Chuir Dancing with the Stars gáifeacht agus galántacht ar fáil arís oíche Dé Domhnaigh ar RTÉ
Agus na damhsóirí ar fad agus a gcuid páirtnéirí proifisiúnta ag tabhairt faoin stáitse don dara seachtain, chuir Dancing with the Stars oíche dhochreidte ar fáil don lucht féachana leis an ngalamaisíocht agus an draíocht ar fad a bhaineann le damhsa, ar RTÉ One agus ar an RTÉ Player.
Cuireadh tús leis an oíche anocht leis na damhsóirí galánta gleoite ag damhsa in éineacht go paiseanta le hamhrán de chuid Chappell Roan, ‘Pink Pony Club’, agus iad féin pinc gan dabht.
Ba é an fuirseoir Gearóid Farrelly a thug faoin urlár ar dtús anocht. Ba é féin agus a pháirtí Stephen Vincent a tharraing aird an lucht féachana le Cha-cha-cha bríomhar le sár-amhrán The Trammps, ‘Disco Inferno’.
Dúirt an moltóir Loraine Barry: “A leithéid de thús leis an gclár! Meascán dioscó agus cha-cha. Chuadar le chéile go haoibhinn – maith sibh.”
Dúirt an moltóir Arthur Gourounlian “Bhí mé an-tógtha leis. Bhí sé ar nós a bheith ar rollchóstóir. An féidir linn labhairt ar na lámha nathrach seo? Bhí jab le déanamh agat – agus rinne tú é!”
28 bpointe ar fad a bronnadh ar Ghearóid agus Stephen.
Ina ndiaidh sin ba iad an t-amhránaí Mickey Joe Harte agus a pháirtí gairmiúil Daniela Roze a thug faoin urlár le Jeighbh lán le spraoi leis an amhrán ‘Mickey’ le Toni Basil.
Is éard a dúirt an moltóir Brian Redmond: “Dhá sheachtain déanta, dhá dhamhsa dhifriúla… Agus tá an fhadhb fós mar a chéile. Caithfidh sibh slacht a chur air.”
Dúirt an moltóir Karen Byrne, “Is aoibhinn liom an t-amhrán sin. Is breá liom an chaoi ar bhuail sibh faoi. Cé go bhfuil tú ag súil le 10 as 10, mar a fheicim ar do sheaicéad – ní anocht ach b’fhéidir an tseachtain seo chugainn!”
14 phointe ar fad a bronnadh ar Mickey Joe agus Daniela.
Thug réalta TikTok, Kayleigh Trappe agus Ervinas Merfeldas faoi válsa Víneach, damhsa mín maorga le hamhrán Meghan Trainor, ‘Timeless’.
Dúirt Karen, An “Damhsa Meadhránach’ a ghlaoimse air sin. Chaithfeadh sé go bhfuil lagar oraibh? Bhí sé sin thar a bheith láidir do Válsa Víneach.”
Dúirt Arthur, “Bhí sé sin draíochtúil. Thug an ghrástúlacht agus an ghalántacht go domhan eile mé. Bhí sé ar nós síscéil.”
29 bpointe ar fad a bronnadh ar Kayleigh agus Ervinas.
Bhuail an chef cáiliúil, Kevin Dundon agus an damhsóir gairmiúil Rebecca Scott faoin urlár le hamhrán de chuid Gipsy Kings, ‘Volare’ le sár-samba.
Dúirt Loraine, “Cinnte bhí fuadar fúibh. Bhí sibh sciobtha agus snasta ach ní fhaca mé an méid agus a bheinn ag súil leis ó Samba! É sin ráite, is breá liom duine a fheiceáil ag tabhairt faoi rud éigin, agus sin é go díreach a rinne tú anocht a Kevin.”
Dúirt Brian, “Is focal aisteach é íocónach. Bhí an Riverdance íocónach. Bhí Fred agus Ginger – íocónach… Bhí sé íocónach ach ní ar aon bhealach maith. Is dea-scéala anocht é áfach nach bhfuil aon duine ag dul abhaile!”
13 phointe ar fad a bronnadh ar Kevin agus Rebecca.
Thug an t-aisteoir Yasmin Seky agus a páirtí Simone Arena faoi Foxtrot maorga le ‘Birds of a Feather’ le Billie Eilish.
Dúirt Arthur, “Is mór an spóirt tú Yasmin. Ar nós an amhráin – chomh éadrom le cleite – ach domsa, bhí sé seo beagán trom in áiteanna. Tá sibh ag oibriú go hiontach lena chéile.”
Dúirt Karen, “Bhí dánacht ag baint leat an tseachtain seo caite. Ní chaithfidh fáil réidh leis sin díreach mar gheall gur damhsa bálseomra é. Dreas teicniúil agus deacair a bhí anseo, bhí mé an-sásta leis. Tá mé ag iarraidh níos mó spraoi a fheiceáil.”
