Scannáin iontacha na Nollag fógartha ag RTÉ
10 scannán á gcraoladh den chéad uair ar theilifís na hÉireann ar RTÉ an Nollaig seo
Breis is 150 scannán ar fáil lena sruthchraoladh ar an RTÉ Player
Is é inniu an tríú lá de sheachtain na bhfógraí maidir le sceideal na Nollag, agus is léir go mbeidh tú in ann tú féin a chaitheamh siar ar an tolg, babhla grán rósta a bheith le do thaobh agus sásamh a bhaint as na scannáin iontacha ar fad a chraolfar ar fud RTÉ le linn aimsir na Nollag. I gcaitheamh na Nollag, craolfaidh RTÉ 10 scannán den chéad uair riamh ar theilifís na hÉireann ar fud RTÉ One, RTÉ2 agus an RTÉ Player lena n-áirítear That They May Face the Rising Sun, Top Gun: Maverick agus Soul. Beidh breis is 150 scannán nua agus clasaiceach ar fáil lena sruthchraoladh ar an RTÉ Player, lena n-áirítear na fadscannáin Éireannacha So This is Christmas, Who We Love agus Lies We Tell. Idir na scannáin sin a mbaintear sult astu i gcónaí aimsir na Nollag agus eisiúintí nua, beidh scannán ann do gach duine den teaghlach!
10 scannán a chraolfar den chéad uair ar theilifís na hÉireann
Tá ríméad ar RTÉ na scannáin dhochreidte a chraolfar den chéad uair riamh ar theilifís na hÉireann a fhógairt, idir scannán a fuair ardmholadh ó na léirmheastóirí agus scannáin a bhfuil an-ghean go deo orthu. Bí réidh le sásamh a bhaint as fanacht sa bhaile ag féachaint ar scannán aicsin, scannáin dhrámaíochta chroíúla agus scannáin bheochana.
Níl sé i bhfad ó bhí That They May Face the Rising Sun le feiceáil sa phictiúrlann agus beidh sé i measc na scannán sin a chraolfar den chéad uair ar theilifís na hÉireann an Nollaig seo. Is cóiriú é an scannán ar úrscéal iomráiteach John McGahern den teideal céanna, faoi Joe agus Kate Ruttledge a fhágann Londain chun cur fúthu i bpobal beag taobh locha in Éirinn.
Tabharfaidh muintir Crawley cuairt ar dheisceart na Fraince in Downton Abbey: A New Era, nuair a fhágtar villa ag an gCuntaois Dowager.
Scannán eile a eisíodh le gairid agus a bheidh ar fáil ar RTÉ an Nollaig seo is ea Where the Crawdads Sing ina n-insítear scéal Catherine a chaithfidh aire a thabhairt di féin ó tharla gur thug a muintir cúl di agus í an-óg.
An bhfuil fonn ort a bheith i gcroílár an aicsin? Cuirfidh Maverick oiliúint ar ghrúpa de na céimithe is fearr le go mbeidh siad réidh do mhisean ardphróifíle in Top Gun: Maverick.
Beidh ar an gcine daonna aghaidh a thabhairt ar dhineasáir in Jurassic World Dominion ach an mbeidh siad in ann an ré nua seo a sheasamh agus an lámh in uachtar ar fháil ar na neacha móra seo?
Iarrfaidh Spider-Man cúnamh ar Doctor Strange agus é ag iarraidh go ndéanfaidh an domhan mór dearmad gurb é Peter Parker in Spider-Man: No Way Home.
Bainfidh duine ar bith a dtaitníonn scannán grinn lán aicsin leo sásamh as The Lost City nuair a fhuadaíonn billiúnaí an t-úrscéalaí Loretta Sage agus é ag lorg taisce faoi cheilt.
Craolfar neart scannáin eile a mbainfidh an teaghlach go léir sásamh astu den chéad uair riamh ar theilifís na hÉireann an Nollaig seo. Casfar Joe orainn ar dtús, múinteoir banna meánscoile atá an-tógtha go deo leis an snagcheol in Soul, agus ansin gheofar amach faoi Gru agus é ina leaid óg 12 bhliain d’aois, tráth a raibh brionglóidí móra aige in Minions 2: The Rise of Gru. Tabharfaidh Helen faoi mhisean le muinín an phobail a chothú arís i sárlaochra in Incredibles 2.
Scannáin Mhóréilimh
Tá sceideal iontach de scannáin mhóréilimh fógartha ag RTÉ freisin a choinneoidh siamsaíocht le cách. Téigh ar thóir eachtraíochta arís le Indiana Jones in Indiana Jones and the Temple of Doom, Indiana Jones and the Last Crusade agus Indiana Jones and the Kingdom of the Crystal Skull nó báigh tú féin i ndomhan diamhair na spiaireachta i scannáin chlasaiceacha Bond lena n-áirítear No Time to Die, Casino Royale agus Skyfall. Beidh do chroí i do bhéal le linn an scannáin lán aicsin a mbíonn an-tóir air aimsir na Nollag, Die Hard 2.
Bainfidh an teaghlach ar fad sult as scannáin bheochana iontacha amhail Finding Dory, Paddington agus Toy Story 3. Nó b’fhéidir go bhfuil sé in am súil eile a chaitheamh ar scannáin chlasaiceacha amhail Casablanca nó The Graduate, a chraolfar ar RTÉ an Nollaig seo.
Scannáin Chlasaiceacha na Nollag
Craolfar rogha de scannáin chlasaiceacha na Nollag ar RTÉ le spiorad na Nollag a mhúscailt ionainn ar fad. Bain sásamh as an draíocht a bhaineann le White Christmas agus Willy Wonka and the Chocolate Factory, scannáin a mbainfear spraoi astu beag beann ar aois. Bain sásamh arís as an scéal a mhairfidh go deo It’s a Wonderful Life, agus inseofar scéal corraitheach faoin teaghlach agus faoin dara seans a thapú in Jack Frost. Beidh neart geáitsíocht Nollag ar bun in Jingle All the Way agus fear ar a mhíle dícheall ag iarraidh an féirín
Nollag is fearr a fháil dá mhac roimh an lá mór. Más ag lorg scéal grá atá tú bainfidh tú sásamh as na scannáin Christmas at Maple Creek agus Christmas Setup .
RTÉ Player
Mura beidh tú ábalta féachaint ar na scannáin beo beidh tú ábalta iad a shruthú ar an RTÉ Player i ndiaidh dóibh a bheith craolta. Mura bhfuil do dhóthain ansin agat beidh meascán de scannáin agus fadchláracha faisnéise amhail Brooklyn, Intermission, So This is Christmas, Who We Love, Lies We Tell agus go leor leor eile ar fáil ar an RTÉ Player.
Chun sceideal mionsonraithe agus níos mó de na teideal a fhógrófar a fheiceáil, is féidir leat féachaint ar liosta ábhair Nollag RTÉ a bheidh ar fáil sna laethanta amach romhainn.
-CRÍOCH- Tuilleadh Eolais:
Caoilinn Putti, Preasoifigeach RTÉ | Caoilinn.putti@rte.ie
Maureen Catterson, Bainisteoir Cumarsáide RTÉ, ar an Teilifís, ar an Raidió agus Ar Líne | maureen.catterson@rte.ie