Cuireann RTÉ clár faisnéise suntasach faoin aisteoir clúiteach Stephen Rea i láthair
Stephen Rea: The Fire In Me Now
Déardaoin an 10 Aibreán, 10:15 i.n., ar RTÉ One agus RTÉ Player
Agus é ina aisteoir leis na blianta fada, tá sé léirithe ag Stephen Rea go bhfuil bua ar leith aige, gur aisteoir ildánach agus bisiúil é. Trí léargas nach bhfacthas riamh cheana ar phearsa cruthaitheach a bhfuil cáil idirnáisiúnta air, déantar iniúchadh sa gclár faisnéise pearsanta seo ar fhorbairt dhearcadh an aisteora trína shaol agus a shaothar.
Sa Stephen Rea: The Fire in Me Now, leantar an seanfhondúir seo de chuid na haisteoireachta agus é ag cleachtadh dráma iomráiteach Beckett Krapp’s Last Tape i mBaile Átha Cliath. Feictear é ag aisteoireacht os a chomhair féin agus é níos óige ar théipeanna fuaime a thaifead sé breis agus deich mbliana ó shin. Rachaimid ar an mbóthar leis, ón áit ar tógadh é i dtuaisceart Bhéal Feirste, go teach a mhuintire ar an taobh ó thuaidh de Bhaile Átha Cliath, go Maida Vale i Londain, áit ar chaith sé tamall ina aisteoir, agus ansin go Dún na nGall, an áit is ansa leis. Taispeántar sa scannán comhráite pearsanta le cairde agus le comhoibrithe lena n-áirítear an t-aisteoir Sinéad Cusack, an stiúrthóir Neil Jordan agus an gníomhaí cearta sibhialta Eamon McCann.
Tugtar léargas dúinn ar an gcuilceach nó “messer”, mar a thugann sé féin air féin, agus ar an agallaí drogallach.“Ar dtús, bhí drogall orm an clár faisnéise a dhéanamh toisc gur duine an-phríobháideach mé, agus chreid mé i gcónaí gur gá níos mó a bheith i gceist leis an saothar ná ego. Ach theastaigh uaim ómós a thabhairt do chairdeas agus do fhlaithiúlacht na gcomhoibrithe a raibh an t-ádh orm iad a aimsiú, amhail Nancy Meckler agus Neil Jordan, a chabhraigh liom go pearsanta agus i mo shlí bheatha. Is Feirsteach bródúil mé, agus tá súil agam go dtaispeánfaidh an scannán seo do dhaoine óga atá ag obair san earnáil gur cuma cárb as duit mar nach bhfuil aon chosán socraithe amháin ann don aisteoireacht. Baineann sé le bheith dílis duit féin.”– Stephen Rea
Úsáidtear sleachta cartlainne ó roinnt de na léirithe is sainiúla seánra de chuid Stephen Rea le breis agus caoga bliain, idir a sceitsí mac léinn in Ollscoil na Banríona i mBéal Feirste sna 1960í (ar annamh a fheictear iad), agus a chomhoibriú tour de force le blianta beaga anuas le Vicky Featherstone, Iar-Stiúrthóir Ealaíne Amharclann na Cúirte Ríoga, Londain. Tugtar léargas sa scannán seo freisin ar an mealltacht dhraíochtúil a bhaineann lena láithreacht cheannasach ar an stáitse agus ar an scáileán.
Tugann an teideal Stephen Rea: The Fire in Me Now aitheantas do na línte deiridh de Krapp’s Last Tape agus taispeánann an clár faisnéise go bhfuil cumhacht léirithe Stephen Rea fós gan mhaolú agus é beagnach seachtó bliain ina aisteoir gairmiúil. Is léiriúchán de chuid Walk on Air Films é The Fire in Me Now arna choimisiúnú ag RTÉ agus BBC Thuaisceart Éireann le cúnamh ó Scáileán Thuaisceart Éireann.
Féach air ar RTÉ One agus ar an RTÉ Player Déardaoin an 10 Aibreán, 10:15 i.n.