Fógartha ag RTÉ gurb é Aengus Cox Comhfhreagraí Talmhaíochta agus Gnóthaí Tomhaltóireachta nua RTÉ.
Tá áthas ar Nuacht RTÉ a fhógairt gurb é Aengus Cox atá ceaptha ina Chomhfhreagraí Talmhaíochta agus Gnóthaí Tomhaltóireachta nua. Tá Aengus ina iriseoir ilmheán le RTÉ faoi láthair agus tá sé ag obair le RTÉ News ar an raidió, ar an teilifís agus ar líne ó 2012 i leith.
Rinne Aengus tuairisciú do phríomhchlár nuachta raidió RTÉ Morning Ireland, rinne sé eagarthóireacht ar an gclár agus chuir sé i láthair freisin é. Ina thuairisceoir do Morning Ireland, chlúdaigh sé ábhair amhail táirgeadh bia, cúrsaí timpeallachta, cúrsaí bithéagsúlachta agus chuir sé gnéchláir imscrúdaithe i láthair go rialta ar na cúiseanna atá le harduithe géara ar chostas árachais mhótair agus dliteanais phoiblí.
D’oibrigh Aengus roimhe sin ina thuairisceoir gnó do RTÉ News. Chlúdaigh sé réimse leathan ábhar sa ról sin, lena n-áirítear airgeadas pearsanta, tithíocht, an costas maireachtála agus chuir sé sraith fhairsing i láthair ar an mBreatimeacht, sraith inar scrúdaíodh an tionchar a bhí ag imeacht na Ríochta Aontaithe as an AE ar earnálacha éagsúla amhail an earnáil talmhaíochta agus an earnáil TF.
Thug sé tuairiscí freisin as Londain i rith an tsamhraidh ar olltoghchán na Breataine agus ar Pharlaimint na hEorpa i Strasbourg. Thaistil sé go dtí an tSúdáin le déanaí, áit a raibh sé ar dhuine den líon beag iriseoirí ón iarthar a thuairiscigh ó laistigh den tír féin faoin léirscrios a tharla mar gheall ar an gcogadh cathartha leanúnach ansin i sraith speisialta d’ardáin uile RTÉ News atá á chraoladh an tseachtain seo.
Chomh maith le Morning Ireland a chur i láthair, chuir sé European Parliament Report i láthair ar an teilifís agus bhí sé ina láithreoir ionadaíochta ar This Week agus ar News at One ar RTÉ Radio 1.
Sular thosaigh sé ag obair le RTÉ, bhí Aengus ina thuairisceoir agus ina láithreoir le East Coast Radio ina chontae dúchais i gCill Mhantáin. D’óstáil sé clár cúrsaí reatha deireadh seachtaine ar an stáisiún, clár inar pléadh na saincheisteanna a mbíonn ar dhaoine i gceantair uirbeacha agus tuaithe araon sa chontae aghaidh a thabhairt orthu.
Tá BA Onóracha ag Aengus sa Ghearmáinis agus sa Pholaitíocht, chomh maith le Céim Mháistreachta le céadonóracha ó UCD i Staidéar Réigiúnach & Mionlaigh na hEorpa.
I ndiaidh é a bheith fógartha gurb é Comhfhreagraí Talmhaíochta agus Gnóthaí Tomhaltóireachta nua RTÉ, dúirt Aengus Cox go bhfuil sé ar bís tabhairt faoin ról. “Tá feirmeoireacht in Éirinn ag pointe ríthábhachtach anois i bhfianaise go bhfuil brúnna iomaíocha i gceist le príomhspriocanna timpeallachta agus go bhfuil an costas a bhaineann le gnó a dhéanamh ag dul i méid seasta. Tá feirmeoirí ag iarraidh cleachtais chun astaíochtaí carbóin a laghdú a chur in oiriúint go tapa, agus ag an am céanna ní mór dóibh a bheith iomaíoch. Tá súil agam cuairt a thabhairt ar an oiread feirmeacha, gnólachtaí talmhaíochta agus páirtithe leasmhara eile agus is féidir liom chun na scéalta sin a insint de réir mar a bheidh siad ag dul i ngleic leis an aistriú seo.
Tá áthas orm freisin go bhfuil gnóthaí tomhaltóirí chomh lárnach sin sa sainchúram seo mar go mbíonn tionchar aige sin ar gach gné dár saol, lena n-áirítear praghsáil, cealuithe taistil agus cearta tomhaltóirí daoine. Tá dul chun cinn teicneolaíochta an-tairbheach freisin do thomhaltóirí, ag cur éascaíocht agus slándáil ar fáil maidir le gnéithe amhail siopadóireacht ar líne. Táim ag súil leis an gcaoi a dtéann sé sin i bhfeidhm ar thomhaltóirí a fhiosrú, agus, thar aon ní eile, a bheith ag tuairisciú ar an gcaoi le camscéimeanna a sheachaint agus ar an gcaoi le faisnéis agus airgead daoine a choinneáil slán!”
Cuirfidh Aengus tús lena ról nua in Eanáir 2025
– Críoch –
Dáta: Dé hAoine an 20 Nollaig 2024
Nóta d’Eagarthóirí:
Ba ag Joe Mag Raollaigh a bhí ról an Chomhfhreagraí Talmhaíochta agus Gnóthaí Tomhaltóireachta roimhe seo. Ceapadh Joe ina Eagarthóir ar Thuairisciú Polaitíochta an fómhar seo.
Chun breis eolais a fháil déan teagmháil le: Laura Fitzgerald, Bainisteoir Cumarsáide, Nuacht & Cúrsaí Reatha RTÉ | Laura.Fitzgerald@rte.ie