An greann agus an Foxtrot: Michael Fry, fear grinn, an ceathrú hiomaitheoir a fógraíodh maidir le Dancing with the Stars 2026

Ní friochtán a chleachtfaidh Michael Fry, fear grinn agus aisteoir, chomh mór leis na seacainí agus é ar dhuine d’iomaitheoirí an tséasúir nua de Dancing with the Stars a bheidh le feiceáil ar na scáileáin ó mhí Eanáir amach ar RTÉ One agus RTÉ Player. As an Uaimh, Co. na Mí ó dhúchas é Michael a bhí le feiceáil ar Derry Girls agus ar Holding (cóiriú teilifíse d’úrscéal le Graham Norton) agus a scríobh seó grinn dá chuid féin den chéad uair sa bhliain 2025 mar chuid d’Fhéilte Imeallacha i nDún Éideann agus i mBaile Átha Cliath. Tá aithne go fada fairsing ar Michael freisin mar gheall ar sceitsí agus scigaithris ceoil a chuireann sé ar na meáin shóisialta chomh maith le scríbhneoireacht agus

aisteoireacht a dhéanamh le No Worries If Not! clár sceitsí de chuid RTÉ2.Bhí sé ar dhuine d’ambasadóirí Sheachtain na Gaeilge sa bhliain 2025 agus tá sceitseanna agus seónna grinn scríofa agus curtha ar an stáitse i nGaeilge aige. Ag trácht dó ar pháirt a ghlacadh in Dancing with the Stars i mbliana, deir Michael: “Is iontach an rud agamsa a bheith ag foghlaim le damhsa ar bhealach nach dtugann le tuiscint go bhfuil náire an domhain orm. Cuirfidh sé le réimsí eile den saol agam, is cinnte gur fearr a bheidh duine ar stáitse dá mhéid smacht a bhíonn aige ar a cholainn. Damhsóir ab ea Michelle Yeoh ar dtús, sula raibh sí in aon cheann de na radharcanna troda sin sna scannáin aicsin. D’fhéadfadh gur mise a bheadh sa chéad Crouching Tiger, Hidden Dragon eile. Taobh amuigh de bhainis anois agus arís, níl aon chleachtadh agamsa ar dhamhsa ó tháinig mé in aois fir, ach dhéanainn damhsa Gaelach agus scileanna stáitse nuair a bhí mé óg. Bhuaigh mé duais mar gheall ar an damhsa Gaelach, an t-aon duais a bhuaigh mé riamh. B’fhéidir go bhfuil damhsa sna cosa agam, ach nuair a thagann an chuid eile de na géaga i gceist… Tá ugach á thabhairt ag mo chuid cairde uilig dom maidir le páirt a ghlacadh sa seó agus iad uilig ag tnúth le bheith sa lucht féachana go bhfeicfidh siad ag damhsa beo mé. Tá siad in éad liom agus deis a bheith agam foghlaim le damhsa ó dhamhsóir proifisiúnta, bheadh siad crosta liom dá ligfinn uaim an seans iontach seo. Tá mé neirbhíseach faoi oiread oibre a tharraingt ar mo cholainn, ní hé go bhfuil mise aclaí ar bhealach ar bith. Níor thug mé aire cheart do mo cholainn leis na blianta, is gearr go bhfeicfimid cé mhéad dochair atá déanta agam. Tá súil agam go dtaispeáintear cleas dom le cromadh go healaíonta nuair atá arraing i mo thaobh.” Jennifer Zamparelli agus Laura Fox a chuireann Dancing with the Stars i láthair. Sa tsraith seo ar RTÉ, cuirfear gáifeacht agus galántacht ar fáil gach oíche Dé Domhnaigh ó mhí Eanáir ar aghaidh agus beidh 12 phearsa mór le rá i dteannta damhsóir gairmiúil chun dreas damhsa beo a dhéanamh gach seachtain. Beidh ar gach beirt máistreacht a fháil ar sheánra éagsúil den damhsa gach seachtain, an Charleston nó an Salsa mar shampla, agus ní bhíonn acu ach seacht lá le snas a chur ar an damhsa sula mbíonn orthu é a dhéanamh beo os comhair mhuintir na tíre ar fad. Beidh gach beirt damhsóirí á marcáil ag painéal ceathrar moltóirí saineolais: Oti

Mabuse, Brian Redmond, Arthur Gourounlian agus Karen Byrne, chomh maith leis an lucht féachana ag baile, agus tabharfaidh an bheirt bhuacach corn liathróid ghile na gile leo ag deireadh na sraithe. Bí ag faire ó Dé Domhnaigh an 4 Eanáir ar aghaidh ar RTÉ One agus RTÉ Player go bhfeictear an spraoi agus an spleodar. Nótaí don Eagarthóir: Is iad ShinAwiL a léiríonn Dancing with the Stars do RTÉ. Déanann Hyundai urraíocht ar Dancing with the Stars. Chun an nuacht is déanaí agus luaidreáin ón gcúlstáitse ar Dancing with the Stars a fháil, coinnigh súil ar na cainéil shóisialta: Instagram: @RTEOne & @DWTSIrl TikTok: @RTEOne Facebook: @RTEOne Twitter: @RTEOne @DWTSIrl #DWTSIrl

-CRÍOCH-