Tá Daidí ag dul ag damhsa: Paudie Moloney an dara hiomaitheoir ar fógraíodh go mbeidh sé páirteach i Dancing with the Stars 2026

An bhfuil aon bhaol go seasfaidh sé ar chois duine eile nuair a bheidh Paudie Moloney, laoch The Traitors Ireland, ina iomaitheoir ar Dancing with the Stars, an dara hiomaitheoir a fógraíodh go dtí seo. Beidh an tsraith mhór-ráchairte ar ais ar RTÉ One agus RTÉ Player i mí Eanáir.

Chuaigh Paudie i gcion ar mhuintir na tíre níos luaithe i mbliana ar The Traitors Ireland nuair is mór an glacadh a bhí ag an lucht féachana leis an gcaint dhíreach ó athair an teaghlaigh. Ó bhí an clár sin ar siúl, tá aithne níos fearr arís curtha ag muintir na hÉireann ar Paudie agus gean air ní hamháin ina áit dúchais i Luimneach ach ar fud na tíre go léir. Bhí sé ar an Late Late Show lena mhac Andrew, iomaitheoir eile ar The Traitors Ireland. Beidh sé le feiceáil freisin i bpáirt an Draíodóra in Olly Goes to Oz, geamaireacht na Nollag i mBaile Átha Cliath.

Ag trácht dó ar pháirt a ghlacadh sa séasúr seo de Dancing with the Stars, deir Paudie:
“Tá sceitimíní orm faoi bheith páirteach in Dancing with the Stars, agus beagán imní freisin dá n-admhóinn é. Tá mé ag tnúth go mór lena thriail, ach is mór an t-athrú domsa an t-ábhar glioscarnaí, bréagriocht dhath na gréine, agus na seacainí, ní thuigim go fóill an taobh sin de.

Tá an chlann ar fad ar bís faoi seo, is fada leo go bhfeicfidh siad an seó. Síleann cairde liom go bhfuil mé as mo mheabhair ach tá sceitimíní orthusan freisin. Tá a fhios agam go mbeidh idir áthas agus leathnáire ar chlann mo chlainne ag an aon am amháin.

Bhí an t-ádh dearg orm maidir leis an damhsóir proifisiúnta – ar ndóigh, ní raibh an t-ádh céanna uirthise ach deir sí liom go mbeidh an-spraoi againn ag foghlaim agus ag cleachtadh agus ar an seó. Mar a deirim le Bernadette, mo bhean, rud nua a bheidh ann a bheith ag damhsa gan aon bhraon ólta – ní minic liom damhsa anois murar ar bhainis é nó, ag brath ar an gcás, ar shochraid.Tá mé féin agus Bernadette ag faire ar an seó ó thús. Cé nár chaill mé séasúr ar bith, ní fhéadfainn an difríocht idir Quickstep agus American Smooth a mhíniú duit.

Jennifer Zamparelli agus Laura Fox a chuireann Dancing with the Stars i láthair. Sa tsraith seo ar RTÉ, cuirfear gáifeacht agus galántacht ar fáil gach oíche Dé Domhnaigh ó mhí Eanáir ar aghaidh agus beidh 12 phearsa mór le rá i dteannta damhsóir gairmiúil chun dreas damhsa beo a dhéanamh gach seachtain. Beidh ar gach beirt máistreacht a fháil ar sheánra éagsúil den damhsa gach seachtain, an Charleston nó an Salsa mar shampla, agus ní bhíonn acu ach seacht lá le snas a chur ar an damhsa sula mbíonn orthu é a dhéanamh beo os comhair mhuintir na tíre ar fad.

Beidh gach beirt damhsóirí á marcáil ag painéal ceathrar moltóirí saineolais: Oti Mabuse, Brian Redmond, Arthur Gourounlian agus Karen Byrne, chomh maith leis an lucht féachana ag baile, agus tabharfaidh an bheirt bhuacach corn liathróid ghile na gile leo ag deireadh na sraithe.

Bí ag faire ó Dé Domhnaigh an 4 Eanáir ar aghaidh ar RTÉ One agus RTÉ Player go bhfeictear an spraoi agus an spleodar.