Tugann The Grinch an svae leis agus é mar théama le haghaidh The Late Late Toy Show 2025
RTÉ One | RTÉ Player
Tugann The Grinch an svae leis agus é mar théama le haghaidh The Late Late Toy Show 2025
Bí ag féachaint anocht ag 9:35pm ar RTÉ One agus ar fud an domhain ar an RTÉ Player
#LateLateToyShow
Is gearr go mbeidh croí mór maith ag daoine fud fad an domhain mar nach fada uainn The Late Late Toy Show 2025! Agus dlaoi mhullaigh á cur ar sheachtain lán le fógraí faoi chláracha na Nollag, tá sé curtha in iúl ag RTÉ gurb é The Grinch é féin, rogha na Nollag i gcónaí, a bheidh mar théama ag Toy Show na bliana seo.
Agus anocht, tabharfar an lucht féachana go Who-ville agus stáitse an Toy Show á athrú isteach ina dhomhan atá lán den diabhlaíocht ghlas agus den draíocht a spreagann scéal de chuid An Dr Seuss How the Grinch Stole Christmas. Bí ag faire amach le haghaidh taispeántais den scoth, neart bréagán agus ócáidí croíúla a chruthaíonn gur féidir leis an nGrinch is cantalaí dá raibh riamh ann a chroí a chur sa Nollaig. Is iad na 300 páiste ó gach cearn d’Éirinn, a bheidh i lár an aonaigh ar an stáitse anocht, agus iad ag taispeáint a mbuanna, a scéalta agus a ngliondar tógálach dúinn ar fad.
Ag labhairt dó roimh chlár na hoíche anocht, dúirt an fear a chuireann The Late Late Toy Show i láthair, Patrick Kielty, “Bhí an Grinch ina chuid tábhachtach den Nollaig domsa i gcónaí agus ó thosaigh mé ag obair mar óstach ar an Toy Show, theastaigh uaim go mbeadh sé páirteach san oíche is fearr den bhliain. Tá mé ag súil go mór le draíocht Who-ville a roinnt le teaghlaigh ar fud na hÉireann ar Toy Show na bliana seo. Tá an seit iontach, tá na cultacha dochreidte agus mar gheall ar na páistí, beidh oíche againn nach ndéanfar dearmad uirthi go deo. Is seó é seo atá lán de chroí, d’áthas agus beagán diabhlaíochta – díreach mar a theastódh ón nGrinch!”
Is é Liam Neeson é féin a dhéanfaidh an tráchtaireacht ag tús sheó mór na bliana seo agus a ghuth taifeadta aige go speisialta do thaispeántas na bliana 2025. Beidh tuilleadh ábhair iontais agus aíonna speisialta á nochtadh i rith na hoíche, lena cinntiú go mbeidh draíocht ann ó thús deireadh.
Tá dearthóirí léiriúcháin RTÉ tar éis seit urghnách a dhearadh, a chuirfidh beocht i Who-ville, an baile iontach a thosaigh amach ar leathanaigh An Dr. Seuss. Idir na tithe ildaite, meidhreacha agus cearnóg an bhaile atá breac le daoine, éiríonn leis an radharc an draíocht a bhaineann le domhan Whos’ a chur in iúl go beacht. Chun cur leis an seit tá gach mionsonra curtha le chéile go cúramach ag Rannóga Feistis agus Smididh RTÉ chun go mbeidh an lucht féachana tumtha i samhlaíocht bhríomhar An Dr. Seuss. Agus mura bhfuil do dhóthain ansin beidh Patrick é féin ag caitheamh uaireanta an chloig sa chathaoir smididh-, chun go mbeidh sé ag teacht le meon Who-ville!
Beidh páistí as gach cearn d’Éirinn ag cur siamsaíochta ar fáil don lucht féachana oíche Dé hAoine trí spraoi agus cruthaitheacht na gcluichí a thaitníonn leo a thaispeáint, rud a chruthóidh neart fuinnimh agus sceitimíní ar an stáitse. Chomh maith leis sin, sa chuid den seó a bhaineann le leabhair agus a mbíonn an-tóir air, beidh léirmheastóirí óga ag roinnt a gcuid tuairimí faoi scéalta éagsúla. Agus clasaicí na Nollag agus amhráin na bliana á gcanadh anseo agus ansiúd, beidh an lucht féachana ag canadh agus ag damhsa sa bhaile!
Beidh liosta de na bréagáin go léir a taispeánadh ar an gclár ar fáil ar shuíomh gréasáin an chláir www.rte.ie/latelate i ndiaidh a chraolta.
Tabharfar na bréagáin go léir a thaispeántar ar an oíche do charthanachtaí.
RTÉ Player
Sruthaigh saor in aisce é ar fud an domhain
Rinneadh 622,000 sruth, an líon is mó riamh, ar The Late Late Toy Show in 2024 as 139 tír.
