Déanfaidh an scríbhneoir agus podchraoltóir Blindboy Boatclub bunús, forbairt agus oidhreacht chultúir ré na Luath-Chríostaíochta in Éirinn a fhiosrú ina chlár faisnéise nua Blindboy: The Land of Slaves and Scholars. Craolfar an clár faisnéise ag 10.15pm Déardaoin an 21 Samhain ar RTÉ One agus ar an RTÉ Player.
Ní chreideann Blindboy féin in aon dia ná reiligiún, ach mar sin féin socraíonn sé bunús agus forbairt na Luath-Chríostaíochta in Éirinn, na ndíthreabhach, na naomh agus na mainistreacha a chíoradh agus é ag iarraidh a fháil amach cérbh iad na daoine sin a raibh tionchar ollmhór acu, ní hamháin ar chultúr na hÉireann, ach ar an Eoraip ar fad le linn ré na meánaoise.
Ceisteoidh Blindboy stair luath-mheánaoise na tíre le hionchur ó shaineolaithe agus ó staraithe áitiúla, Manchán Magan, an Dr Daniel Curley, an Dr Elizabeth Boyle agus an Dr Niamh Wycherley ina measc. Nochtfar seoda na tíre in Blindboy: The Land of Slaves and Scholars, seoda amhail liagchiorcail ársa, oileáin na Sceilge agus láthair ársa oilithreachta Loch Dearg i nDún na nGall. Cuirtear an cheist sa chlár faisnéise seo agus fuaimrian a chum Blindboy féin sa chúlra: cén tionchar a bhí ag misinéirí, díthreabhaigh agus mainistreacha Críostaí na hÉireann ar thraidisiún scríbhneoireachta na tíre?
Is éard a dúirt Blindboy: “Is scríbhneoir mé atá faoi gheasa ag traidisiún scríbhneoireachta na hÉireann. Creidim gur dlúthchuid den traidisiún sin ré na Luath-Chríostaíochta in Éirinn, agus airím míshuaimhneach faoi sin mar nuair a smaoinímse ar an Luath-Chríostaíocht smaoiním ar an Eaglais Chaitliceach agus nuair a smaoiním ar an Eaglais Chaitliceach ritheann drochíde agus leatrom liom. Is ionann an chontrárthacht sin agus bac idir mé agus a bheith mórtasach as an tréimhse sin de stair na tíre.
Táim ag iarraidh a fháil amach faoi na mainistreacha, faoin méid a rinneadh iontu ar son na litríochta agus faoin seanchas lenar bhain. Táim ag iarraidh aithne a chur ar na naoimh. An raibh a leithéidí ann i ndáiríre? Cérbh iad na daoine a chruthaigh na lámhscríbhinní maisithe, cé a chur fúthu ar oileán amach ó chósta Chiarraí agus a mhair i gclocháin choirceogacha? An raibh siad craiceáilte?”
Craolfar Blindboy: The Land of Slaves and Scholars, arna léiriú le tacaíocht ó chiste Fuaim agus Fís Choimisiún na Meán, ag 10.15pm Déardaoin an 21 Samhain ar RTÉ One agus ar an RTÉ Player.
CRÍOCH
ÍOMHÁNNA: https://we.tl/t-Pl3Jz3MLb5
Tuilleadh eolais: Éadaoin Nic Giolla Chomhaill, Cumarsáid RTÉ, eadaoin.nicgiolla@rte.ie
