Fiosróidh PJ Gallagher an troid atá ar bun in Éirinn ar son folláine mheabhrach i gclár faisnéise RTÉ nua, PJ Gallagher: Changing My Mind

Clár faisnéise macánta is ea PJ Gallagher: Changing My Mind, ina dtabharfaidh an fuirseoir PJ Gallagher faoi chúrsaí meabhairshláinte in Éirinn a fhiosrú ina bhealach grinn agus croíúil féin.

I ndiaidh dó seal a chaitheamh i Seirbhísí Meabhairshláinte Naomh Pádraig, seal a thug slán é, tabharfaidh PJ Gallagher faoi thasc a mheabhairshláinte agus a fholláin fhadtéarmach a chothú fad a dtabharfaidh sé aghaidh ar an lúcháir chomh maith leis na dúshláin a bhaineann leis an saol ó rugadh a chúpla. Ní beag an scéal é nuair a deir sé féin gur bheag nár “cailleadh le náire” é – bhí an iomarca náire air labhairt faoin dúlagar a bhí air, bhí an oiread sin náire air go raibh sé i riocht lámh a chur ina bhás féin.

Is éard a dúirt PJ Gallagher: “Nuair a thosaigh mé ag tabhairt faoin gcoiméide 25 bliain ó shin níor chuimhnigh mé riamh go mbeinn ag caint faoi chúrsaí meabhairghalair. Go deimhin, a mhalairt a bhí mé ag iarraidh a dhéanamh. Ach tá sé de mhisean anois agam comhrá a chothú agus mo dhícheall a dhéanamh daoine eile a spreagadh chun labhairt faoin chúrsaí meabhairghalair agus an difear atá idir meabhairghalar agus cúrsaí meabhairshláinte a imríonn tionchar orainn ó lá go lá a thuiscint. Tá sé faighte amach agam gur cuma cén chaoi a labhraítear faoi ach labhairt faoi. Níl duine ar bith chun rá leat go n-aireoidh tú níos fearr ach labhairt faoi, ach caithfidh tú tús a chur leis an gcaint chun go mbeidh a fhios agat cén réiteach a bheidh ar do chás-sa. Tá súil agam go gcuideoidh an clár faisnéise seo ar bhealach éigin le daoine é sin a dhéanamh.”

Is ceiliúradh é PJ Gallagher: Changing My Mind ar an dul chun cinn atá déanta aige agus ar a dhúthracht lámh chúnta a thabhairt dóibhsean atá ag déanamh a mbealach trína n-aistear meabhairshláinte féin trí bheith ag obair i gcomhar le grúpaí abhcóideachta agus trína dhícheall a dhéanamh deireadh a chur leis an smál a bhaineann le deacraíochtaí meabhairshláinte. Is smál é a mbaineann baol báis leis, go mór mór d’fhir – féinmharú an chúis is mó báis ag fir faoi 25 ach mar sin féin, mná iad 70% de na daoine a bhaineann leas as seirbhísí Pieta House.

Labhróidh PJ le lucht taighde agus le síciteiripeoirí agus buailfidh sé freisin le grúpaí fear a chothaíonn nasc agus a chruthaíonn spás chun labhairt faoi na ceisteanna a mbíonn orthu aghaidh a thabhairt orthu. Fiosróidh sé an bhfuil Neamhord Hipirghníomhaíochta an Easnaimh Airde ag dul dó féin, tabharfaidh sé faoin aireachas agus faoin teiripe chainte den chéad uair agus fiosróidh sé na cumais a d’fhéadfadh a bheith i gceist le teiripí ceannródaíocha ar nós silicíbine, cóireáil shícideileach atá ag teacht chun cinn.

Is léargas lom é PJ Gallagher: Changing My Mind ar an troid atá ar bun in Éirinn ar son folláine mheabhrach a chraolfar ar RTÉ One agus ar an RTÉ Player Dé Luain an 20 Bealtaine ag 9.35pm.