Déanfaidh RTÉ craoladh cuimsitheach ar Bhuiséad 2025 ar fud a ardáin dhigiteacha, ar an raidió agus ar an teilifís

Déanfaidh RTÉ craoladh cuimsitheach ar Bhuiséad 2025 ar fud ardáin dhigiteacha, ar an raidió agus ar an teilifís Dé Máirt an 1 Deireadh Fómhair agus cuirfear anailís agus tuairisciú fairsing ar fáil i mBéarla agus i nGaeilge araon. Ó thús na maidine, déanfaidh RTÉ News mionchraoladh ar Bhuiséad 2025 ar líne agus ar chainéil meán sóisialta RTÉ News. Craolfar aitheasc an Aire Airgeadais ar Bhuiséad 2025 agus an t-aitheasc ón Aire Caiteachais Phoiblí agus Athchóirithe beo ó Dháil Éireann ar RTÉ Radio 1, ar RTÉ One, ar an RTÉ Player, ar RTÉ News Channel agus ar RTÉ Raidió na Gaeltachta.

Cuirfear tús leis na haithisc faoin mBuiséad a chraoladh ar an teilifís ag 12.40pm ar RTÉ One agus ar RTÉ News Channel, nuair a chuirfidh David McCullagh agus Sharon Ní Bheoláin an craoladh beo ar Bhuiséad 2025 i láthair ó Dháil Éireann chomh maith le hanailís ón stiúideo le painéal aíonna. Gheofar tuairimí ó dhaoine le linn an chláir faoi bhearta an Bhuiséid de réir mar a tharlaíonn siad beo ó lár chathair Bhaile Átha Cliath nuair a bheifear ag labhairt le grúpaí sainleasa agus gheobhaidh Comhfhreagraí RTÉ don Iarthar, Pat McGrath, tuairimí daoine ón láthair i nGaillimh.

Craolfar clúdach beo d’aithisc an Bhuiséid ar chlár speisialta níos faide de News at One le Rachael English ar RTÉ Radio 1 a thosóidh ag 12.45pm agus a bheidh ar siúl go dtí 3.30pm. Mar chuid den chlár craolfar aitheasc an Aire Airgeadais Jack Chambers agus aitheasc an Aire Caiteachais Phoiblí agus Athchóirithe Paschal Donohoe. Beidh Rachael English ag caint leis an bhfreasúra freisin chun a dtuairimí agus anailís láithreach a fháil amach. Ar Drivetime Budget Special, arna chur i láthair ag Cormac Ó hEadhra, déanfar anailís ar na príomhábhair chainte ó fhógra an bhuiséid ó 4.30pm. Agus beidh tuilleadh díospóireachta ó ar fud an speictrim polaitíochta ar an gclár Late Debate le Colm Ó Mongáin beo ón 10pm.

Ar chlár RTÉ Raidió na Gaeltachta, Lá na Cáinaisnéise, arna chur i láthair ag Máirín Ní Ghadhra, craolfar clúdach ar Bhuiséad 2025 beo ó Theach Laighean ó 1.30pm ina mbeidh anailís ó na painéalaithe seo, an comhairleoir cánach Ciarán Ó Feinneadha, an t-iriseoir Áine Ní Chiaráin, Ceannasaí Fiontair agus Scoil na Gaeilge in Ollscoil Chathair Bhaile Átha Cliath, Ciarán Mac an Bhaird, eacnamaí agus iar-Stiúrthóir na meithle machnaimh ceardchumainn, Institiúid Taighde Eacnamaíochta Nevin, Tom Healy, agus Tuairisceoir Polaitíochta RTÉ Raidió na Gaeltachta Cuan Ó Seireadáin.

Leanfar leis an gclúdach ón 5pm ar an gclár, Tús Áite, a bheidh á chur i láthair ag Fachtna Ó Drisceoil beo ó Theach Laighean.  Ar an bpainéal beidh an craoltóir gnó agus podchraoltóir Conall Ó Móráin, beidh Emer Ní Bhrádaigh, Ollamh Cúnta in Ollscoil Chathair Bhaile Átha Cliath agus Julian De Spáinn, Ardrúnaí Chonradh na Gaeilge. Déanfar anailís ar na himpleachtaí agus ar na drochiarmhairtí polaitiúla a d’fhéadfadh a bheith mar thoradh ar na cinntí a fhógrófar sa Bhuiséad agus gheofar tuairimí ó ionadaithe poiblí i leith na gcinntí sin sa dá chlár.

