Seolann RTÉ 90 lá den Spórt náisiúnta agus idirnáisiúnta
Comórtas Eorpach na mBan, Corn an Domhain sa Rugbaí do Mhná, Craobhchomórtas Haca na hEorpa, Craobhchomórtais Uile-Éireann CLG, Craobhchomórtais Lúthchleasaíochta an Domhain, Craobh Oscailte Gailf na hÉireann, Rásaíocht Capaill agus go leor eile á chraoladh saor ó tháille ar RTÉ ar fud na n-ardán go léir.
D’fhógair Spórt RTÉ inniu (Dé Luain, an 23 Meitheamh) tréimhse 90 lá d’aicsean beo saor ó tháille ar an aer a chuirfidh sceitimíní orainn agus sinn ag faire ar fhoirne náisiúnta agus idirnáisiúnta. I gcomhluadar láithreoirí RTÉ, Paul O’Flynn agus Marie Crowe, ag Spórt Éireann don ócáid seolta, bhí lúthchleasaithe agus imreoirí cineálacha éagsúla spóirt, ina measc lúthchleasaíocht, camógaíocht, galf, haca, rugbaí agus sacar.
Beidh siad ar fad ar fáil beo ar RTÉ i rith an tsamhraidh, i bhformáidí físeáin, fuaime agus ar líne le cuid mhór imeachtaí áitiúla, náisiúnta agus idirnáisiúnta spóirt. Beidh spórt na mban chun tosaigh i sceideal spleodrach seo an tsamhraidh agus RTÉ i mbun ceannródaíochta maidir le craoladh nóiméad i ndiaidh an nóiméid ar imeachtaí éagsúla, ina measc Corn Eorpach na mBan, Craobhchomórtas Haca na hEorpa, agus Corn an Domhain i Rugbaí na mBan.
Ag trácht dó ar an séasúr nua, dúirt Declan McBennett, Grúpcheannasaí Spóirt RTÉ: “Is iontach an réimse spóirt atá ar fáil don lucht féachana i mbliana le trí cinn de mhórchomórtais thábhachtacha idir an rugbaí, an haca agus an lúthchleasaíocht ag cur le buaicbhabhtaí chraobhchomórtais uile-Éireann CLG. Is breá an rud freisin, agus is tábhachtach, go mbeidh oiread den bhéim á leagan ar scoth na lúthchleasaithe mná i mbun cineálacha éagsúla spóirt, go náisiúnta agus go hidirnáisiúnta. Cuirfidh na himeachtaí seo dlús breise le spórt na mban i gceartlár an aonaigh i saol na hÉireann ó thaobh feiceálachta agus spéise, maidir le suim a chothú, lucht féachana a mhealladh agus rannpháirtíocht a spreagadh, an tráth céanna a gcuirtear sáriomaitheoirí spóirt na hÉireann i láthair.”
Tosaíonn an t-aicsean le foireann náisiúnta sacair na mban ag imirt cluichí cairdeachais in aghaidh Stáit Aontaithe Mheiriceá i gColorado agus in Ohio ar an 26 agus an 29 Meitheamh sula dtosaíonn Corn Eorpach na mBan san Eilvéis i mí Iúil. Beidh ceithre lá Chraobh Oscailte Gailf KPMG na hÉireann do Mhná as Teach an Chartúin beo ar an RTÉ Player ón 30 Meitheamh agus an dá bhabhta deiridh beo freisin ar RTÉ One agus RTÉ Radio 1.
Athraíonn an bhéim i mí Lúnasa ar ais ar an bhfód dúchais agus cluichí ceannais na gCraobhchomórtas Camógaíochta Uile-Éireann beo ar RTÉ. Leantar ar aghaidh an mhí sin le dhá shárchomórtas i ndiaidh a chéile, iomaíocht ghéar i gCraobhchomórtas Haca na hEorpa agus i gCorn an Domhain sa Rugbaí do Mhná ar an scáileán, agus RTÉ go mórtasach ag seasamh le Mná agus Fir na hÉireann ar feadh an bhealaigh.
Leanann RTÉ de Chraobhchomórtais CLG a chraoladh beo go dtagann cluichí ceannais uile-Éireann san iománaíocht, sa pheil agus sa chamógaíocht as Páirc an Chrócaigh. Beidh cluichí Chorn Tailteann ar fáil freisin ar ardáin RTÉ. Ná caill craoladh comhuaineach ar chluichí CLG i bhformáidí físeáin, fuaime agus ar líne ar fud RTÉ One, RTÉ Player, RTÉ Radio 1, RTÉ Raidió na Gaeltachta, aip RTÉ Radio, RTÉ.ie, agus podchraoladh RTÉ GAA.
