– Cuirfear an díospóireacht ar fáil le hateangaireacht bheo i dTeanga Chomharthaíochta na hÉireann (ISL) ar Chainéal RTÉ News agus ar an RTÉ Player.
Tá Prime Time RTÉ chun Díospóireacht Dheiridh na gCeannairí d’Olltoghchán 2024 a óstáil oíche Dé Máirt, an 26 Samhain, díospóireacht a thabharfaidh deis eile do vótálaithe cluas éisteachta a thabhairt do phríomhphearsana na polaitíochta in Éirinn.
Arna chur i láthair ag Miriam O’Callaghan agus Sarah McInerney, beidh Simon Harris Fhine Gael, Micheál Martin Fhianna Fáil agus Mary Lou McDonald Shinn Féin páirteach sa chraoladh beo. Gealltar cur agus cúiteamh domhain agus diancheistiúchán le linn na díospóireachta ar na príomhcheisteanna a mhúnlóidh todhchaí na hÉireann, agus ardán á chur ar fáil don chéad Taoiseach eile a fhís a roinnt leis na toghthóirí.
Mar chuid de thiomantas leanúnach RTÉ don uileghabhálacht, beidh ateangaireacht bheo i dTeanga Chomharthaíochta na hÉireann mar chuid de Prime Time Leaders’ Debate chun a chinntiú go mbeidh fáil ag ár lucht féachana ó phobal na mBodhar agus na Teanga Comharthaíochta ar an díospóireacht.
Is éard a dúirt Miriam O’Callaghan roimh Dhíospóireacht na gCeannairí, ”Táim ag tnúth go mór le díospóireacht na gceannairí seo – bíonn na díospóireachtaí sách dian i gcónaí ar gach duine a bhfuil baint acu leo, go háirithe na ceannairí – ach bíonn siad suimiúil agus tarraingteach i gcónaí agus tugann siad deis don lucht féachana léargas dlúth agus pearsanta a fháil ar an triúr ceannairí.”
Ag labhairt di faoin díospóireacht, is éard a dúirt Sarah McInerney, “Beidh díospóireacht na gceannairí Prime Time ar siúl trí lá roimh lá na vótála, tráth a mbeidh go leor daoine ag déanamh suas a n-intinn faoin té a dtaitneodh leo ceannasaíocht a ghlacadh ar an gcéad rialtas eile. Beidh sé ar an gcéad agus an t-aon díospóireacht idir an triúr atá san iomaíocht d’oifig an Taoisigh. Is mian le daoine a fháil amach cé a réiteoidh an ghéarchéim tithíochta, cé a bheidh in ann dul i ngleic leis an gcostas maireachtála in Éirinn agus cé a rachaidh i ngleic le liostaí feithimh sna hospidéil. Beidh Miriam agus mé féin ag obair le chéile chun freagraí a fháil do dhaoine ar na príomhcheisteanna sin, agus go leor eile.”
Bí linn agus muid beo ar RTÉ One, ar RTÉ News Channel agus ar an RTÉ Player ag 9:35pm Dé Máirt an 26 Samhain don ócáid ríthábhachtach seo i dtimthriall toghcháin 2024.