Tá sé fógartha gurb í Siobhán McSweeney a chuirfidh The Traitors Ireland RTÉ i láthair

Tá sé fógartha ag RTÉ inniu gurb í an t-aisteoir, láithreoir agus duine de réaltaí Derry Girls, Siobhán McSweeney a chuirfidh The Traitors Ireland i láthair nuair a chraolfar an tsraith ar RTÉ One agus ar an RTÉ Player in 2025. Tá lucht féachana an domhain mhóir faoi gheasa ag an tsraith mhóréilimh seo, lena n-áirítear leaganacha na Ríochta Aontaithe, na Stát Aontaithe agus na hÍsiltíre, ar leaganacha iad a bhfuil gradaim buaite acu. Déanfar na Traitors Ireland a taifeadadh ar an láthair in Éirinn agus beidh iomaitheoirí ó gach cearn den tír páirteach inti. Reáchtáladh glao náisiúnta níos luaithe i mbliana ag lorg iarratais ó dhaoine ar spéis leo a bheith páirteach sa tsraith.

Is éard a dúirt Siobhán: “Tá an-tóir ag an saol is a mháthair agus agam féin ar Traitors, mar sin, nuair a cuireadh an cheist orm leagan na hÉireann a chur i láthair thapaigh mé an deis. Táim ag súil le casadh leis na Fíréin dhílse agus na Fealltóirí breátha. Tá muintir na hÉireann go maith ag an gcur i gcéill agus aoibh an gháire ar a n-aghaidh agus sílim go mbeidh an leagan seo an-speisialta ar fad dá bharr. Agus tá an t-ádh dearg orm go mbeidh mé gar don aicsean ar fad.”

Is éard a dúirt Steve Carson, Stiúrthóir Físe RTÉ: “Táimid ag súil go mór The Traitors Ireland a chur os comhair lucht féachana agus éisteachta RTÉ agus tá an-áthas orainn go mbeidh Siobhán i lár an aicsin. Is aisteoir iontach cumasach í a bhfuil sárfhéith ghrinn inti agus atá ábalta tabhairt faoi réimse leathan ábhar. Tá a fhios againn go mbeidh gné an-speisialta ag baint le leagan na hÉireann den chluiche iontach muiníne agus calaoise seo dá barr.”

Kite Entertainment a léireoidh an tsraith do RTÉ, a bhfuil an fhormáid ar cheadúnas acu ó All3Media International.

Dúirt Darren Smith, MD Kite Entertainment, “Tá lúcháir orainn i gceanncheathrú Kite go mbeidh Siobhán ag cur The Traitors Ireland i láthair. Táimid an-tógtha go deo léi ó chonaic muid i dtosach í i bpáirt na Siúrach Michael in Derry Girls agus tá a fhios againn go mbeidh dlúthpháirt aici ina chinntiú go mbeidh leagan na hÉireann de The Traitors thar a bheith siamsúil, drámatúil, agus thar aon ní eile, Gaelach amach is amach.”

22 duine nach bhfuil aithne ar bith acu ar a chéile a bheidh páirteach sa chomórtas réaltachta síceolaíoch lán teannais seo. Tiocfaidh siad le chéile i gcaisleán amuigh faoin tír chun feall a imirt agus bob a bhualadh ar a chéile agus iad ag iarraidh muinín a chur sna daoine cearta… iad ar fad ag súil le €50,000 a bhuachan. Ina measc, áfach, beidh fealltóirí nó na Traitors, a fhéachfaidh le duine de na himreoirí a dhúnmharú mar dhea agus faoi cheilt gach oíche. Is faoi na fíréin, nó na Faithfuls, a bheidh sé a dhéanamh amach cé hiad na Traitors agus iad a dhíbirt as an gcluiche sula ndúnmharaítear iad féin.

Beidh ar an ngrúpa tabhairt faoi Mhisin gach lá agus iad ag obair i gcomhar chun tuilleadh airgid a chur leis an duaischiste. Beidh deis acusan a n-éiríonn leo fanacht sa chluiche go dtí an deireadh an t-airgead sin, a d’athródh an saol dóibh, a bhuachan, ach má éiríonn le Traitor é a dhéanamh chomh fada le deireadh an chluiche is aige nó aici sin a bheidh an duais.

Craolfar The Traitors Ireland ar RTÉ One agus ar an RTÉ Player in 2025.

CRÍOCH

ÍOMHÁNNA: https://we.tl/t-1YFe3FizZx

Sonraí an ghrianghrafadóra a ghlac an grianghraf de Shiobhán McSweeney: Phil Sharp

Tuilleadh eolais:

Maureen Catterson, Bainisteoir Cumarsáide RTÉ, ar an Teilifís, ar an Raidió agus Ar Líne | maureen.catterson@rte.ie

Nótaí d’Eagarthóirí

Marc Pos agus Stiúrthóir Cruthaitheach IDTV Jasper Hoogendoorn i gcomhar le hAonad Cruthaitheach RTL a chruthaigh agus a d’fhorbair The Traitors (teideal na hÍsiltíre: De Verraders). Tá an-tóir ar an bhformáid go hidirnáisiúnta ó seoladh an tsraith san Ísiltír ar RTL in 2021 i bhfianaise go bhfuil 30 leagan ar leith déanta di agus sraitheanna nua á ndéanamh díobh sin. I measc na leaganacha idirnáisiúnta a rinneadh ag úsáid na formáide sin tá leagan na Stát Aontaithe don tseirbhís sruthaithe NBC Universal Peacock a bhuaigh Emmy agus an leagan do BBC One sa Ríocht Aontaithe a bhuaigh BAFTA agus a raibh 8 milliún duine ag breathnú ar bhabhta ceannais shéasúr 2. Beidh an triú, an ceathrú agus an cúigiú séasúr á ndéanamh de leagan na Stát Aontaithe agus tá coimisiúnú déanta ar an gceathrú séasúr de leagan na Ríochta Aontaithe chomh maith le leagan a mbeidh daoine cáiliúla páirteach ann.

Tá go leor gradam buaite ag an tsraith seo a bhfuil an-tóir ag an lucht féachana uirthi agus ainmníodh The Traitors arís le déanaí mar fhormáid K7 na bliana in 2024 agus bronnadh Gradam Formáid Idirnáisiúnta C21 ar an bhformáid don Óstach is Fearr i bhFormáid Teilifíse. Bronnadh duais Rose d’Or nó “an Rós Órga” don tSraith Siamsaíochta agus Réaltachta is Fearr ar leagan na hÍsiltíre De Verraders roimhe sin.