Is féidir deireadh a chur leis an tuairimíocht agus leis na rúin anois ó tharla gur chuir RTÉ in iúl inniu gurb é Caisleán Bhaile Shláine an suíomh drámatúil atá roghnaithe le haghaidh The Traitors Ireland, a bheidh le feiceáil ar RTÉ One agus RTÉ Player níos déanaí i mbliana. Tá deireadh anois leis an scannánú ar an leagan Éireannach den tsraith iomráiteach a chuir lucht féachana ar fud an domhain faoi dhraíocht, lena n-áirítear leaganacha a bhuaigh duaiseanna sa Ríocht Aontaithe, sna Stáit Aontaithe agus san Ísiltír.Beidh caisleán cáiliúil na Mí le feiceáil mar shuíomh le haghaidh The Traitors Ireland agus iomaitheoirí ó gach cearn den tír ann, tar éis glao náisiúnta chun iomaitheoirí a roghnú anuraidh.

Feicfear na hiomaitheoirí ag ithe bricfeasta ar bhruach na Bóinne agus iad ag fáil amach lá i ndiaidh lae cé a dúnmharaíodh. Beidh Caisleán Bhaile Shláine ina chúlra agus daoine ag iarraidh an dubh a chur ina gheal ar dhaoine eile, le linn na misean, agus le linn na gcor gan choinne go léir sa chlár seo, atá ar cheann de na cláir réaltachta is tarraingtí. Beidh ballaí arda an chaisleáin go hiontach d’iomaitheoirí agus iad ag pleanáil na chéad ghluaiseachta eile, cibé acu atá siad i gcomhaontas dílis nó ina bhFealltóirí ag cogarnach taobh thiar de dhoirse dúnta.

Cé nach féidir linn na cora go léir sa phlota a roinnt go fóill, tá rud amháin cinnte, ní hamháin go bhfuil baint ag Caisleán Bhaile Shláine le píosa neamhghnách d’oidhreacht na hÉireann; ach tarlóidh díbirtí agus dúnmharuithe ann, a bhainfidh an anáil dínn, agus The Traitors Ireland i lár an aonaigh.

Beidh Siobhán McSweeney ina láithreoir, treoróidh sí an lucht féachana tríd an gcluiche agus coinneoidh sí súil ar an aicsean agus ar na hiomaitheoirí a bheidh ag troid chun fanacht sa chluiche.

Dúirt Gráinne McAleer, Ceannasaí na gClár Faisnéise agus na Sraitheanna, RTÉ, “Tá lúcháir orainn gur thug muintir Mount Charles rochtain dúinn ar cheann de na caisleáin is iontaí sa tír. Ba mhór an phribhléid é a bheith ag obair in áit chomh hiontach.Is bunáit léiriúcháin idéalach é Baile Shláine – tá an caisleán taibhseach oiriúnach, agus is cúlra álainn é Gleann na Bóinne. Is fada linn nó go mbeidh sé ar fáil do lucht féachana RTÉ i mbliana.”

Dúirt Alex Mount Charles, Caisleán Bhaile Shláine, “Cé gurb é Caisleán Bhaile Shláine ár mbaile, tógadh é le haghaidh siamsaíochta. Is forbairt mhealltach é The Traitors a bheith anseo mar go dtugann suíomh drámatúil an chaisleáin agus a thailte anois cúlra do shiamsaíocht den chéad scoth ar an scáileán. Chuir an fhoireann ar fad ag Kite Entertainmen an-obair isteach sa cheann seo.”

Dúirt Darren Smith, Stiúrthóir Bainistíochta Kite Entertainment, “Bhí am iontach againn i gCaisleán Bhaile Shláine ag taifeadadh The Traitors Ireland, is áit fhoirfe é don chlár seo. Táimid ar bís go bhfeicfidh an lucht féachana an ard-drámaíocht go léir ag titim amach agus na himreoirí ag díbirt agus ag dúnmharú a chéile. Idir an dá linn, tá foireann dhícheallach léirithe agus cliar Traitors Ireland ag dul abhaile dá gcéad oíche cheart chodlata, saor ó dhúnmharú.”

Sa chomórtas réaltachta síceolaíochta seo atá lán teannais, tiocfaidh grúpa strainséirí chuig caisleán iargúlta chun cluiche mór lán le caimiléireacht, feallanna agus muinín a imirt, agus iad ar fad ag súil le suas le €50,000 a bhuachan. Ina measc, áfach, beidh fealltóirí nó na Traitors, a fhéachfaidh le duine de na himreoirí a dhúnmharú mar dhea agus iad faoi cheilt gach oíche. Is faoi na fíréin, nó na Faithfuls, a bheidh sé a dhéanamh amach cé hiad na Traitors agus iad a dhíbirt as an gcluiche sula ndúnmharaítear iad féin.

Beidh ar an ngrúpa tabhairt faoi Mhisin gach lá agus iad ag obair i gcomhar chun tuilleadh airgid a chur leis an duaischiste. Beidh deis acusan a n-éiríonn leo fanacht sa chluiche go dtí an deireadh an t-airgead sin, a d’athródh an saol dóibh, a bhuachan, ach má éiríonn le Traitor é a dhéanamh chomh fada le deireadh an chluiche, is aige nó aici sin a bheidh an duais.

Craolfar The Traitors Ireland ar RTÉ One agus RTÉ Player níos déanaí i mbliana.