Foilsíonn RTÉ a Thuarascáil Bhliantúil 2023

GLANEASNAMH €9.1 MILLIÚN Á THUAIRISCIÚ AG RTÉ IN 2023 – BLIAIN DHÚSHLÁNACH DON EAGRAÍOCHT

LAGHDÚ AR IONCAM Ó CHEADÚNAIS TEILIFÍSE, MAR AON LE MÉADÚ AR CHOSTAIS OIBRIÚCHÁIN AGUS AR CHRAOLADH IMEACHTAÍ SPEISIALTA A CHUIR LE hEASNAMH NA BLIANA 2023

Chun féachaint ar Thuarascáil Bhliantúil 2023 RTÉ, téigh chuig https://about.rte.ie/reports-and-policies/annual-reports/

Déanfaidh RTÉ Tuarascáil Bhliantúil agus Ráitis Airgeadais Chomhdhlúite an Ghrúpa don bhliain dar chríoch an 31 Nollaig 2023 a eisiúint inniu.

>>> Tuarascáil Bhliantúil RTÉ 2023 go hachomair:

IONCAM IOMLÁN: Tháinig laghdú €3.7m ar ioncam iomlán (Ceadúnas Teilifíse/Ioncam Tráchtála) idir 2023 agus 2022 (€344.0 milliún in 2023 i gcomparáid le €347.7 milliún in 2022).

AN TÁILLE CHEADÚNAIS: Bhí an t-ioncam ón táille cheadúnais a fuair RTÉ sa bhliain 2023 €17.3 milliún níos ísle ná mar a bhí sa bhliain 2022, ó tharla go raibh tionchar diúltach ag conspóid íocaíochtaí RTÉ ar dhíolacháin ceadúnas teilifíse. Cé go ndearnadh an laghdú sin a fhritháireamh beagán leis an €15 milliún breise i maoiniú eatramhach, leithdháileadh an maoiniú breise sin cheana féin i bpleananna 2023. Ciallaíonn an maoiniú eatramhach sin gur tháinig laghdú €2.3 milliún (€193.3 milliún i gcomparáid le €195.6 milliún) ar ioncam ó Cheadúnais Teilifíse.

IONCAM TRÁCHTÁLA: B’ionann an t-ioncam tráchtála €150.7 milliún in 2023 agus laghdú 0.9% bliain ar bhliain (2022: €152.1 milliún). Ba é an phríomhchúis leis sin an laghdú ar Thrádáil Teilifíse arna fhritháireamh ag ioncam Neamhthrádála Eile de réir mar a leanann RTÉ ag éagsúlú a ioncaim.

COSTAIS OIBRIÚCHÁIN: Tháinig ardú €9.3 milliún bliain ar bhliain (€341.9 milliún in 2023 i gcomparáid le €332.6 milliún in 2022) ar chostais oibriúcháin, gan Imeachtaí Speisialta san áireamh, de réir mar a tháinig comhaontú pá 2022 le TUG i bhfeidhm agus mar a bhog geilleagar na hÉireann chuig timpeallacht bhoilscithe ard. Rinne RTÉ foráil freisin do shuimeanna breise a bhaineann le himscrúdú leanúnach na Roinne Coimirce Sóisialaí ar stádas ÁSPC conraitheoirí.

IMEACHTAÍ SPEISIALTA: Tháinig ardú €0.7 milliún ar chostais na nImeachtaí Speisialta in 2023 (€7.4 MILLIÚN IN 2023 i gcomparáid le €6.7 milliún in 2022) mar gheall ar níos mó gníomhaíochtaí amhail Corn Domhanda FIFA na mBan, Corn Rugbaí an Domhain, Cluichí Cáilithe na hEorpa agus cuairt Uachtarán na Stát Aontaithe Joe Biden in 2023 le hais Chorn Domhanda FIFA agus Sraith Náisiún UEFA in 2022.

COSTAIS A BHAINEANN LE PEARSANRA: Tháinig ardú €9.8 milliún ar na costais a bhaineann le Pearsanra mar gheall ar an gComhaontú Pá a thángthas air i mí na Samhna 2022, an méadú ar sholáthar an chonraitheora agus ar na hincrimintí pá a dámhadh. Rinneadh iad sin a fhritháireamh leis an stop a cuireadh ar earcaíocht a fógraíodh mar fhreagairt ar an laghdú ar dhíolacháin táillí ceadúnais. Tar éis ardú suntasach ar chostais fuinnimh sa bhliain 2022, tháinig laghdú €1 milliún ar chostais fuinnimh sa bhliain 2023 de réir mar a tháinig laghdú ar phraghas an mhargaidh mórdhíola le linn 2023.

