Déanfaidh Katie Hannon cíoradh ar Chartlann Náisiúnta na hÉireann sa tsraith nua
Déanfaidh Katie Hannon cíoradh ar Chartlann Náisiúnta na hÉireann sa tsraith nua
Cuirfear tús le The Records Show Dé Domhnaigh ag 6.30pm ar RTÉ One agus RTÉ Player
Fiosróidh Katie Hannon rúin Chartlann Náisiúnta na hÉireann i sraith nua de The Records Show a bheidh ag tosú an Domhnach beag seo ar RTÉ One agus an RTÉ Player. I dtrí chlár, aimseoidh Katie cáipéisí, nár baineadh leo roimhe seo, as na céadta míle cáipéis atá sa Chartlann Náisiúnta sula rachaidh sí trasna na tíre chun lorg na scéalta taobh thiar díobh a fhiosrú.
In The Records Show rachaidh Katie ó dhromchla na gealaí go buncar Steven Spielberg i gContae Chill Mhantáin agus ansin go croílár earnáil idirnáisiúnta carranna spóirt na hÉireann – Baile na Lorgan, Contae Mhuineacháin. Cloisfidh sí faoi bhreitheamh a raibh bealach an-díreach leis agus a chuid forairdeallaithe morálta, faoi phlean chun leagan na hÉireann de Dhealbh na Saoirse a dhéanamh de Cholún Nelson, faoi dhuine a tháinig isteach sa tír go neamhdhleathach a raibh lón aige leis an Uachtarán agus beidh Lennon agus McCartney araon sa gcéad chlár.
Is spásairí, réalta rac-cheoil, aisteoirí Hollywood agus féastaí ríoga a bheidh faoi chaibidil sna scéalta ón gCartlann a fheicfear sa gclár The Records Show. Ach thar aon ní eile, is faoi mhuintir na hÉireann agus faoin saol a caitheadh in Éirinn an tsraith seo.
Dúirt láithreoir The Records Show, Katie Hannon: “Bhain mé an-sult as bheith ag obair ar an gcéad sraith de The Records Show agus níorbh fhéidir liom fanacht le bheith ar ais sa gCartlann Náisiúnta chun tosú ag obair ar bhaisc nua comhad don dara sraith. Agus leis an méid sin ábhair le roghnú astu, thug an taighde chun solais an oiread doiciméad a raibh baint acu le gach gné de shaol na hÉireann le céad bliain agus roimhe sin fiú, ó ardpholaitíocht agus cúrsaí dlí go rúin teaghlaigh agus tragóidí náisiúnta. Fuarthas roinnt rudaí iontacha amach le linn an aistir sin mar aon le léargas dáiríre a fháil ar rudaí freisin. Bhí sé de phribhléid againn freisin rochtain eisiach a fháil ar an oibríocht dhochreidthe atá i gceist chun daonáireamh 1926, a bhfuiltear ag súil go mór leis, a fhoilsiú an bhliain seo chugainn. Tá súil le Dia agam go mbainfidh daoine an oiread céanna taitnimh as bheith ag breathnú air agus a bhí againne á dhéanamh.
Dúirt Stiúrthóir Chartlann Náisiúnta na hÉireann, Orlaith McBride: “Tá ríméad ar an gCartlann Náisiúnta a bheith i gcomhpháirtíocht le RTÉ chun sraith nua den chlár The Records Show a thaispeáint don lucht féachana san fhómhar. Agus os cionn 60 milliún taifead faoi dhíon amháin, is taisce de stair na hÉireann atá sa gCartlann Náisiúnta a théann siar na céadta bliain anall go dtí an lá atá inniu ann. Nochtfar scéalta atá sna taifid nár insíodh riamh cheana ar The Records Show. Rachfar go domhain sna cáipéisí seo agus mar a chuaigh siad i bhfeidhm ar shaol daoine ar fud na hÉireann. Beidh idir scéalta aisteacha agus dáiríre ann agus tabharfar deis don lucht féachana tuiscint níos fearr a fháil ar ról na Cartlainne Náisiúnta ina cuimhne don Stáit.”
Cuirfear tús leis an dara sraith de The Records Show an Domhnach beag seo ag 6.30pm ar RTÉ One agus RTÉ Player. Midas Productions a léirigh an tsraith arna coimisiúnú ag RTÉ i gcomhar leis an gCartlann Náisiúnta le tacaíocht ón Roinn Turasóireachta, Cultúir, Ealaíon, Gaeltachta, Spóirt agus Meán.
CRÍOCH
Chun tuilleadh eolais nó naisc réamhléirithe a fháil, déan teagmháil le do thoil le:
Sarah Neville, Cumarsáid RTÉ, sarah.neville@rte.ie