Bí i gCroílár an Aicsin do Dheireadh Seachtaine Saoire Bainc an Mheithimh le RTÉ

– Deireadh seachtaine lánaicsin de spórt beo geallta, lena n-áirítear Cluiche Cáilithe Euro 2024 na mBan, Craobhchomórtas CLG, URC Beo agus Cluiche Ceannais Shraith na Seaimpíní

– Bain sásamh as an spraoi ag Bloom, le RTÉ One, Radio 1, lyric fm agus RTÉJr a bheidh ag craoladh ón ócáid

– Craolfaidh 2FM clár speisialta ón Forbidden Fruit Festival

– Craolfar portráid údarásach faoin mórphearsa ceoil Rory Gallagher, le míreanna taifeadta nár facthas riamh cheana, ar RTÉ One & RTÉ Player

-Cuirfidh Ceolfhoireann Coirme RTÉ Seó Mórthaibhseach Siansach Rac de cheol Queen i láthair ar RTÉ Radio 1

Tabhair aghaidh ar an samhradh i dteannta RTÉ an deireadh seachtaine seo, Deireadh Seachtaine Saoire Bainc an Mheithimh, leis an mórthairiscint siamsaíochta seo. Níl deireadh leis na himeachtaí spóirt, ceoil ná féilte a bheidh ar siúl ar fud na tíre agus cuirfidh RTÉ ar do chumas a bheith ina gcroílár lena chlúdach ar RTÉ One, RTÉ2, RTÉ Player agus stáisiúin Raidió uile RTÉ Radio.

Cuirfear tús ceart leis an deireadh seachtaine saoire bainc Déardaoin an 30 Bealtaine mar go mbeidh RTÉ ar ais i bPáirc an Fhionnuisce le haghaidh Bloom le Bord Bia. Is é Marty Whelan a chuirfidh tús le sceideal lán go béal cúig lá RTÉ ón bhféile ag 10.00am ar lyric fm. Beidh ceol, comhrá agus aíonna den scoth ina theannta beo ar an gclár go dtí meán lae. Ag 7.00pm ansin ar RTÉ One agus ar an RTÉ Player, cuirfidh Áine Lawlor agus Marty Morrissey roinnt den atmaisféar ón gcéad lá den fhéile os ár gcomhair ó na gairdíní seó atá ar taispeáint go dtí scoth an bhia ó shráidbhaile an bhia. Ar feadh an deireadh seachtaine, beidh rud éigin do gach duine ag RTÉ ón bhféile, ó cheol, comhrá agus cláir bheo den scoth ó na láithreoirí is ansa le daoine ar RTÉ lyric fm; draíocht agus spraoi le RTÉjr agus RTÉ Kids ag stáitse na Budding Bloomers; an clár Countrywide beo ar Radio 1; réamhaisnéisí rialta beo ó Aimsir RTÉ agus neart eile (féach ar an sceideal iomlán thíos).

Leanfar le Samhradh Spóirt RTÉ le deireadh seachtaine saoire bainc lán go béal de spórt beo. Cuirfidh Marie Crowe, le hÁine O’Gorman agus Lisa Fallon ina teannta, clúdach beo i láthair ar

RTÉ2 agus ar an RTÉ Player ar Phoblacht na hÉireann v an tSualainn i gCluiche Cáilithe Euro 2025 na mBan a bheidh ar siúl i Staid Aviva Dé hAoine an 31 Bealtaine (7.00pm).

Ansin Dé Sathairn an 1 Meitheamh, cuirfear tús le dearbaí ríthábhachtach na Mumhan nuair a thabharfaidh siad aghaidh ar Ulaidh beo ó Pháirc Thuamhan (5.15pm, RTÉ2 & RTÉ Player). Craolfar Cluiche Ceannais Shraith na Seaimpíní idir Dortmund agus Real Madrid beo ó Wembley ina dhiaidh sin (7.15pm, RTÉ2 & RTÉ Player) arna chur i láthair ag Joanne Cantwell agus beidh Richie Sadlier agus Shay Given ina teannta. Níos déanaí oíche Dé Sathairn ar RTÉ2 agus ar an RTÉ Player (10.50pm), beidh buaicphointí agus anailís ag Damian Lawlor agus a chuid aíonna dúinn ó chluichí móra Chraobhchomórtas CLG an lae ar The Saturday Game.

Ar an Domhnach an 2 Meitheamh craolfar dhá chluiche ollmhóra i gcluichí Chraobhchomórtas Peile CLG beo ar The Sunday Game Live (1.30pm, RTÉ2 & RTÉ Player) a bheidh á chur i láthair ag Joanne Cantwell. Craolfar an Mhí v Ciarraí ón Uaimh (2.00pm) chomh maith le Doire v Ard Mhacha ó Dhoire (4.00pm) agus ansin tráthnóna Dé Domhnaigh, caithfidh Jacqui Hurley agus a cuid aíonna súil siar ar aicsean go léir an deireadh seachtaine ar The Sunday Game (9.30pm, RTÉ2 & RTÉ Player).

Don té a dtaitníonn cúrsaí staire leo, bí ag faire tráthnóna Dé Domhnaigh ar an gcéad chlár de Invasion: The Normans (6.30pm ar RTÉ One & RTÉ Player), sraith faisnéise ina ndéantar iniúchadh ar ionradh na nAngla-Normannach ar Éirinn sa 12ú haois. Tugtar míreanna taifeadta ar an láthair, athléiriú drámaíochta atmaisféarach agus míreanna comhaimseartha le chéile sa tsraith.