TRÉDHEARCACHT: Den chéad uair riamh, agus i gcomhréir leis an ngealltanas a thug Príomh-Stiúrthóir RTÉ, Kevin Bakhurst roimhe seo, d’fhoilsigh RTÉ ina thuarascáil bhliantúil tuilleamh an deichniúr láithreoirí is airde tuarastal don bhliain chomh maith le sonraí luach saothair chomhaltaí buana a Fhoirne Ceannaireachta.

IARMHÉIDEANNA AN AIRGID THIRIM: B’ionann iarmhéideanna iomlána an airgid thirim ar an 31 Nollaig 2023 agus €78.7 milliún (2022: €114.0 milliún). Is ionann sin agus laghdú €35.4 milliún agus tharla sé go príomha mar gheall ar an laghdú a tháinig ar leibhéal díolachán táillí ceadúnais i ndiaidh chonspóid íocaíochtaí RTÉ mar aon le gluaiseachtaí diúltacha caipitil oibre i rith na bliana.

GLANEASNAMH: Ba ionann an Glaneasnamh tar éis cánach agus Míreanna Eisceachtúla don bhliain agus €9.1m (- €2.8m in 2022).

Dúirt Cathaoirleach Bhord RTÉ, Terence O’Rourke: “Cé gur deis é foilsiú na tuarascála seo machnamh a dhéanamh ar an mbliain dhúshlánach a bhí ag RTÉ in 2023, táimid dírithe go mór ar an obair thábhachtach atá faoi lán seoil anois chun an eagraíocht a athrú ó bhonn. Le tacaíocht ón ngealltanas maoinithe ilbhliantúil a d’fhógair an Rialtas i mí Iúil, tá RTÉ ag bogadh ar aghaidh le straitéis uaillmhianach nua cúig bliana. Tá an Bord tiomanta a chinntiú go mbeidh na caighdeáin is airde rialachais chorparáidigh agus trédhearcachta mar bhonn taca leis an obair sin.”

Dúirt Príomh-Stiúrthóir RTÉ, Kevin Bakhurst: “Ba bhliain dheacair í 2023 dúinn ar fad anseo in RTÉ agus don iliomad daoine a chuir muinín ionainn. Mar fhreagra air sin, trí leasuithe fadréimseacha agus suntasacha, thug mé, in éineacht le m’fhoireann ceannaireachta agus Bord RTÉ, aghaidh ar na príomhcheisteanna ceann ar aghaidh agus bhí mé tiomanta don chlaochlú a theastaíonn ó RTÉ a sholáthar chun iontaoibh agus muinín a chothú arís, go hinmheánach agus go seachtrach. Trí chlár oibre leasuithe nach bhfacthas a leithéid riamh cheana, tá trédhearcacht níos fearr agus cinnteoireacht níos déine curtha i bhfeidhm againn agus tá níos mó smachta againn ar chúrsaí airgeadais, fad a ndírímid ar an todhchaí agus a gcomhlíonaimid ár n-uaillmhian do RTÉ. Táimid buíoch díobhsan go léir a d’íoc a gCeadúnas Teilifíse le linn na tréimhse sin.

Mar atá ráite go minic agam, ar cheann de na hábhair míshásaimh is mó atá agam nuair a bhreathnaím siar ar an mbliain seo caite ná go raibh obair chrua agus tiomantas ár bhfoirne agus ár gcomhpháirtithe san earnáil chruthaitheach agus an iliomad éachtaí atá bainte amach acu ar an aer, ar an scáileán agus ar líne, agus i réimsí eile, fágtha faoi smál ag an méid a tháinig chun solais. Creidim go bhfuil athrú tagtha air sin i ndiaidh bliain inar chuir RTÉ spórt beo dochreidte, iriseoireacht iniúchta ríthábhachtach, nuacht agus anailís thábhachtach, plé agus díospóireacht tharraingteach, drámaíocht agus siamsaíocht iontach bhunaidh as Éirinn, ceol agus taibhithe beo iontacha, cláracha fíorasacha den scoth, agus go leor eile, ar fáil i mBéarla agus i nGaeilge mar gheall ar chomh dírithe agus a bhíomar ar fhreastal ar ár lucht féachana agus éisteachta.