Tiocfaidh an bhéim ar an lúthchleasaíocht i mí Lúnasa leis an gCraobhchomórtas Náisiúnta agus i mí Meán Fómhair nuair a bheidh Craobhchomórtas Lúthchleasaíochta an Domhain ar siúl i dTóiceo agus lúthchleasaithe na hÉireann ag súil le boinn eile a chur lena bhfuil ina stór acu cheana féin. Cuireann foireann idirnáisiúnta sacair fhir Phoblacht na hÉireann tús leis an bhfeachtas cáilíochta do Chorn an Domhain le cluichí in aghaidh na hUngáire agus na hAirméine i mí Meán Fómhair.
D’fhógair RTÉ, i gcomhar le Rásaíocht Capall Éireann, 29 lá rásaíochta i mbliana, ar a n-áirítear Dearbaí na hÉireann agus Oaks na hÉireann, Rásaí na Gaillimhe agus Féile Churadh-dhuais na hÉireann. Leanfaidh Jane Mangan agus Ruby Walsh ina mbaill den fhoireann a bheidh ag cur ábhar léargais agus anailíse ar fáil. Craolfar beo ó Sheó Capall Bhaile Átha Cliath idir an 8-10 Lúnasa.
Beidh tráchtaireacht bheo, tuairiscí, agallaimh agus ábhar anailíse ag RTÉ Raidió na Gaeltachta ar chláracha spóirt an deireadh seachtaine, Spórt an tSathairn agus Spórt an Tráthnóna ar an Satharn agus Spórt an Lae ar an Domhnach. Cloisfear daoine a bhfuil iomrá orthu i mbun anailíse ar chluichí peile agus iománaíochta na gcraobhchomórtas idirchontae in éineacht leis na tráchtairí beo ar an raidió. Ó thagann deireadh leis an imirt idir contaetha i ndeireadh mhí Iúil, beidh RTÉ Raidió na Gaeltachta ag díriú ar chraobh na gclubanna, go háirithe ar chlubanna Gaeltachta i dTír Chonaill, i Maigh Eo, i gContae na Mí, i nGaillimh, i gCiarraí, i gCorcaigh agus i bPort Láirge.
Ní fios roimh ré an ní atá ar tí tarlú. Coinnigh súil ar na cluichí ar fad ar láithreán gréasáin Spórt RTÉ agus ar aip RTÉ News le blaganna beo, tuairiscí agus tuairimí. Ar chaill tú aon chuid den aicsean? Féach buaicphointí na gcluichí ar leathanach YouTube RTÉ, RTÉ.ie, RTÉ Player agus aip RTÉ News.
Dátaí do dhialann an tsamhraidh ar RTÉ:
Craobhchomórtais CLG
Cluiche Ceannais Chorn Tailteann: Dé Sathairn, an 12 Iúil
Cluiche Ceannais Iománaíochta na hÉireann: Dé Domhnaigh, an 20 Iúil
Cluiche Ceannais Peile na hÉireann: Dé Domhnaigh, an 27 Iúil
Cluiche Ceannais Camógaíochta na hÉireann: Dé Domhnaigh, an 10 Lúnasa
Corn Eorpach na mBan 2025: 2-27 Iúil
Craobhchomórtas Oscailte Gailf KPMG na hÉireann do Mhná: 3-6 Iúil
Cluichí Cairdeachais fhoireann idirnáisiúnta na hÉireann agus SAM i Sacar na mBan: an 26 agus an 29 Meitheamh
Craobhchomórtas Haca na hEorpa do Mhná: 8-17 Lúnasa
Corn Rugbaí an Domhain do Mhná: 22 Lúnasa go 27 Meán Fómhair
Craobhchomórtas Oscailte Gailf Amgen na hÉireann d’Fhir: 4-7 Meán Fómhair
Craobhchomórtas Lúthchleasaíochta an Domhain: 13 -21 Meán Fómhair
Cluichí Cáilíochta do Chorn an Domhain i Sacar na bhFear
Éire v An Ungáir 7 Meán Fómhair
An Airméin v Éire 9 Meán Fómhair
Rásaíocht Capaill
Dearbaí na hÉireann sa Churrach: 27-29 Meitheamh
Oaks na hÉireann sa Churrach: 20 Iúil
Rásaí na Gaillimhe: 28-31 Iúil
Féile Churadh-dhuais na hÉireann: 13-14 Meán Fómhair
Ráithe den Rath! Sa phictiúr ag seoladh Spórt an tSamhraidh ar RTÉ (clé go deas): Eoghan Frayne, Sam Monaghan, Edel McMahon, Jess Ziu, Amy O’Connor, Marie Crowe, Paul O’Flynn, Sara Byrne, Sarah Torrans, Sarah Hawkshaw, Ellen Curran agus Nicola Tuthill