Deich ngrianghraf don bhabhta ceannais i gcomórtas grianghrafadóireachta fiadhúlra RTÉ, Eye on Nature, fógartha
Tá na deich ngrianghraf fhíoráille fiadhúlra a bheidh sa bhabhta ceannais i gcomórtas grianghrafadóireachta fiadhúlra RTÉ, Eye on Nature, fógartha.
Tá broic, ealaí, froganna, foiche sabre (rhyssa persuasoria) agus cearc cheannann i measc na n-ainmhithe atá sna grianghraif a bheidh i mbabhta ceannais Eye on Nature RTÉ. Is comhpháirtíocht é sin idir Nationwide RTÉ, Mooney Goes Wild ar RTÉ Radio 1 agus Oifig na nOibreacha Poiblí agus Garraithe Náisiúnta na Lus.
Tá an deichniúr ar grianghrafadóirí amaitéaracha iad ar fad lonnaithe ar fud na hÉireann agus cuireadh ar ghearrliosta iad as níos mó ná dhá mhíle go leith iontráil. Nochtfar grianghraf buaiteach Eye on Nature ar an gclár Nationwide ar RTÉ One Dé hAoine an 23 Meitheamh ag 7pm agus is iad Anne Cassin agus Bláthnaid Ní Chofaigh a chuirfidh an clár sin i láthair.
Is iad an deichniúr a bheidh sa bhabhta ceannais ná: An grianghrafadóir amaitéarach as an Rómáin atá lonnaithe i mBaile Átha Cliath Petricia Bratila a ghlac grianghraf d’Eala Bhalbh; Edward Delaney a ghlac grianghraf d’Fhrog Coiteann i Loch Garman; Andrew Malcom as Port Láirge a ghlac grianghraf d’Fhoiche Sabre (rhyssa persuasoria); Tristane Bane a ghlac grianghraf de Mhadra Rua; Karl Graef a ghlac grianghraf de Bhroc i Míleac, Contae an Chláir; Paul Campbell a ghlac grianghraf de Chearc Cheanann i mBaile Átha Cliath; Thomas McDonnell as Aontroim a ghlac grianghraf de Ghiorria; Philip Greaves a ghlac grianghraf de Bheach Shaoir Rua i dTiobraid Árann; Daniel Meehan as Luimneach a ghlac grianghraf de Choinín agus Ashling Byrne a ghlac grianghraf de Shionnach i Ráth Fearnáin.
Is éard a dúirt an Léiritheoir Feidhmiúcháin Janet Frawley: “Bíonn freagra iontach ón bpobal gach bliain i leith an chomórtas Eye on Nature agus tá sé thar a bheith speisialta i mbliana ó tharla go bhfuil an comórtas mar chuid den cheiliúradh 30 bliain ar an gclár Nationwide, an gnéchlár nuachta teilifíse is mó lucht féachana in Éirinn. Bhí ionadh an domhain ar na moltóirí le méid agus caighdeán na n-iontrálacha sa chomórtas. Is léiriú ar bhua na grianghrafadóireachta in Éirinn í obair an deichniúir atá sa bhabhta ceannais. Léirítear sna grianghraif freisin an áilleacht a bhaineann leis an dúlra agus tarraingítear aird ar an mbithéagsúlacht atá ann in áiteanna fiáine sa tír.”
Roghnaigh painéal moltóirí na deich ngrianghraf dheireanacha agus buaiteoir chomórtas na bliana seo agus ar an bpainéal i mbliana bhí: An Dr. Matthew Jebb, Stiúrthóir Gharraithe Náisiúnta na Lus, Niall Hatch ó Chairde Éanlaith Éireann agus Sheena Jolley, grianghrafadóir fiadhúlra a bhfuil duaiseanna buaite aici.
Le linn don Dr. Matthew Jebb a bheith ag labhairt faoin gcomórtas, dúirt sé: “Léiríonn Eye on Nature an bhithéagsúlacht atá ag tírdhreach na hÉireann idir an Fhoiche Sabre (rhyssa persuasoria), an frog coiteann agus an madra rua atá dúchasach d’Éirinn. Tá súil agam go spreagfar an lucht spéise meas a bheith acu ar an dúlra leis na deich n-íomhá fhíoráille seo d’fhiadhúlra na hÉireann. Déanaim comhghairdeas leis an deichniúr ar fad atá sa bhabhta ceannais agus a bhfuil a gcuid grianghrafadóireachta thar na bearta arís i mbliana. Bhí sé thar a bheith deacair buaiteoir a roghnú.”
Tá comórtas Eye on Nature RTÉ trí bliana ar an bhfód anois agus tugtar deis do ghrianghrafadóirí fiadhúlra ar fud na hÉireann a gcumas ollmhór a thaispeáint agus tugtar cuireadh dóibh grianghraif den fhiadhúlra a chur isteach le dul sa seans duais €1,000 in airgead tirim agus corn Eye on Nature a bhuachan. Taispeánfar grianghraif an deichniúir atá sa bhabhta ceannais chomh maith le hocht ngrianghraf fiúntais eile ag taispeántas i nGarraithe Náisiúnta an Lus.
Fógrófar buaiteoir Eye on Nature i leagan speisialta den chlár Nationwide Dé hAoine an 23 Meitheamh ag 7pm ar RTÉ One agus ar an RTÉ Player.
Beidh an taispeántas ar fáil ar láithreacha eile Oifig na nOibreacha Poiblí níos deireanaí i mbliana agus tá an taispeántas ar fáil ar líne freisin ag RTÉ.ie
Labhair Derek Mooney le roinnt de na daoine a bheidh sa bhabhta ceannais ar an gclár Mooney Goes Wild oíche Dé Luain.
Éist siar leis anseo: https://www.rte.ie/radio/radio1/mooney/programmes/2023/0619/1390089-mooney-goes-wild-monday-19-june-2023/