Cé go bhfuilimid tiomanta i gcónaí do dhul i ngleic le príomh-shaincheisteanna, trínár straitéis cúig bliana a chur i gcrích, táimid ar bís faoin méid a d’fhéadfadh a bheith i ndán do RTÉ amach anseo. Táimid buíoch as an maoiniú ilbhliantúil rialtais a chuirfidh ar ár gcumas pleanáil chun cinn agus ár bhfís a bhaint amach eagraíocht ábhartha a bhfuil meas ag daoine uirthi a dhéanamh de RTÉ, eagraíocht a thugann an tír le chéile i gcás ócáidí agus imeachtaí tábhachtacha náisiúnta, a chruthaíonn cláracha agus ábhar seirbhíse poiblí atá tábhachtach agus tarraingteach, a sholáthraíonn luach ar airgead, agus eagraíocht a bhfuil muinín ag cách aisti arís. Táim féin agus m’fhoireann tiomanta don obair a theastaíonn a dhéanamh a dhéanamh chun go dtarlóidh sé sin.”

>>> Éachtaí RTÉ in 2023

Leagtar béim sa Tuarascáil Bhliantúil freisin ar éachtaí RTÉ in 2023, lena n-áirítear na 10 n-éacht thíos:

• Ar RTÉ a craoladh 42 de na 50 seó is mó ar breathnaíodh orthu ar an teilifís in Éirinn sa bhliain 2023, agus i measc na 20 clár ab fhearr bhí RTÉ News, an Corn Domhanda Rugbaí, Cluichí Ceannais CLG na hÉireann, Kin, na Sé Náisiún agus Room to Improve.

• D’éirigh le Late Late Toy Show RTÉ, lenar bhain téama sióg, an misean a bhí aige a chur i gcrích, ba é sin lúcháir na Nollag a scaipeadh ar chách, agus bailíodh €3.6 milliún don RTÉ Toy Show Appeal le linn an chláir ar ar fhéach 1.7 milliún duine.

• Ba í 2023 an bhliain ba mhó riamh ag an RTÉ Player, nuair a rinneadh 105 milliún sruth arb ionann sin agus 35 milliún uair an chloig, agus bhain milliún úsáideoir aonair úsáid as in aghaidh na míosa.

• Bhuaigh Sinéad O’Connor an chéad ghradam riamh do Shár-Albam Éireannach an RTÉ Choice Music Prize, i gcomhar le IMRO & IRMA, dá halbam I Do Not Want What I Haven’t Got.

• Bhí Ceolfhoireann Coirme RTÉ 75 bliain ar an bhfód agus rinneadh sin a cheiliúradh le taibhithe i rith na bliana, lena n-áirítear comhshaothar leis an impreasóir snagcheoil agus blues atá bunaithe sna Stáit Aontaithe, David O’Rourke agus The Delta Blues Project, mar chuid d’Fhéile an Choláiste Ollscoile, Baile Átha Cliath, agus arbh é Morgan Freeman a bhí ina fhear oinigh an tí.

• Chun comóradh a dhéanamh ar dheireadh Dheich mBliana na gCuimhneachán chraol RTÉ sraith de chláracha faisnéise suntasacha, lena n-áirítear The Silent Civil War, sraith dhá chlár a d’fhéach le deireadh a chur leis an gciúnas 100 bliain a bhain le himeachtaí an Chogaidh Chathartha.

• Chuir RTÉ agus South Wind Blows Ireland 100: An Old Song Resung, i láthair freisin, ceolchoirm bheo chun comóradh a dhéanamh ar 100 bliain de Stát na hÉireann i dteannta

taibheoirí agus rannpháirtithe lena n-áirítear Damien Dempsey, Aiden Gillen, Tolü Makay, Colm Mac Con Iomaire, Síle Denvir, Bláth na hÓige, Liam Ó Maonlaí, Iarla Ó Lionáird, Loah, Martin Hayes, FeliSpeaks, Diarmaid Ferriter, Sally Mulready OBE, London Irish Pensioners Choir agus Dermot Kennedy.

• Rinne RTÉ News tuairisciú cuimsitheach ar imeachtaí nuachta sa Mheánoirthear, ar ghéarchéim RTÉ, ar thriail dúnmharaithe Ashling Murphy, ar chíréibeacha Bhaile Átha Cliath agus ar imeachtaí suntasacha aimsire, agus rinne News2day, seirbhís nuachta RTÉ atá dírithe go sonrach ar leanaí, 20 bliain ar an bhfód a cheiliúradh.

• Choinnigh Aip RTÉ News a háit mar an aip nuachta is fearr in Éirinn.

• Bhain 315 chlár a craoladh ar RTÉ deimhniú Albert amach in 2023, méadú ó 111 chlár in 2022. Ina measc sin bhí sraitheanna amhail The Late Late Show, Today, Prime Time, The Tommy Tiernan Show, The Rugby World Cup agus The Nobody Zone.

Is féidir teacht ar Thuarascáil Bhliantúil RTÉ 2023 ina hiomláine – agus an leagan Béarla agus an leagan Gaeilge a íoslódáil – ag https://about.rte.ie/reports-and-policies/annual-reports/.

CRÍOCH