Kieran Hanrahan, craoltóir de chuid RTÉ, le dul ar scor tar éis 30 bliain ar Céilí House

Beidh Céilí House deireanach Kieran beo ó Fhleadh Cheoil na hÉireann 2025 Dé Sathairn, 9 Lúnasa

Tar éis tríocha bliain i mbun Céilí House ar RTÉ Raidió 1, d’fhógair an ceoltóir clúiteach agus craoltóir a bhfuil go leor duaiseanna buaite aige, Kieran Hanrahan, inniu go raibh sé ag éirí as a phost leis an gcraoltóir náisiúnta. Craolfar a chlár deireanach Dé Sathairn an 9 Lúnasa, agus críochnóidh sé seal iontach a chuidigh le ceol traidisiúnta na hÉireann a mhúnlú ar na haerthonnta ar fud na hÉireann.

Thosaigh Kieran Hanrahan ag obair le RTÉ den chéad uair in 1992, ag cur Fleadh Club agus Both Sides Now i láthair ar dtús sular shuigh sé os comhair an mhicreafóin do Céilí House in 1995. Tá Céilí House ar an aer ar Raidió RTÉ ó na 1950idí, ach tá a chlár féin déanta ag Hanrahan le tríocha bliain anuas. Thuill an clár clú agus cáil i measc éisteoirí RTÉ Raidió 1 gach deireadh seachtaine mar gheall ar chroíúlacht Hanrahan, a eolas agus a phaisean don cheol, agus an fhíorspéis a bhí aige sna scéalta a bhí á n-insint. Is cinnte go gcloiseann éisteoirí an chuid is fearr de cheol traidisiúnta na hÉireann i hallaí, i dtithe agus in amharclanna ar fud na tíre gach Satharn.

Ag trácht ar é a bheith ag dul ar scor, dúirt Kieran Hanrahan é féin:

“Ba mhór an onóir agus an t-áthas é Céilí House a chur i láthair ar RTÉ Raidió 1 le tríocha bliain anuas. Bhí gach aon oíche ina buaicphointe dom, cibé acu an raibh muid i dteach duine éigin, sa teach tábhairne áitiúil, i halla an pharóiste nó sa Cheoláras Náisiúnta. Táim an-bhuíoch dár n-éisteoirí dílse, agus don iliomad ceoltóirí, amhránaithe agus damhsóirí, ar chuir a gcuid tallainne agus a gcuid flaithiúlachta beocht sa cheol beo. Go raibh maith agaibh ar fad as an tréimhse seo de mo shaol a dhéanamh chomh saibhir, chomh tairbheach agus chomh speisialta sin.”

Dúirt Tara Campbell, Ceannaire RTÉ Raidió 1:

“Tá Céilí House faoi stiúir den scoth Kieran Hanrahan le 30 bliain anuas agus tá sé tar éis seasamh do chraoltóireacht seirbhíse poiblí i mbarr a maitheasa. Is mór an phribhléid é do Raidió 1 go gcuireann ceoltóirí agus taibheoirí fáilte chomh croíúil sin romhainn i gcroílár a bpobail agus go bhfuil muide in ann a gcuid buanna iontacha a roinnt lenár n-éisteoirí dílse. Guímid gach rath ar Kieran i cibé rud atá os a chomhair ina dhiaidh seo agus gabhaimid buíochas ó chroí leis as an méid ollmhór a rinne sé do Raidió 1 thar níos mó ná tríocha bliain.”

Beidh an craoladh deireanach le Hanrahan, clár beo ón Gig Rig ag Fleadh Cheoil na hÉireann i Loch Garman, ar siúl Dé Sathairn 9 Lúnasa agus is cinnte gur deireadh ré a bheidh ann. Beidh scoth na gceoltóirí as Loch Garman ar an gclár, lena n-áirítear ceathairéad píobairí as Loch Garman, ceol ó roinnt de bhuaiteoirí ghradaim an deireadh seachtaine agus aíonna speisialta freisin.