Tá RTÉ ag dul chuig an bhFleadh!
Tá mórtas ar RTÉ agus ar TG4, ina gcomhpháirtithe oifigiúla meán cumarsáide dóibh, a bheith ag tacú le Fleadh Cheoil na hÉireann Chomhaltas 2023.
Beidh Fleadh Cheoil na hÉireann Chomhaltas ar siúl ó Dé Domhnaigh go dtí Dé Luain, an 6 – 14 Lúnasa, agus beidh RTÉ ag craoladh beo ón bhféile. Beidh Marty Morrissey, Louise Duffy agus Kieran Hanrahan ó RTÉ Radio 1 ag craoladh beo ón Muileann gCearr, mar aon le Neansaí Ní Choisdealbha ó RTÉ Raidió na Gaeltachta.
Tiocfaidh ceoltóirí traidisiúnta ó gach aoisghrúpa le chéile arís sa Mhuileann gCearr don Fhleadh, arb í seo an dara bliain as a chéile an Fhleadh a bheith ar siúl ar an mbaile. Ó amhránaithe, ceoltóirí agus damhsóirí san iomaíocht go dtí taibheoirí sráide agus ceoltóirí mór le rá ina bpríomhoirfidigh ag na ceolchoirmeacha, tá gach duine ag triall ar an bhFleadh.
RTÉ RADIO 1 AG AN BHFLEADH
The Marty Morrissey Show – Luan Saoire Bainc mhí Lúnasa (7 Lúnasa)
Tabhair cluas do Marty Morrissey ar Luan Saoire Bainc mhí Lúnasa ar The Marty Morrissey Show a bheidh ag craoladh beo ó Chearnóg an Mhargaidh sa Mhuileann gCearr idir 9-11am. Mar is gnáth, beidh meascán breá de chaint, ceol agus siamsaíocht ag Marty.
The Louise Duffy Show – Déardaoin agus Dé hAoine an 10 agus 11 Lúnasa
Beidh The Louise Duffy Show á chraoladh beo ag an bhFleadh Déardaoin agus Dé hAoine an 10 agus 11 Lúnasa idir 12-1pm ón RTÉ Roadcaster, a bheidh suite ag an mbealach isteach chuig Páirc Bhaile an Mhuilinn gCearr. Má bhíonn tú thart, tar anuas againn agus tabhair cúnamh do Louise tús a chur leis an seisiún agus bígí ag faire ar do dheis ticéid chuig ceolchoirmeacha agus málaí féiríní a bhuachan.
Beidh Louise ag seasamh sa Gig Rig tráthnóna Déardaoin freisin sula gcuirfidh tús le scoth an cheoil ó leithéidí Clare-Ann Kearns, Laois Music Generation, The Knights agus neart eile.
Dúirt Louise: “Tá mé ar bís mo chlár a chraoladh ón bhFleadh Cheoil sa Mhuileann gCearr i mbliana. Is ceiliúradh tábhachtach ar cheol traidisiúnta na hÉireann an Fhleadh, agus ó sheisiúin ar na sráideanna go dtí an gig rig, is fada liom go gcloisfidh mé roinnt de na ceoltóirí is mó a bhfuil cion againn i mbun ceoil, mar aon le ceoltóirí eile atá ag teacht chun cinn.”
Céili House & Folk on One – Dé Sathairn an 12 Lúnasa
Cuirfidh Kieran Hanrahan Céilí House i láthair, ar a mbeidh scoth na gceoltóirí agus amhránaithe, beo ó The Gig Rig Dé Sathairn an 12 Lúnasa ón 9-10pm ar RTÉ Radio 1. Craolfar an clár Folk on One le Muireann Nic Amhlaoibh ina dhiaidh sin ón 10-11pm.
RTÉ RAIDIÓ NA GAELTACHTA AG AN BHFLEADH
Ríl an Ródaí BEO – 10, 11 agus 12 Lúnasa
Beidh Ríl an Ródaí BEO, le Neansaí Ní Choisdealbha, ar Raidió na Gaeltachta ón 10-11 Lúnasa ó 3-5pm agus ar an 12 Lúnasa ó 1:20-3pm. Táthar ag súil go meallfaidh an ceiliúradh bliantúil is mó ar domhan ar cheol, teanga, amhrán agus damhsa na hÉireann beagnach leathmhilliún cuairteoir arís i mbliana go dtí an Muileann gCearr, an baile ina bunaíodh Comhaltas Ceoltóirí Éireann, eagraíocht chultúir thraidisiúnta is mó na tíre, sa bhliain 1951, agus beidh RTÉ RnaG ann chun trí chlár de cheol agus d’amhránaíocht thraidisiúnta den scoth a chraoladh.
Is éard a dúirt Joe Connaire, Cathaoirleach Choiste Feidhmiúcháin Fhleadh an Mhuilinn Chearr ag seoladh oifigiúil Fhleadh 2023: “Tá ár seacht ndícheall déanta againn chun go mbeidh fleadh na bliana seo ar an gceann is mó agus ar an gceann is fearr do chách. Is fada linn nó go dtiocfaidh an 6 go dtí an 14 Lúnasa.”