Sruthaigh The Late Late Toy Show ó pé áit a bhfuil tú anocht ar an RTÉ Player ag 9:35pm.
Cláraigh le cainéal YouTube The Late Late Show do na míreanna is fearr ón gclár.
Cainéil Meán Sóisialta RTÉ
Beidh deis agat an spraoi ar fad sa chúlra a fheiceáil ar na cainéil oifigiúla meán sóisialta. Beidh Aisling Bonner & Hugh Carr ó RTÉ 2FM ag óstáil TikTok Live dátheangach a mhairfidh 30 nóiméad ag 6.30pm Dé hAoine, le pasanna rochtana do gach limistéar! Labhróidh siad le Patrick ar chúl an stáitse, tabharfaidh siad ar thuras tú den seit agus casfaidh siad leis na daoine a thugann an oíche is fearr den bhliain chun fíre.
Is é #LateLateToyShow haischlib oifigiúil an chláir. Is féidir leat cuntais an Late Late Show a leanúint anois díreach lena chinntiú nach gcaillfidh tú soicind amháin féin den oíche is fearr uile den bhliain ar an teilifís – @latelaterte ar TikTok @latelaterte ar Instagram, @RTELateLateShow ar X agus @TheLateLateShow ar Facebook.
Tráchtaireacht Fuaime
Den chéad uair riamh ar RTÉ, beidh Tráchtaireacht Bheo le fáil ar RTÉ One le linn an chraolta, rud a fhágfaidh go mbeidh sé níos inrochtana ná riamh agus go gcinnteofar gur féidir an t-iontas a bhaineann leis a roinnt le cách. Is iad Clara Murray agus Berni Stack a bheidh ina dTuairisceoirí
Fuaime i mbliana. Beidh The Late Late Toy Show le feiceáil arís ar RTÉ One agus ar an RTÉ Player Dé Domhnaigh, 7 Nollag ag 3:10pm le Tráchtaireacht Bheo.
Teanga Chomharthaíochta na hÉireann (TCÉ)
Craolfar an Late Late Toy Show le Teanga Chomharthaíochta na hÉireann (TCÉ) beo ar an RTÉ News Channel agus ar an RTÉ Player. Don tríú bliain, beidh láithreoirí atá Bodhar, Sarah-Jane O’Regan agus Jason Maguire i mbun an chlúdaigh TCÉ – agus beidh siad ag obair leis na hateangairí éisteachta, Ciara Grant agus Lisa Harvey-Coleman. Is fíorcheiliúradh é TCÉ The Late Late Toy Show ar Theanga Chomharthaíochta na hÉireann, tríú teanga oifigiúil na hÉireann. Beidh The Late Late Late Toy Show le TCÉ á athchraoladh freisin i mbloc déanach oíche TCÉ ar an gCéadaoin, 10 Nollag ar RTÉ One.
An RTÉ Toy Show Appeal
Agus é á spreagadh ag Saoirse Ruane, nach maireann, a ndeachaigh a misneach agus a flaithiúlacht i gcionn ar an tír ar fad, tá sé dochreidte go bhfuil €26 milliún bailithe ag an RTÉ Toy Show Appeal ó seoladh é in 2020, mar thoradh ar fhlaithiúlacht na ndaoine fud fad na tíre. Ag obair i gcomhar le Fondúireacht Pobail Éireann, thacaigh na cistí seo leis na céadta carthanas áitiúil agus náisiúnta i ngach contae, chun saol daoine a athrú ó bhonn agus deiseanna a chruthú do na leanaí is mó atá i ngátar.
Sheol Rachael Blackmore RTÉ Toy Show Appeal na bliana 2025 ar Late Late Show na seachtaine seo caite, agus tharraing sí aird ar Ionad Eachaí Jack de Bromhead ag ChildVision, tionscadal atá gar dá croí agus a fhaigheann tacaíocht ón Toy Show Appeal.
Is féidir leis an bpobal síntiús a thabhairt ag www.rte.ie/toyshowappeal, nó ar Revolut Pay, comhpháirtí síntiúis oifigiúil na hachainí.
Craolfar The Late Late Toy Show anocht ar RTÉ One agus ar an RTÉ Player ag 9:35pm.
-CRÍOCH-
Dáta: 5 Nollaig 2025
Grianghraif: Creidiúint íomhá: Andres Poveda Photography
Tuilleadh Eolais: Caoilinn Putti, Ceannasaí Cumarsáide RTÉ | Caoilinn.putti@rte.ie
Nótaí don Eagarthóir:
Is ábhar mórtais do PTSB urraíocht a dhéanamh ar The Late Late Show
Chun tuilleadh eolais a fháil lean The Late Late Show ar líne: Instagram @latelaterte TikTok: tiktok.com/@latelaterte X: @rtelatelateshow Facebook: facebook.com/thelatelateshow YouTube: youtube.com/@rtelatelateshow