Is sraith í seo ina bhfuil príomhpháirt ag Sarah Goldberg agus Susan Stanley, ar dlúthchairde iad san fhíorshaol.

Inniu, d’fhógair RTÉ, IFC agus AMC+ go bhfuil athnuachan le déanamh ar an tsraith dhúghrinn SisterS, a chruthaigh, a scríobh agus ina bhfuil príomhpháirt ag na dlúthchairde iad san fhíorshaol, Sarah Goldberg (Barry), a fuair ainmniúchán Emmy®, agus Susan Stanley.

Deimhnítear go mbeidh na róil chéanna ag Donal Logue agus Sophie Thompson agus iad ag glacadh páirteanna Jimmy agus Sheryl, faoi seach, sa tsraith sé chlár, tríocha nóiméad an ceann. I measc na réaltaí eile, tá Sonja Smits, Barbara Brennan, Jim Annan, Dylan Taylor, Vanessa Matsui, Peter Keleghan agus Linda Kash.

Tá scannánú ar siúl faoi láthair i gCeanada, agus craolfar SisterS go heisiach den chéad uair in 2026 ar IFC agus AMC + sna Stáit Aontaithe. Craolfar an tsraith in Éirinn ar RTÉ. Is Crave Original í an tsraith i gCeanada agus déanfar í a shruthú ar Crave. Is é Fremantle a láimhseálfaidh díolacháin dhomhanda.

Tosaíonn séasúr a dó i mBaile Átha Cliath, ocht mí dhéag tar éis do Sare (Sarah Goldberg) a deirfiúr Suze (Susan Stanley) a thréigean, agus í díreach tar éis a fháil amach nach féidir léi an páiste fola a theastaíonn uaithi a bheith aici.

Idir an dá linn, i gCeanada, tuigeann Sare go bhfuil sí ag cur dallamullóg cheart uirthi féin faoina féiniúlacht, ach, ceapann sí go bhfuil ag éirí léi agus í ag obair i dtreo ‘saol foirfe’, díreach in am. Nuair a fhágtar cuireadh bainise ó Sare ag leac an dorais ag Suze, téann Suze go Ceanada agus í ag súil le ceangal a bheith aici lena deirfiúr arís. Is ansin ar ndóigh a thosaíonn an dráma idir na deirfiúracha.

Dúirt Justin Healy, Eagarthóir Coimisiúnaithe Coiméide, RTÉ, “Tá ríméad orainn an dara sraith de SisterS a athchoimisiúnú i mbliana agus tá an chuma air gur bliain iontach a bheidh ann do dhrámaíocht RTÉ. Bhí an-tóir ag an lucht féachana ar an gcéad sraith, agus tá mórtas orainn tacú arís le cruthaitheoirí Éireannacha thar a bheith cumasach agus lenár gcomhpháirtithe sa léiriú idirnáisiúnta seo. Is féidir linn anois cur leis an gcéad sraith agus an scríbhneoireacht agus an greann a fhorbairt. Tá RTÉ mórtasach as drámaíocht áitiúil den scoth a chur ar stáitse idirnáisiúnta agus i bhfianaise chaighdeán iomlán an léiriúcháin seo, chomh maith le haisteoirí den scoth, is cinnte go ndéanfar é sin sa dara séasúr de SisterS!”

Dúirt Shannon Cooper, Leas-Uachtarán, Ríomhchlárú, AMC Networks, “Leanfar ar aghaidh le scéal casta ach greannmhar Sare agus Suze. “Tá lúcháir orainn dul i gcomhpháirtíocht, arís, le Sarah Goldberg agus Susan Stanley ar SisterS. De bharr gur cairde cearta iad an bheirt i ndáiríre, tá an splanc fuinniúil atá ag na mná ar an scáileán nádúrtha, mothúchánach agus is furasta dáimh a bheith agat leo. Is cinnte go mbeidh an caidreamh sa dara séasúr thuas seal thíos seal agus táimid ag tnúth go mór leis an turas.”

Dúirt Richard Cook agus Angela Squire, Peer Pressure, “Tá an-áthas orainn go bhfuil athnuachan á déanamh ar an dara séasúr dár gcéad Gheandrámaíocht. Cé go bhfuil na haghaidheanna céanna ann ón gcéad sraith, cheapfá go bhfuilimid ag tosú as an nua arís, agus an scéal anois i gCeanada, áit a bhfuil domhan iomlán nua agus carachtair dhifriúla romhainn. Is iontach an t-aistear a bhí ann ár gcéad seó i gCeanada a chruthú agus táimid buíoch a bheith ag leanúint lenár gcomhpháirtíocht le Christina Jennings agus a foireann iontach in Shaftesbury.”

Dúirt Christina Jennings, Uachtarán agus Cathaoirleach, Shaftesbury, “Bhí an oiread spraoi againn agus muid ag tabhairt Sarah Goldberg ar ais go Ceanada agus fáilte a chur roimh ár dteaghlach léirithe Éireannach do shéasúr a dó. D’éirigh le séasúr a haon greann an-bharrúil go deo a chur ar fáil agus, ag an am céanna, tuiscint uathúil inchreidteachta á coinneáil. Tá mé ag tnúth go mór leanúint ar aghaidh leis sin, ach leis an ngeimhreadh i gCeanada mar chúlra.”

Is iad Susan Stanley, Karen Kicak, Nessa Wrafter agus Paul Howard a scríobh SisterS agus is í Yael Staav a stiúir é. Is iad na léiritheoirí feidhmiúcháin Angela Squire, Richard Cook, Sarah Goldberg, Susan Stanley, Christina Jennings, Scott Garvie, Declan Lowney, Kira Carstensen, Melanie Donkers, Ruth Coady, Justin Healy, agus Karen Kicak.

Is é Paul Howard léiritheoir an scéil. Is iad Alex House agus Paige Haight na léiritheoirí. Is Comhléiriú de chuid Cheanada/ na hÉireann é SisterS, Sraith Bhunaidh IFC agus AMC+, ó Peer Pressure (Éire) agus Shaftesbury (Ceanada) i gcomhar le Mermade agus Crave.

-CRÍOCH-