Sa tsraith nua RTÉ seo, tugtar léargas ar an am a chaith feirmeoir, foraoiseoir agus iascaire as Éirinn i roinnt de na coinníollacha is dúshlánaí. Tá siad ar aistear chun a fháil amach an bhfuil sé de chumas iontu a mbeatha a shaothrú ar an talamh agus ar an bhfarraige ar feadh coicíse sna coinníollacha is deacra agus gan acu ach a ndá lámh agus uirlisí bunúsacha chun é sin a dhéanamh.
Ó phatrúin bháistí nach féidir a thuar i Vítneam, go dtí dífhoraoisiú sa Bhrasaíl, go dtí aigéin atá ag téamh agus an pobal éisc ar fad a bheith básaithe amach ó chósta na Gaimbia, tá na daonraí óstacha i gcroílár na héigeandála aeráide domhanda.
Ag tosú Dé Céadaoin an 7 Meitheamh ar RTÉ One agus ar an RTÉ Player, feicfimid Johnny Walsh, iascaire as Corcaigh sa chéad chlár agus é ar bhád adhmaid amach ó Chósta Thiar na hAfraice in uiscí iascaireachta na Gaimbia a bhfuil róshaothrú déanta orthu. Anseo, cuireann sé eolas ar sholáthar bia phobal Tanji agus phobail eile atá le cósta na Gaimbia, soláthar bia atá i ndroch-chaoi, a mbíonn orthu aistir chontúirteacha farraige a dhéanamh mar gheall ar an stoc éisc a bheith ag dul i léig.
Sa dara clár leanfaimid Eveline Gill agus í ag babhtáil an áit a bhfuil sí ar a compord ann – feirm bheag churadóireachta in Uíbh Fhailí – ar an gcruatan a bhaineann le léibheann ríse i Vítneam. Is saol eile ar fad é seo do Eveline, comhairleoir feirmeoireachta a bhfuil cleachtadh aici a bheith ag obair leis an eolaíocht talmhaíochta nua-aoiseach is úire agus atá go mór i bhfách le gach rud atá orgánach, agus í anois in áit iargúlta sna sléibhte nach bhfuil aon athrú tagtha ar a gcuid modhanna feirmeoireachta leis na céadta bliain.
Sa tríú clár, tugann Marina Conway, foraoiseoir as Sligeach, mian a croí chun fíre nuair a théann sí ar aistear chuig tailte coille treibhe na Brasaíle, áit a bhfaigheann sí an oiread céanna d’ábhar dóchais agus d’ábhar a bhrisfeadh do chroí.
Seachas cur fúithi ar chosán go dtí an Amasóin a bhfuil tóir ag lucht taiscéalaíochta air, cuireann Marina fúithi i bhforaois bháistí an Atlantaigh in oirthuaisceart na Brasaíle, an chéad chuid den tír a chonaic lucht coilínithe na hEorpa. Tá na daoine áitiúla dúchasacha – na Pataxó – fanta anseo riamh ó shin, de réir mar atá an fhoraoiseacht tráchtála [dlíthiúil agus neamhdhlíthiúil] ag slogadh a gcuid tailte dúchais traidisiúnta.