Ar an Luan Saoire Bainc, déanaimid ceiliúradh ar chéad laoch mór giotáir na hÉireann ar an gclár Rory Gallagher: Calling Card (6.30pm, RTÉ One & RTÉ Player). Taispeánfar ábhar cartlainne agus agallaimh le cairde móra agus teaghlach Rory nach bhfacthas riamh cheana, mar aon le míreanna le laochra móra ceoil ina measc Johnny Marr, Brian May agus Bob Geldof. Is portráid údarásach a bheidh ann ar dhuine de na ceoltóirí ab fhearr riamh as Éirinn. Níos déanaí an tráthnóna sin, taispeánfar buaicphointí agus déanfar anailís ar aicsean rugbaí an deireadh seachtaine ar an gclár Against the Head (8.00pm RTÉ2 & RTÉ Player)

Cuirfear clabhsúr leis an deireadh seachtaine fada le dhá chluiche beo sa sacar idirnáisiúnta. Sa chéad chlár díobh sin taispeánfar Cluiche Cáilithe Euro 2025 na mBan idir an tSualainn agus Poblacht na hÉireann ó Stócólm (5.00pm RTÉ2 & RTÉ Player). Ina dhiaidh sin craolfar cluiche dúshláin na bhfear idir Poblacht na hÉireann agus an Ungáir i Staid Aviva (7.30pm RTÉ2 & RTÉ Player).

Tá neart boscraí ar féidir iad a shruthú freisin ar an RTÉ Player, ina measc The Dry agus bunábhar de chuid an Player Charleen and Ellie Go All In. Beidh neart ceoil, spóirt agus comhrá ar fáil ar Raidió RTÉ freisin le sásamh a bhaint as le linn an deireadh seachtaine saoire bainc.

Ar RTÉ Radio 1 Dé Luain, tabharfar ardú meanman dúinn ar The Marty Morrissey Show le caint, ceol agus siamsa ón 9.00am. Cuirfidh Vincent Woods eolas ar chósta, daoine agus dúlra chontae Aontroma ar The County Measure ag 11.00am. Is é Richard Hawley an t-aoi a bheidh ar an gclár Louise Duffy’s Studio Sessions ag 12.00pm. Déanfaidh sé cur síos dúinn ar bheith ag scríobh amhrán, na ceoltóirí a raibh tionchar acu air agus casfaidh sé roinnt de na hamhráin is fearr leis freisin. Ar an gclár Services Ahead ag 1.30pm, caithfidh Brenda Donohue 24 uair an chloig i Stáisiún Peitril Circle K in aice le Guaire, gar don M11, áit a mbíonn daoine ag stopadh ar chúiseanna éagsúla – peitreal, caife agus comhrá. Ar Wildtrack ag 2.00pm, déanfar ceiliúradh ar theacht an Mheithimh le montáis éasca de chaint, fuaimeanna agus ceol. Cuirfidh Ceolfhoireann Coirme RTÉ Seó Mórthaibhseach Siansach Rac de cheol Queen i láthair ag 2.15 agus ag 3.00pm, ar chlár speisialta Nature on One, clúdóidh an bitheolaí Terry Flanagan réimse leathan topaicí ón dóchúlacht go n-athchruthófar dineasáir go dtí na buntáistí a bhaineann le leasú. Suífidh Fiachna Ó Braonáin síos in éineacht le Mike Scott ó The Waterboys ag 4.00pm chun labhairt faoin gcaoi a ndearna siad This is the Sea, agus é beagnach daichead bliain anois ó eisíodh é.

Dé Sathairn agus Dé Domhnaigh, beidh ceol ó lucht RTÉ Rising a bheidh ar stáitse ag Forbidden Fruit Festival na bliana seo (RTÉ 2FM, 3.00pm-6.00pm) ar a chlár ag Graham Smyth. Cuirfidh sé tús leis an gclár le dhá uair an chloig d’amhráin mhóra agus de na hamhráin is fearr le lucht na féile ón dream a bheidh ar stáitse sula gcraolfaidh sé meascán de cheol damhsa reatha agus ón am atá caite san uair an chloig deiridh. Dé Luain, an lá saoire bainc, is é an téama a bheidh ar RTÉ 2FM ná Amhráin Mhóra an tSamhraidh. Beidh na hamhráin is fearr le sprid an tsamhraidh a mhúscailt ionaibh le cloisteáil ar feadh an lae. Cuirfidh Dan Hegarty clár speisialta i láthair freisin ina ndéanfar cur síos ar na chéad halbaim atá eisithe ag ceoltóirí Éireannacha i mbliana agus a rabhthas ag súil go mór leo. Ó Sprints go NewDad, Conchur White go Sick Love, an-bhliain atá ann go dtí seo agus cuirfidh Dan uair an chloig de cheol, agallaimh agus seisiúin inár láthair.

Ar RTÉ lyric fm, beidh na láithreoirí is fearr leis an lucht éisteachta – Marty Whelan, Niall Carroll, Lorcan Murray, Simon Delaney agus Evelyn Grant go léir ag craoladh beo ó Bloom i bPáirc an Fhionnuisce, agus cuirfidh Liz Nolan podchraoladh tumthach den cheol clasaiceach is fearr linn i láthair ar Walk in Beauty, ar féidir le cuairteoirí go dtí an fhéile rochtain a fháil air ar rte.ie agus ar an RTÉ Radio Player trí úsáid a bhaint as cód ar leith QR ar an láthair.

Beidh foireann spóirt RTÉ Raidió na Gaeltachta ag craoladh beo ó Chomórtas Peile na Gaeltachta ar feadh an deireadh seachtaine. Beidh an t-aicsean uile le cloisteáil beo ar RTÉ Raidió na Gaeltachta.