sathairn an 10 Meitheamh, agus tá breis is 500 imeacht don chruthaitheacht pleanáilte do na mílte daoine óga ar fud na tíre i mbliana ina measc Snámh san Fhoraois i Rath an Bharraigh, Meicnic Neamhnaí i Réadlann Dhún Sinche, athchruthú de Bhaile Chluain Eois déanta as ceirmeacht, Húlahúpáil i bPort Láirge agus déanamh gallúnach céadfach in Uíbh Fhailí.
Obair i gcomhar é Cruinniú na nÓg idir Clár Éire Ildánach, údaráis áitiúla agus RTÉ agus is é an t-aon imeacht dá leithéid ar domhan. Tá roinnt tionscadail chruthaitheachta forbartha ag Clár Éire Ildánach agus ag a chomhpháirtithe straitéiseacha, agus tá sé i gceist iad a chur i láthair an phobail Dé Sathairn an 10 Meitheamh 2023.
Áirítear orthu sin:
Reáchtálfaidh Líonra Ealaíon Sráide, Sorcais agus Taispeántas na hÉireann (ISACS) laethanta oscailte do dhaoine óga atá ag iarraidh triail a bhaint as scileanna sorcais agus taispeántais sráide ina n-ionaid thiomanta i gCloch Shiúrdáin, i gCorcaigh, i mBaile Átha Cliath agus i nGaillimh. Ní gá do dhaoine nach mbeidh ábalta a bheith ann ar an lá aon imní a bheith orthu mar go mbeidh réimse iomlán de ranganna teagaisc ar líne ar fáil.
Rhyme Island – Tá Éire Ildánach ag dul i bpáirt le The Kabin Studio i mbliana chun gach duine óg in Éirinn a chur ag rapáil. Le bheith faoi réir faoina chomhair, tá foireann Rhyme Island ag taisteal fud fad na tíre ag reáchtáil sraith de cheardlanna ar líne agus ar an láthair a gcuirfidh lá ollmhór rapála clabhsúr leis ag Dún Eilíse, dún ón 17ú haois, i gCorcaigh.
Tá This is Art 2023, comórtas iontach Éire Ildánach agus RTÉ do dhaoine óga ar ais arís, agus déanfar na buaiteoirí a fhógairt ar an 10 Meitheamh 2023. Cuirfear gailearaí digiteach ar líne náisiúnta ar fáil de na saothair ar fad a fuarthas.
Chun liosta iomlán a fháil ar na gníomhaíochtaí ar fad agus chun eolas a fháil ar mar is féidir leat páirt a ghlacadh i gCruinniú na nÓg – téigh chuig https://cruinniu.creativeireland.gov.ie agus www.rte.ie.