Tá sé fógartha ag RTÉ inniu (Déardaoin) go mbeidh Kathryn Thomas ag cur Rose Of Tralee 2023 i láthair i dteannta Dháithí Uí Shé i mbliana. Is é seo an chéad uair riamh a mbeidh beirt ag cur chlúdach RTÉ den Fhéile i láthair, a chraolfar beo ó Acadamh Spórt Chiarraí in Ollscoil Teicneolaíochta na Mumhan ar an 21 agus 22 Lúnasa ar RTÉ One agus ar an RTÉ Player.
Déanfaidh 32 Rós ionadaíocht ar dhiaspóra na hÉireann ar fud an domhain i mbliana ó Ionaid Rósanna ar fud na hÉireann, sa Ríocht Aontaithe, sna Stáit Aontaithe, i gCeanada, san Astráil, sa Nua-Shéalainn agus níos faide i gcéin.
Is í seo an 12ú bliain ag Dáithí ag cur an tseó i láthair agus is fada leis an láithreoir nua, Kathryn Thomas, go mbeidh sí féin ar an ardán in éineacht leis chun casadh le Rósanna Idirnáisiúnta na bliana seo.
Dúirt Kathryn: “Is mór an onóir dom go mbeidh mé i dteannta Dháithí agus na foirne i mo chomhláithreoir ar Rose of Tralee na bliana seo, agus tá mé ar bís faoi. Tá oidhreacht iontach ag an bhFéile in Éirinn agus ar fud an domhain – níl bealach níos fearr chun mná den scoth ar nós iad a cheiliúradh. D’éirigh mé aníos ag breathnú air gach bliain, agus tá tábhacht ar leith ag baint leis domsa go bhfuil an deis seo faighte agam an clár a chur i láthair in éineacht le Dáithí. Is fada liom go dtosóidh muid. Seo linn go Trá Lí!”
Is éard a dúirt Dáithí: “Tá mé thar a bheith sásta go mbeidh mé ar ais ag cur an Rose of Tralee i láthair arís i mbliana. Ba mhaith liom fáilte chroíúil a chur roimh mo chomhláithreoir iontach Kathryn chuig clann Rose Of Tralee! Tá aithne agam féin agus ar Kathryn ar a chéile le fada an lá agus muid ag obair le chéile le breis is scór bliain, agus níl aon dabht ann ach go mbeidh neart spraoi againn le chéile. Is fada linn go gcuirfidh aithne ar 32 Rós den scoth na bliana seo, agus go ndéanfaidh muid an turas go Trá Lí! Seo linn!”
Beidh an lucht féachana in Éirinn agus ar fud an domhain in ann breathnú ar Rós Thrá Lí saor in aisce, beo agus ar éileamh ar an RTÉ Player. Beidh gné-mhíreanna, míreanna ón gcartlann, ábhar ó chúl an cheamara agus neart eile ar fáil ar fud RTÉ.ie agus ar ardáin meán sóisialta RTÉ sna seachtainí amach romhainn.
Is éard a dúirt Anthony O’Gara, Cathaoirleach Feidhmiúcháin Fhéile Idirnáisiúnta Rós Thrá Lí: “Tá an-áthas orainn fáilte a chur roimh Kathryn go dtí Clann agus Foireann Rós Thrá Lí. Tharla go leor rudaí ‘den chéad uair’ ar an gclár le himeacht na mblianta, agus cuirfidh beirt láithreoirí don Roghnú Rós Thrá Lí go mór leis an ócáid.
Beidh comhluadar den scoth ag Kathryn le Dáithí, fear uasal a bhfuil ardmheas againn air agus ar iontach an t-ambasadóir é don Fhéile, agus táimid ag súil go mór leis an mbeirt acu a fheiceáil ar an ardán do sheó na bliana seo.”
Beidh 62ú Féile Idirnáisiúnta Rós Thrá Lí ar siúl ón 18 – 22 Lúnasa.