26 phointe ar fad a bronnadh ar Yasmin agus Simone.
Ansin, rinne an gleacaí Oilimpeach a bhfuil bonn óir buaite aige, Rhys McClenaghan, agus a pháirtí gairmiúil, Laura Nolan Tangó drámatúil agus rithimiúil le ‘Tanguera’ le Sexteto Mayor.
Dúirt Brian, “Damhsa álainn bálseomra.” Ní raibh Brian ró-chinnte faoi chríoch an damhsa agus dúirt sé “chaith tú uait ar an urlár í ar nós seanmhála guail.”
Bhí na deora le Loraine, “Bhí pearsantacht agus drámaíocht anseo ach fós bhí suaimhneas ag baint leis. Chuir sibh bhur gcroí ann.”
32 phointe ar fad a bronnadh ar Rhys agus Laura.
Thug an meitéareolaí Joanna Donnelly agus Maciej Zieba faoin urlár le Válsa in ómós do mháthair Joanna. Dhamhsaigh siad le hamhrán de chuid Barbara Streisand, ‘Moon River’.
Dúirt Karen, “Uaireanta, is é an damhsa an chaoi is fearr chun tú féin a chur in iúl… Bheadh do mháthair bródúil asat.”
Is éard a dúirt Arthur, “Tháinig tú ar ais an tseachtain seo go tréan… Is léir gur chuir tú an obair isteach sa bpíosa seo agus tá a thoradh sin le feiceáil.”
23 phointe ar fad a bronnadh ar Joanna agus Maciej.
Paso doble fuinniúil a thug láithreoir Ireland AM, Elaine Crowley, agus a páirtí, Denys Samson chun stáitse leis an amhrán ‘Standing in the Way of Control’ le The Gossip.
Dúirt Brian, “Bhí torann díoscánach ag cur bearráin orm ar feadh an damhsa ar fad! Ba iad brístí Denys a bhí ann! Elaine – tá tú iontach mar charachtar – tá tú imithe ó bheith cneasta go ceannasach taobh istigh de sheachtain. Caithfear slacht a chur ar rudaí anseo agus ansiúd don tseachtain seo chugainn.”
Chuir Loraine leis agus dúirt, “Ceapaim gur léim tú isteach sa Paso Doble agus an rólimirt a chuaigh leis ach caithfidh tú dul níos doimhne. Go maith…go hálainn.”
23 phointe ar fad a bronnadh ar Elaine agus Denys.
Ina ndiaidh sin, thug an trodaí Oilimpeach Jack Woolley, agus a pháirtí Alex Vladimirov faoi Cha-cha-cha lán le fuinnimh agus brí, ina raibh cora agus castaí a chuirfeadh meadhrán ar do chloigeann leis an amhrán ‘Rush’ le Troye Sivan.
Labhair Brian ar lámha Jack agus chomh fada leo. “Ní fhaca mé lámha chomh fada leo riamh! Tá gach uile rud idir do lámha agus do chosa ar fheabhas ar fad.”
Dúirt Karen, “Bhí tú ag lúbarnaíl an oíche ar fad!” Tá tú ar nós píosa leaisteach!”
32 phointe ar fad a bronnadh ar Jack agus Alex.
Bhí spleodar ag baint leis an Salsa scafánta agus rithimiúil a rinne iar-Miss Universe Ireland, Aishah Akorede, agus a páirtí gairmiúil, Robert Rowinski, leis an amhrán ‘Deep Down’ le Alok, Ella Eyre & Kenny Dope agus Never Dull.
Dúirt Arthur, “Cé thú féin? I ndáiríre? D’oibrigh mé le mainicíní agus spéirmhná cheana – tá do rithim – draíochtúil. Thar a bheith tarraingteach! Tá roinnt oibre ag teastáil ó rudaí áirithe ach ba Salsa snasta a bhí anseo.”
Dúirt Brian, “Seo seachtain an-shuimiúil do na moltóirí mar tá muid ag feiceáil níos mó stíleanna uait. Léirigh tú go bhfuil tú ildánach.”
27 bpointe ar fad a bronnadh ar Aishah agus Robert.
Agus ar deireadh, chuir aisteoir Mrs. Brown’s Boys Danny O’Carroll agus Salome Chachua críoch leis an gclár le damhsa Charleston leis an amhrán ‘Don’t Blame it On Me’ le Michael Bublé.
Dúirt Karen, “Tá an chaint bainte díom – bhí sé iontach!”
Dúirt Arthur, “Chuir tú lúcháir orm Danny Boy!”
36 phointe ar fad a bhronn na moltóirí ar Danny agus Salome.
Leanfar den gháifeacht, den ghalántacht agus den chomórtas iontach seo ar RTÉ One agus ar an RTÉ Player ag 6:30pm Dé Domhnaigh seo chugainn an 19 Eanáir.