Beidh dúnmharú agus greann ó Iarthar na hÉireann – agus an bháisteach – ar an scáileán i Séasúr 2, agus beidh Máiréad Tyers ar an gcliar freisin
Tá bean a bhíonn ag scríobh cholún na marbh, ar dúnmharfóir anois freisin í, ag streachailt le bás a hathar agus tugann sé faoiseamh di a bheith ag marú daoine gránna ina baile beag féin. Éiríonn rudaí níos casta arís an séasúr seo nuair a thagann eagarthóir nua i gceannas ar an bpáipéar nuachta mar aon le dúnmharfóir eile an mbaile.
Beidh Siobhán Cullen (The Dry, Bodkin) i bpríomhról scríbhneoir cholún na marbh, Elvira, i séasúr 2 den tsraith coireachta dúghrinn Obituary, agus beidh Máiréad Tyers (The Walsh Sisters, Extraordinary) ina teannta ina heagarthóir nua ar an bpáipéar áitiúil, The Kilraven Chronicle.
Nuair a fuair Elvira amach sa gcéad sraith nach mbeadh sí le híoc ach ar gach scéala báis a scríobhfadh sí, d’iompaigh sí ar an dúnmharú chun nach mbeadh sí fágtha ar an bpingin dheireanach. Ó fuair sí amach go dtaitníonn sé léi a bheith ag marú daoine, tá Elvira i gcaidreamh nua rómánsúil le comhfhreagraí coireachta an pháipéir, Emerson Stafford (Ronan Raftery) (a bhfuil pleananna agus rúin dá chuid féin aige), agus ag dul i ngleic le bás a hathar. Tá imní uirthi anois go bhfaighfear amach gur dúnmharfóir í ó tharla dúnmharfóir eile a bheith ar an mbaile.
Cuireann an t-eagarthóir aisteach Vivienne (Máiréad Tyers) Elvira agus Emerson in éadan a chéile sa seomra nuachta, agus is beag nach mbíonn an t-am istigh ar Elvira nuair a fhéachann an t-iareagarthóir faoi smál, Hughie (David Ganly), lena thaispeáint gurb ise an dúnmharfóir. Idir an dá linn agus mar a tharlaíonn sé, tá amhras ar an mBleachtaire Rose Mulcahy (Noni Stapleton) go raibh baint ag Elvira le dúnmharú, dúnmharú nach ndearna sí go híorónta.
Rinneadh scannánú ar Obituary idir Bun Dobhráin agus Béal Átha Seanaidh i gCo. Dhún na nGall, agus tá blas Iarthar na hÉireann ar an dúghrinn, an aimsir, agus ar an gclaonadh scéalaíochta atá ann.
Tosóidh Séasúr 2 de Obituary ar RTÉ One Dé Máirt an 14 Deireadh Fómhair ag 22.15 agus leanfaidh na sé chlár go dtí Dé Máirt an 18 Samhain. Beidh gach clár de Shéasúr 2 ar fáil le sruthú ar an RTÉ Player.
-CRÍOCH-