Cuirfear clúdach cuimsitheach, idir an nuacht atá díreach tagtha isteach agus anailís mhion, ar fáil ar Bhuiséad 2025 ar aip RTÉ News agus ar RTÉ.ie/news ó thús an lae. Coinneofar súil i mblag beo a bheidh ar siúl i gcaitheamh an lae ar na forbairtí is déanaí go léir ó luath ar maidin de réir mar a fhógraíonn an Rialtas a phlean airgeadais. Cuideoidh iriseoirí RTÉ ar líne linn ciall a bhaint as an bplean sin agus míneoidh siad a bheidh i gceist leis do gach duine. Is féidir leosan ar mhaith leo fáil a bheith acu ar cheannlínte tábhachtacha an lae príomhphointí ‘Sracfhéachaint’ RTÉ a leanúint, agus beidh clúdach agus anailís fhairsing le fáil ar chainéil meán sóisialta RTÉ News, lena n-áirítear tuairimí ón bpobal. Is féidir le lucht leanúna RTÉ News ar na meáin shóisialta ceisteanna buiséid a sheoladh isteach freisin agus a tabharfaidh saineolaithe airgeadais freagra orthu i mblag beo Ceisteanna & Freagraí. Beidh sruthanna beo ar fáil de chlúdach teilifíse agus raidió RTÉ d’úsáideoirí ar fud an domhain tríd an aip RTÉ News, ar an RTÉ Player agus ar an RTÉ Radio Player.

Léireoidh Nuacht RTÉ/TG4 clár speisialta uair an chloig do TG4 ar lá an bhuiséid. Cuirfear tús leis an gclár, Buiséad 2025 ar TG4 ag 2.30pm ar a mbeidh painéal d’aíonna sa stiúideo agus ó chian i mbun mionscrúdaithe agus anailíse ar na bearta de réir mar a fhógrófar iad agus is í Beirní Ní Chuinn a chuirfidh an clár i láthair. Ar an gclár Nuacht RTÉ le TG4 ag 5.40pm ar RTÉ One, tabharfar achoimre agus tuairimí ar na bearta a fógraíodh agus cuirfidh Eimear Ní Chonaola tuairimí na ndaoine ó ar fud na tíre i láthair lucht féachana Nuacht TG4 ag 7pm. Ar deireadh, déanfar mionscrúdú níos déine ar impleachtaí Bhuiséad 2025 ar an gclár 7Lá arna chur i láithreoir an ag Beirní Ní Chuinn ag 8pm ar TG4.

Tabharfar achoimre ar phríomhfhógraí an bhuiséid agus cuirfear clúdach cuimsitheach ar Bhuiséad 2025 ar fáil ar Six-One News níos faide, arna chur i láthair ag Sharon Tobin agus David McCullagh. Tabharfaidh Ray Kennedy an t-eolas is déanaí don lucht féachana maidir le tuairimíocht faoi na bearta airgeadais ar an gclár Nine O’Clock News. Ar an gclár Prime Time Budget Special, leanfaidh Miriam O’Callaghan agus Sarah McInerney leis an anailís ar fhógraí an lae. Ceisteoidh siad an tAire Airgeadais Jack Chambers agus urlabhraí airgeadais Shinn Féin, Pearse Doherty. Roinnfidh painéal ar a mbeidh daoine den phobal a dtuairimí maidir le bearta an bhuiséid, agus cuirfear anailís shaineolach ó KPMG ar fáil ina dhiaidh sin.

An mhaidin i ndiaidh an Bhuiséid, pléifear ar an gclár Morning Ireland na príomhábhair chainte ar RTÉ Radio 1 agus ar an RTÉ News Channel agus níos déanaí ag 10am, beidh an tAire Airgeadais Jack Chambers agus an tAire Caiteachais Phoiblí agus Athchóirithe Paschal Donohoe i dteannta Claire Byrne sa stiúideo don eagrán bliantúil glaoigh isteach speisialta don bhuiséad. Mar a bhíonn i gcónaí, tabharfar cuireadh don lucht éisteachta an chláir Today with Claire Byrne a gcuid ceisteanna faoi Bhuiséad 2025 a chur go díreach chuig na hAirí.