Sonraí faoin gclúdach ar UEFA EURO 2024 – beo agus eisiach – fógartha ag RTÉ
Craolfar gach aon cheann de na 51 cluiche beo agus ar bhonn saorchraolta agus craolfar 45 cluiche díobh beo ar RTÉ2 & ar an RTÉ Player
Craolfar 6 chluiche ceannais na ngrúpaí ar an RTÉ Player & ar an gcainéal RTÉ News
Ar fhoireann RTÉ Sport áireofar an painéalaí nua James McClean a bheidh i dteannta Shay Given, Ray Houghton, Ronnie Whelan, Kevin Doyle, Didi Hamann, Stephanie Roche, Stephen Kelly, Lisa Fallon agus Richie Sadlier
Cuirfear tús le UEFA EURO 2024 an Aoine beag seo, an 14 Meitheamh, nuair a thabharfaidh an Ghearmáin agus Albain aghaidh ar a chéile in München. Craolfar gach aon cheann de na 51 cluiche ar bhonn saorchraolta, beo agus eisiach ar RTÉ agus craolfar 45 díobh beo ar RTÉ2 & ar an RTÉ Player agus craolfar 6 chluiche ceannais na ngrúpaí ar an RTÉ Player & ar an gcainéal RTÉ News. Is iad Peter Collins, Joanne Cantwell, Tony O’Donoghue agus Jacqui Hurley a chuirfidh an t-aicsean ar fad i láthair agus ina dteannta sa stiúideo beidh painéalaithe mór le rá.
Beidh pearsana móra spóirt a bhfuil cáil orthu i measc lucht féachana na hÉireann mar chuid de chlúdach Spórt RTÉ, lena n-áirítear laochra móra Eorpacha na hÉireann – Shay Given, Ray Houghton, Ronnie Whelan agus Kevin Doyle – móide Didi Hamann a d’imir i gCluiche Ceannais i gCorn an Domhain chomh maith le Stephanie Roche, Stephen Kelly, Lisa Fallon agus Richie Sadlier. Beidh James McClean, a bhfuil 100 cluiche imeartha aige le foireann Phoblacht na hÉireann ar an bhfoireann do RTÉ den chéad uair le linn an chomórtais.
Beidh foireann tráchtaireachta RTÉ ar lámh le linn na gcluichí beo ar fad. I measc na dtráchtairí sin beidh Darragh Maloney, Des Curran, George Hamilton, Adrian Eames, John Kenny agus Cathal Mullaney agus i measc na gcomhthráchtairí beidh Ray Houghton, Ronnie Whelan, Stephen Kelly agus Kenny Cunningham.
Beidh scoth na bhfoirne sacair san Eoraip i dteanna na Gearmáine, an tír óstach. Beidh curaidh an chomórtais, an Iodáil, ina measc, an fhoireann a tháinig sa dara háit, Sasana chomh maith leis an bhFrainc, an Spáinn, an Phortaingéil, an Bheilg, an Ísiltír agus, den cheathrú uair, Albain. Beidh cuid de na pearsana sacair is mó ar domhan ag imirt in Euro 2024 – Kylian Mbappe, Cristiano Ronaldo, Jude Bellingham, Virgil van Dijk, Harry Kane, Bruno Fernandes agus Andy Robertson.
Craolfar na cluichí ar fad beo agus beidh siad ar fáil le súil siar a chaitheamh orthu ar an RTÉ Player. Léireoidh Spórt RTÉ go maith os cionn 150 uair de chláracha beo teilifíse i gcaitheamh an chomórtais.
Beidh blaganna, tuairiscí, réamhamharcanna agus anailís bheo ar fáil ar láithreán gréasáin RTÉ chomh maith le buaicphointí gearra na gcluichí ar fad chun go mbeidh ár lucht féachana ábalta a bheith ar an eolas faoin aicsean agus na scéala is déanaí. Coinneoidh Podchraoltaí RTÉ éisteoirí ar an eolas freisin maidir le gach a bhfuil ag tarlú sa Ghearmáin.
Is éard a bhí le rá ag Declan McBennett, Grúpcheannasaí Spóirt RTÉ, “Beidh na Euros ar cheann den cheithre mórcholún maidir le clúdach spóirt RTÉ an samhradh seo agus tá ríméad orainn go gcraolfar gach aon chluiche “beo” mar chuid den ábhar atá againn don lucht féachana agus éisteachta. Is mór an tionchar a d’imir an comórtas seo orainn ar fad ó Stuttgart ar aghaidh agus i bhfianaise go bhfuil an comórtas ar ais sa Ghearmáin i mbliana is cinnte gur comórtas mórthaibhseach amach is amach a bheidh ann a chuirfidh gach a bheidh ag féachaint air agus ag éisteacht leis faoi gheasa.”
Nótaí:
Craolfar na cluichí ón nGrúpa Deiridh a bheidh ag tosú ag an am céanna ar RTÉ2 NÓ ar RTÉ News Channel agus an RTÉ Player. Cluichí i ndiaidh an dara babhta de chluichí Grúpa le deimhniú.