Scéal dochreidte DJ Carey, a chuaigh ó bheith ina laoch iománaíochta go caimiléir ciontaithe, le hinsint i sraith faisnéise nua RTÉ
Scéal dochreidte DJ Carey, a chuaigh ó bheith ina laoch iománaíochta go caimiléir ciontaithe, le hinsint i sraith faisnéise nua RTÉ
Féach ar an réamhbhlaiseadh fada
Cuirfear tús le DJ Carey: The Dodger ag 9.35i.n. Dé Luain an 24 Samhain ar RTÉ One agus ar an RTÉ Player
Is iad Fine Point Films, a léirigh Kneecap, Quinn Country agus Taking Back Control, a bhí i mbun na sraithe nua faisnéise seo de chuid RTÉ. Déantar cur síos sa tsraith ar bhorradh agus ar mheath an laoich iománaíochta DJ Carey. Dhá chlár uair an chloig an ceann a bheidh sa tsraith agus beidh an lucht spéise in ann féachaint orthu ar RTÉ One agus ar an RTÉ Player.
Ag tosú ag 9.35i.n. Dé Luain an 24 Samhain, léirítear in DJ Carey: The Dodger an dul chun cinn éachtach a rinne an laoch iománaíochta go dtí go raibh muinín agus meas na ndaoine caillte go hiomlán aige nuair a phléadáil sé ciontach i gcaimiléireacht a dhéanamh ar dhaoine a chreid go raibh ailse air agus a thug suimeanna móra airgid dó.
Ó protégé iománaíochta go réalta GAA, bhí luas, scil agus bua DJ Carey níos iontaí ná rud ar bith a chonacthas cheana. Síleadh go forleathan gurbh é an t-iománaí is fearr a bhí riamh ann. Téann DJ Carey: The Dodger i ngleic le cás an fhir a moladh go hidirnáisiúnta agus a raibh aithne air óna chuid inisealacha, go dtí gur admhaigh sé go ndearna sé calaois ar dhaoine agus gur thóg sé na céadta míle euro uathu siúd a chreid go raibh ailse air.
Nochtar scéal casta faoi mhealltacht, uaillmhian agus feall sa chlár faisnéise seo. Taispeántar píosaí scannánaíochta de DJ nár facthas cheana riamh, chomh maith le hagallaimh le híospartaigh, le hiriseoirí spóirt, agus leo siúd is mó a bhfuil aithne acu air.
Anois agus pianbhreith gearrtha ar Carey, tugann an stiúrthóir Trevor Birney (Kneecap, Quinn Country, Michael Lynn: The Fugitive, Taking Back Control) agus an t-iriseoir Eimear Ní Bhraonáin achoimre ar an ísliú céime tubaisteach seo a bhain an mothú as glúin iomlán de lucht leanúna na hiománaíochta, agus as an iliomad íospartach freisin.
Dúirt stiúrthóir Fine Point Films, Trevor Birney: ‘Tá borradh agus meath DJ Carey ar cheann de na scéalta is iontaí atá inste againn riamh. Is scéal faoi mhuinín agus feall é seo, scéal faoi fhear a raibh Dia beag déanta de ina chontae féin agus ar fud na tíre agus a bhain buntáiste as sin gan aon aiféala chun teacht i dtír ar a chuid íospartach. Is a bhuí le misneach na ndaoine a tháinig chun cinn agus a d’inis a scéalta a rabhthas in ann an tsraith seo a chur le chéile. Is é fírinne an scéil go bhfuil a fhios againn go bhfuil go leor íospartaigh eile a d’fhulaing mar thoradh ar an méid a rinne DJ Carey.’
Dúirt Eagarthóir Coimisiúnaithe do Chláir Faisnéise agus do Ghnéchláir RTÉ Gráinne McAleer: “Is deas an rud é a bheith i mbun oibre arís le Trevor Birney, le hEimear Ní Bhraonáin, iriseoir atá lonnaithe i gCill Chainnigh, agus le Jim O’Hagan as Fine Point Films. Léirítear an ghairm éachtach a bhí ag laoch spóirt sa scannán seo. Ní hamháin sin, ach taispeántar an chaoi ar féidir le cáil an fhírinne a chur as a riocht mar aon leis na hiarmhairtí uafásacha a bhíonn i gceist do gach uile duine a mbíonn baint acu leis. Tá muid fíorbhuíoch díobh siúd a ghlac páirt sa tsraith seo agus a d’inis a gcuid scéalta os comhair ceamara den chéad uair.”
Féach ar an gcéad chlár de DJ Carey: The Dodger Dé Luain an 24 Samhain ag 9.35i.n. ar RTÉ One agus ar an RTÉ Player. Beifear ábalta an dara clár a shruthú láithreach bonn i ndiaidh an chéad chláir ar an RTÉ Player nó beifear ábalta féachaint air ar RTÉ One Dé Luain an 1 Nollaig ag 9.35i.n.
CRÍOCH
Dáta: Dé Máirt 18 Samhain 2025
Chun tuilleadh eolais a fháil, chun réamhbhlaiseadh a fháil den chlár faisnéise agus chun iarratais a dhéanamh ar agallaimh – téigh i dteagmháil le Sarah Neville, Cumarsáid RTÉ, sarah.neville@rte.ie
Eolas Cláir:
Clár 1: Dé Luain an 24 Samhain ag 9.35i.n. ar RTÉ One agus an RTÉ Player
Téann DJ ó bheidh ina ‘leaidín beag’ ar an bpáirc go ‘Dia na hiománaíochta’ tar éis dó Craobh na hÉireann a bhuachan cúig huaire agus Sárimreoir Iománaíochta na Bliana a bhaint amach naoi n-uaire. Cé go bhfuil íomhá de dhea-shampla slachtmhar á cothú aige, tosaíonn ráflaí aisteacha ag dul thart faoi.
Clár 2: Dé Luain an 1 Nollaig ag 9.35i.n. ar RTÉ One agus ar an RTÉ Player
Agus é in ard a réime, teipeann ar phósadh DJ agus téann na meáin ina dhiaidh gan stad gan staonadh. Castar an bhean mhór ghnó, Sarah Newman, ar DJ agus meallann saol nua galánta sa K Club é. Ní fada áfach go mbíonn ceisteanna á gcur faoina shláinte agus faoina chuid airgid. Beidh air an píobaire a íoc, luath nó mall.