Petula Martyn ceaptha ag Nuacht RTÉ ina Comhfhreagraí don Iarthar Láir

Tá ríméad ar Nuacht RTÉ a fhógairt go bhfuil an t-iriseoir Petula Martyn ceaptha ina Comhfhreagraí don Iarthar Láir. Beidh Petula ag tuairisciú agus ag cur anailís ar fáil ar ardáin uile Nuacht RTÉ maidir le forbairtí sóisialta, eacnamaíocha, cultúir agus polaitiúla ar fud cheantar an Iarthair Láir, contaetha Luimnigh, an Chláir agus Thiobraid Árann Thuaidh san áireamh.

Thosaigh Petula Martyn ag obair le Nuacht RTÉ in 2011 ina hiriseoir ilmheáin ar an teilifís, ar an raidió agus ar ardáin ar líne. Is í a chuireann an nuacht ghnó i láthair ar Morning Ireland, One O’Clock News agus Drivetime faoi láthair, agus cuireann sí ceannairí sinsearach gnó, eacnamaithe agus lucht déanta beartas faoi agallamh go rialta.

Tá roinnt de phríomhchláir raidió RTÉ curtha i láthair aici freisin, Morning Ireland, This Week agus The Business ina measc, chomh maith le craoladh comhdhálacha páirtithe polaitíochta agus láithreoireacht ar Spórt RTÉ i rith na gCluichí Oilimpeacha.

Is duine mór de lucht tacaíochta Luimnigh í Petula agus tá tuairisciú déanta aici ar bhuanna Luimnigh i gCraobhchomórtais CLG na hÉireann, chomh maith le clár faisnéise ar RTÉ Radio 1, Limerick: Pure Proud, inar léiríodh ríméad agus bród an chontae sin a bhfuil cáil air mar gheall ar an tóir atá ag na daoine ar an spórt.

Thuairiscigh sí freisin ar na holltoghcháin ón Iarthar Láir, ar an toghchán agus ar oirniú an chéad mhéara a toghadh go díreach chomh maith.

Chuir Petula tús lena gairm iriseoireachta san Iarthar Láir, ag tuairisciú do 95FM Limerick Live agus bhí sí ina hiriseoir leis an Limerick Leader ina dhiaidh sin.

Tá Máistreacht san Iriseoireacht aici ó Ollscoil Bhaile Átha Cliath agus céim BA sna Meáin, sa Chumarsáid agus i Litríocht an Bhéarla ó Choláiste Mhuire gan Smál, Ollscoil Luimnigh.

Is éard a dúirt Petula agus í ag labhairt faoina cúram nua: “Agus mé tar éis fás aníos, staidéar a dhéanamh, agus tús a chur le mo chuid oibre sa réigiún seo, tá áthas orm a bheith ar ais chun ról Chomhfhreagraí an Iarthair Láir a ghlacadh. Táim ag súil go mór leis na scéalta atá tábhachtach do mhuintir Luimnigh, an Chláir agus Thiobraid Árann Thuaidh a chlúdach, dúshláin maidir le cúram sláinte, tithíocht, agus bonneagar ina measc, chomh maith le himeachtaí cultúir agus gan amhras, buanna spóirt. Is mór an onóir dom é an deis seo a bheith tugtha dom leanúint den obair iontach atá déanta ag Cathy Halloran le breis is tríocha bliain. Is mór agam an réigiún seo agus muintir an réigiúin seo, agus táim tiomanta dá scéalta a insint le macántacht agus díograis, mar ghuth comhsheasmhach agus iontaofa do Nuacht RTÉ.”

Cuirfidh Petula Martyn tús lena post nua san fhómhar.