RTÉ ag lorg Léirithe Spéise le haghaidh róil cuir i láthair ar an aer d’Ábhar RTÉ Radio 1 agus Nuacht agus Cúrsaí Reatha RTÉ
Chun moladh ó Shainchoiste Comhairleach an Rialtais a chomhlíonadh, agus mar chuid de straitéis Treo Nua RTÉ, tá RTÉ ag lorg léirithe spéise ó iarrthóirí do róil cuir i láthair ar an aer ar RTÉ Radio 1 chomh maith le róil cuir i láthair do Nuacht agus Cúrsaí Reatha RTÉ.
Is é RTÉ Radio 1 an stáisiún raidió is mó a mbíonn daoine ag éisteacht leis in Éirinn. Mar ionad barr feabhais sna meáin seirbhíse poiblí, socraíonn raon leathan de chláir RTÉ Radio 1 a bhfuil duaiseanna buaite acu an caighdeán maidir le cáilíocht, éagsúlacht agus tarraingteacht an phobail i raidió na hÉireann. Is é Nuacht agus Cúrsaí Reatha RTÉ an soláthraí is mó d’ábhar nuachta agus cúrsaí reatha atá neamhspleách agus iontaofa in Éirinn ar fud ardáin teilifíse, raidió agus ar líne.
Ba mhaith linn cloisteáil ó láithreoirí a bhfuil suim acu i réimsí lena n-áirítear nuacht, cúrsaí reatha, cláir ghnáthchainte, siamsaíocht, spórt, ceol agus na healaíona. Cruthófar liosta fada de láithreoirí féideartha i ngach ceann de na réimsí atá leagtha amach thuas mar thoradh ar an bpróiseas seo agus déanfar é a athnuachan gach dhá bhliain.
Nuair a bheidh ról cuir i láthair ar fáil, úsáidfear an fadliosta seo mar chuid den phróiseas chun iarrthóirí oiriúnacha a shainaithint. Cruthófar gearrliosta trí úsáid a bhaint as critéir ualaithe atá oiriúnach don ról sonrach.
Tá ról ag RTÉ Radio 1 faoi láthair do láithreoir ar Liveline. Tá folúntas ag Nuacht agus Cúrsaí Reatha RTÉ freisin do Láithreoir a bheadh sannta ar dtús ar chláir agus ar phodchraoltaí nuachta raidió.
Beidh orthu siúd a chuirtear ar an ngearrliosta tabhairt faoi phróiseas roghnúcháin eile le haghaidh róil shonracha. Cuirfear sonraí an phróisis seo in iúl ag an am cuí ach d’fhéadfadh agallamh agus/nó píolótú a bheith i gceist.
Cuirfear fáilte roimh iarratais ó dhaoine a bhfuil dearcadh dearfach acu i leith na Gaeilge.
Tá an éagsúlacht agus an t-ionchuimsiú i gcroílár gach rud a dhéanaimid – bíodh sin ar an aer nó sa chúlra. Táimid tiomanta do thimpeallacht níos ionchuimsithí a fhorbairt agus dul i ngleic le tearcionadaíocht agus an t-ionchuimsiú a leabú i ngach céim d’aistear an fhostaí ag an am céanna.
Cuirimid fáilte roimh iarratais ó dhaoine a bhfuil cúlraí éagsúla acu, gan aird a thabhairt ar chúrsaí inscne, ar chlaonadh gnéis, ar fhéiniúlacht inscne, ar aois, ar thaithí sóisialta, ar chine agus ar eitneacht, ar mhíchumas, ar stádas sibhialta agus teaghlaigh, ar chreideamh reiligiúnach ná ar bhallraíocht den Lucht Siúil.
Má tá suim agat in aon cheann de na deiseanna seo, seol ar aghaidh do litir chumhdaigh, CV agus do spól samplach (10 nóiméad ar a mhéad) ina sonraítear do réimse/réimsí spéise chuig rte.ie/vacancies faoin Aoine, an 4 Iúil 2025.
(CRÍOCH)
Dáta: Déardaoin an 12 Meitheamh 2025
Tuilleadh Eolais:
Maureen Catterson | Bainisteoir Cumarsáide RTÉ, Teilifís, Raidió agus Ar Líne | maureen.catterson@rte.ie
Laura Fitzgerald | Bainisteoir Cumarsáide RTÉ Nuacht & Cúrsaí Reatha | laura.fitzgerald@rte.ie